AVP - CRISTIAN DEMOCRATA ARUBA
   
JOHN v.d. BIEZEN: Miembro di AVP
PREGUNTANAN NA MINISTER MARISOL LOPEZ TROMP
Home > Centro di Prensa > Noticia > 20070930
 

Recientemente, pueblo di Aruba por a tuma nota di un serie di posibel irregularidad nan cu ta ser publica den medionan di comunicacion tocante Minister di Asuntonan Social y Infrastructura, Sra Marisol Lopez Tromp. Mirando cu hasta documentonan y un potret comprometedor pa dicho Minister a ser publica ta motibonan sufieciente valido pa condusi na hopi dudanan y preguntanan den pueblo. Preguntanan manera lo siguiente:
       
1 - Cuanto tereno a wordo kita desde 2001 pa 2007 y otorga na otronan ariba ordo di Minister?  
       
2 - Cuanto tereno e comerciante miyonario cu ta bishita cas di Minister y kende su portret a sali publica dilanti cas di Minister, a haya totaal pa hasi negoshi cu nan, den e ultimo 6 anjanan di Gabinete Oduber 3 y 4?  
       
3 - E comerciante miyonario aki a yega di aporta na e campanja miyonario di Minister Lopez Tromp na 2005?  
       
4 - Si Minister President den su calidad di remplazante di Minister di Infrastructura y según su propio declaracion, no a firma pa pasa e tereno di pier di piscadornan na e comerciante ya menciona, Minister Lopez Tromp si a firma? Tabata tin un suma envolvi?  
       
5 - Recientemente a sali publica un documento comprometedor di un prestamo di 1 miyon florin hasi door di Minister Lopez Tromp na un compania offshore di Curacao cu yama Abundance. Esaki no ta bay contra norma nan di bon gobernación?  
       
6 - Ta berdad cu Minister Marisol Lopez Tromp a kita tereno pa construccion di un Iglesia Christian y a pase pa un comerciante?  
       
7 - Cuanto e huur di e edificio di Interbank, caminda Minister Marisol Lopez Tromp su oficina ta situa, ta costa pueblo pa luna?  
       
8 - Ta berdad cu ruman muher di Minister Marisol Lopez Tromp ta directora di noticia na Tele Aruba?  
       
9 - Cual ta e pasonan cu Minister Lopez Tromp lo tuma mirando e situacion social alarmante den comunidad?  
       
10 - Mirando cu hopi mucha ta hayando les den trailernan cu poço ventilacion y falta di muebles, cual ta e pasonan cu Minister Marisol Lopez Tromp lo tuma pa alivia e situación penoso aki?  
       

Esaki nan ta djies algun pregunta relaciona cu inquietudnan y disgustonan den pueblo tocante di e maneho di Minister Marisol Lopez Tromp cu ta parse di ta hopi enfoca caminda e miyones nan ta, enbes di mustra su propio coleganan minister ariba e hecho cu e medidanan tuma door di Gabinetenan Oduber 3 y 4 ta cabando cu e presupuesto familiar di hopi hogarnan di menos recurso.
 
 

top