Inflacion na 2007 ta accelerando na un nivel imprevisto pa Aruba durante e ultimo decada. Aumentonan liher den prijsnan general ta ser registra, y e perspectiva pa proximo lunanan no ta hopi alentador, sigur si tene cuenta cu desaroyo den prijs di petroleo y e necesidad pa mas entrada pa Gobierno - su fair share - cu ta resulta den mas medida. Di januari pa juli, den e promer mitar anja di 2007, prijsnan general na Aruba a aumento no menos cu 6.1 porciento. Desde 1993 ultimo cu a registra inflacion anual di 6.4 porciento, a sa di mantene un nivel acceptable di inflacion na Aruba. Cu e cambio di maneho pa ricibi “fair share” na entrada y aumenta su gastonan coriente, Gobierno a inicia un proceso di stimula y accelera inflacion domestico.

Inflacion y patrono di consumo Aumento accelera den inflacion na Aruba tin su consequencianan pa e patrono di consumo di famianan. Cu un presupuesto fijo y alrededor di entrada minimo, gran parti di famianan na Aruba tin poco espacio y alternativa pa mantene nan patrono di consumo conforme na e aumentonan constante den prijsnan general na Aruba. Consequencia logico den hopi caso ta cu mester corta den gastonan existente pa no crea debe innecesario. Of mester busca forma pa aumenta entrada.

Cu aumentonan drastico den costo di bida na Aruba, famianan mester hasi hopi sacrificio pa mantene cabes ariba awa. Un gasto halto y cu prioridad den presupuesto famiar ta mantencion di jiunan, di cual educacion ta un porcion importante. E sacrificio y inversion cu famianan ta haciendo pa manda y mantene nan juinan na scol, ta exigiendo mas y mas di e budget familiar. Prijsnan halto pa cuminda, uniform di scol, paña, sapato, articulonan pa scol, buki, transporte, etc ta hasiendo gastonan escolar pisa hopi den e presupuesto familiar.

Educacion den e forma aki ta birando un luho pa hopi di nos hobennan, un luho cu cada ves menos por sigui permiti nan mes esaki. Famianan mas y mas mester hasi escogencia entre educacion mas avansa pa nan juinan of laga nan aporta na un edad mas hoben na e entrada familiar.

Click image to enlarge

Mientras tanto, kiko ta e maneho di Gabinete Oduber pa stumula y aporta pa famianan juda nan jiunan pa persigui un mihor educacion? Den ki forma maneho di Gobierno ta impactando e posiblidad pa sigui un estudio?