Lesa Mocion

“Tur analisis a indica cu e introduccion di BBO ainda mas riba e ya conosido medidanan lo trece su efectonan cu lo ta bay ta penoso pa nos economia y bida social na Aruba. Costo di bida ta sigui aumenta y e costo di operacion ta keda aumenta pa tur servicio cu tur su consecuencianan”, esaki ta palabranan di Mike de Meza, miembro di fraccion di AVP den Parlamento. E ta bisa cu ta imposibel cu un Gobierno por keda aumenta su entrada financiero riba lomba di pueblo y ta bira cara ora mester duna coperacion pa supervivencia di esnan cu ta percura pa nos pais sigui progresa! Ta di lamenta ora mira con Gobierno ta trata cu e servicio di transporte publico awe, despues cu e mesun Gobierno ta horca nos economia cu su medidanan consistente ya pa 6 aña consecutivo. Pueblo ta testigo y no por lubida con e Gobierno actual a aumenta costo pa tur e “leges”, accijns, primanan di AZV y AOV/AWW tambe nan “loongrenzen” pa AZV y AOV/AWW, a bini cu un lista positivo (lesa: lista negativo) pa limita cobertura di remedi pa salud pa tur hende y hasta nos grandinan, despues aumenta impuesto di importacion riba casi tur productonan na Aruba y pa despues strangula pueblo cu e sla mortal di BBO.

Awe e mesun Gobierno aki cu ta causante di subida di productonan y servicionan mester sinta of duna comprension pa sigur e servicio di transporte publico. Costo a subi di gasolin, productonan pa mantene un operacion di servicio cu simplemente por bisa a aumenta den su totalidad. No mester lubida cu despues di cubri tur e gastonan cu a subi, ainda mester paga e famoso 3% di BBO na Gobierno!

Ora haci e analisis di entrada y gasto average basa riba cifranan real di esnan cu ta labora den servicio di transporte publico, anto cada ken ta yega na conclusion cu mester aumenta e tarifa di transporte of crea un tarifa special di accijns pa Arubus y e autobusnan. Tur hende sa cu un solucion ta necesario sino esaki lo cai duro pa e pa e pueblo en general. E servicio cu Arubus y e autobusnan ta duna ta di suma importancia pa e economia, e forza laboral y e bida social na Aruba. No mester lubida cu esaki ta resultado atrobe puramente di un Gobierno caprichoso y sin vision, ya cu e gobernantenan a wordo alerta di efectonan cu cada un di e medidanan lo a trese cu ne. Awe ta mira cu e gobernantenan actual y fraccion di MEP den Parlamento ta purba di culpa tur hende pa cu e aumento di costo di bida.

Ta mas cu logico cu Gobierno tin cu atende cu e prijs halto pa uso di servicio di transporte mas rapido cu ta posibel y Gobierno no mester lubida di e importancia cu e servicio di transporte tin pa cu nos economia, bida social y progreso en general. “Unda nos lo ta si no tin e servicio di transporte di Arubus y e autobusnan ta un pregunta legitimo pa demostra con importante e servicio aki ta!”, de Meza ta duna di conoce.

Fraccion di AVP a entrega un mocion pa Gobierno studia e posibilidad y crea un tarifa di accijns special pa gasolin y/o diesel pa Arubus y e autobusnan pa asina por rebaha y/o mantene e prijs di transporte riba un nivel social aceptabel pa comunidad di Aruba. E mocion aki a wordo accepta unanimamente pa henter parlamento. Gobierno mester asumi su responsabilidad y cuminsa atende e chaos cu nan ta causando, tabata palabranan final di Mike de Meza.

Lesa Mocion