d.r.p.d.: Mike Eman, Lambert van Nistelrooij, Mito Croes

Durante nan di dos dia di programa di reunion na Parlamento di Union Europeo, Lider di AVP, mr. Mike Eman y dr.mr. Mito Croes a reuni cu Euro Parlamentario, Lambert van Nistelrooij. E miembro pa Hulanda aki den Parlamento Europeo ta Coordinador di Asuntonan Regional (entre cual UPG) di Union Europeo pa tur partidonan di pueblo (EVP) den Parlamento di Union Europeo. Cu euro parlamentario van Nistelrooij a reuni riba e desaroyo di e posicion di lugarnan ultrapereferico dentro di EU y e provision pa un opcion pa Aruba y islanan di Antiyas por escohe pa UPG den e tratado nobo cu ta bai remplasa e tratado constitucional.

Un materia pa cual tambe tin hopi interes ta e hecho cu ciudadanonan di Aruba pa promer vez ta bai participa na eleccion pa Parlamento di Union Europeo na 2009. Manera ta conoci Gobierno di Reino a dicidi cu ta bai cambia e ley di eleccion pa cumpli cu e caso Eman-Sevinger den cual Corte di Europa a mustra cu e destinccion cu Hulanda ta haci awor cu tin como resultado cu hulandesnan naci na Aruba biba na Aruba no por vota no ta hustifica. Awor cu Hulanda ta bai cambia e ley di eleccion pa cumpli cu e veredicto aki ciudadanonan di Aruba y islanan di Antiyas cu ta hulandes tur por bai tin derecho di voto den eleccion 2009 pa eleccion di Parlamento di Union Europeo.

	d.r.p.d.: Mike Eman, Lambert van Nistelrooij, Mito Croes

Eman y Croes a mustra e representantenan di Union Europeo cu lo mester bai duna informacion na e electorado nobo aki di e funcionamento di Union Europeo y con e decisionnan cu ta worde tuma dor di e organonan di EU tin efecto riba ciudadanonan di Aruba. Informacion mester worde duna tambe riba e programanan cu Union Europeo tin cu awor ta aplicabel pa Aruba y su ciudadania. Pa e eleccion 2009 y pa decisionan cu mester worde tuma ta importante pa informacion amplio worde duna tambe riba e tantisimo programanan di educacion, beca, desaroyo social y cultural, asistencia den maneho di imigracion y integracion, sosten pa empresanan chiguito y mediano, asistencia pa desaroyo di infrastructura y technologia cu tur ta bin aserca na momento si Aruba bira UPG.

Euro Parlamentario van Nistelrooij a mustra cu e ta sinti cu di parti di Parlamento di Union Europeo lo tin hopi interes y disponibilidad pa forma parti di e proceso di informacion aki. Hunto cu e parlamentonan y gobiernonan di Aruba y islanan di Antiyas lo mester structura e plan di informacion institucional. Riba nivel di fraccionan cu ideologia similar lo haci esaki a base di coopercion mutuo. E fraccion di partidonan cristian democrata di pueblo (EVP) cu cual AVP ta mantene major contacto ta esun di mas grandi na e momento aki den Parlamento di Union Europeo. Eman y Croes a haci e contactonan pa di parti di e rumanan cristian democrata den Parlamento di Union Europeo di entre otro Hulanda, Spanja, Portugal y Belgica e proceso di informacion cu AVP lo organisa haya sosten y cooperacion amplio. Esaki a worde palabra cu e miembronan Fernando Fernandez Martin (Spanja/Canaias), Sergio Margues (Prortugal/Madeira) y van Nistelrooij (Reino Hulandes). Mr. Mike Eman y dr.mr. Mito Croes ta sinti cu e forma aki di tene contact cu Union Euopeo tur dia ta habriendo mas y mas e portanan pa Aruba por haya un mihor posicion pa cu Union Europeo na interes di futuro di e pueblo di Aruba y un Reino Hulandes cu metanan comun.

Pa mas informacion di Euro-Parlamentariër van Nistelrooij klik aki bou...