Pueblo por a tuma nota di e “eloquente/artisticamente” speech ku minister Marisol a trese padilanti durante e tratamiento di e presupuesto di asuntonan social, ensenjansa y infrastructura.

Pa cuminsa e falta di respet pa e organo mas halto segun nos constitucion, esta esun di parlamento. No ta pasobra miembronan di parlamento ta hasi nan preguntanan fuerte riba irregularidadnan ku ta sosodiendo anto abo como minister sin mas ta bin falta respet pa parlamento door di trese un hala di insinuacionnan den direccion di esnan, cu den nomber di pueblo ta trese nan preguntanan na bo persona como minister.

Miembronan di fraccion di AVP a trese acusacionnan y nan preguntanan dilanti durante e tratamiento a base di pruebanan ku nan a bini ta encontra durante e ultimo lunanan. Un ehempel di un di e preguntanan ta con por ta posibel ku na solo un comerciante ta otorga no mas ku 7 terenonan comercial. Berdad ku esaki no ta contra ley pero si contra di etica di bon Gobernashon. Riba e pregunta aki ningun contesta di parti di e minister. Pero si minister ta hanja ta bon di bini dilanti ku acusacionnan den direccion di e miembronan di fraccion di AVP entorno FCCA y Interbank. Ta facil mes pa den parlamento hasi acusacionnan ku no tin base mes, pasobra toch no por hasi nada riba acusacionnnan falso debi na e imunidad ku ta wordo otorga na miembronan di parlamento y tambe na e ministernan den parlamento. Mi ta puntra sra. Minister Lopez-Tromp pakiko e no a entrega un keho ainda na Landsrecherche ? Kiko e ta wardando? Manera ku e la expresa su mes den parlamento ta parse ku e ta sigur sigur di locual e tawata tresiendo padilanti!

Hasta lider di fraccion di AVP, sr. Eman a pidi e minister e momento ey pa distribui e documentonan ku ta prueba locual ku e tawata insinuando. Pero manera semper a keda keto y no a hasi tal.

Manera ku ya mi colega sr. Sevinger a bise tambe, bay Landsrecherche of publica e documentonan ku ta indica locual e la trese padilanti durante e reunion publico di parlamento y stop di simplemente tira acusacionnan den laira y no actua.

Ta bon conoci ku e Gobierno aki dia a asumi Gobernashon na anja 2001 a laga sa ku lo bini ku tur sorto di investigashonnan pa asina laga cera esnan ku a hasi actonan di corrupcion den e Gobierno anterior. Awe ta mas ku seis anja y te dia di awe ningun persona a wordo cera. Anto pueblo por imagina su mes si ta berdad locual ku minister Marisol Lopez-Tromp a trese padilanti entorno Interbank y FCCA, nan no a entrega un keho caba?? Aki pueblo por tuma nota ku ta simplemente acusacionnan sin base esakinan ta.