Den e dianan tras di lomba, nos por a tende con minister di enseñansa, ta purba di tira su erornan den scochi di otro hende. Aruba completo por a tende con na apertura di aña parlamentario, a wordo bisa cu desde status aparte te cu aña 2005, cu Marisol a tuma e cartera di enseñansa, ningun minister no a haci nada pa enseñansa. Lubidando cu ta su partido mes tabata responsabel pa enseñansa sigur pa 10 di e añanan ey. Lastima cu e minister aki ta purba di pinta otro malo y no por bisa kiko e a haci, desde cu e a tuma e cartera aki na su encargo. Loke ami si por bisa ta cu e no a haci nada pa enseñansa.

Esaki ta djies 1 di e ehempelnan di un minister sin vision...... Manera cu pueblo di Aruba por sa, den presupuesto di aña 2006 nos minister di enseñansa, despues di a tuma e cartera di enseñansa, lo a bay traha un scol nobo na Noord, y cu esaki lo a costa nada mas y nada menos cu 2 miyon florin. E scol aki lo a wordo construi na kudawecha, pero te cu dia di awe nos no a mira ni un “lokaal” corda pa scol. Loke ta mas pret, ta ora mira den e presupuestonan 2006, 2007 y esun nobo di 2008. E minister aki ta pone cu e scol fantasma aki lo tin gastonan di personal y otronan, di e siguiente sumanan, pa aña 2006 Afl799.400, pa aña 2007 Afl 806.500 y pa aña 2008 Afl 837.800. kiermen riba e presupuestonan entrga pa minister di enseñansa te cu dia di awe e scol fantasma aki a costa e pueblo di Aruba 4.4 miyon florin Ra Ra Ra na unda e placa aki a bay, ta e so sa . Porta na asfalt? Of na tereno?

Awor ta e muchanan di Noord ta wordo poni un banda…. Lastimanente awe nos por mira, con Scol Basico Washingthon tin cu sufri pa e mal maneho di Marisol. Esta cu e minister sin vision, no a percura pa e scol nobo na Noord. A pone placa ariba presupuesto si, pero nunca e scol no a wordo construi. Awe e muchanan di Scol Basico Washintong mester sufri mas di 4 mucha pa cada meter cuadra un scol cu a wordo traha primeramente pa mas o menos 300 mucha awe mester carga e peso di mas cu bobel di esaki esta di mas o menos 650 mucha. Awe nos por mira un cantidad di trailer jena den cura di e scol un espacio inapropia tanto pa e mucha como pa e maestro.Algun problema cu e scol aki ta trese cune, clasna grandi di 32 mucha, consecuentemente mas peso pa e maestro y menos atencion pa e mucha indifidual. Anto Marisol ta papia di derecho di mucha. Anto Marisol ta bisa cu e mucha mester ta central. Unda e pensamento ey a keda. Anto e maestronan nan no meter ta central. Ay no Marisol bo a bolbe desapunta mi. Unda e placa di scol di Kudawecha a bay, ta abo so sa . Porta na asfalt? Of na tereno?