AVP - CRISTIAN DEMOCRATA ARUBA
   
Mike Eman ta haya reconocimento pa plannan renovador
AVP TA HAYA APOYO PA VISION HUMANITARIO
Sosteni pa analisnan profesional y cientifico
Home > Centro di Prensa > Noticia > 20071003
 

Un lider di un pais chiquito resaltando den e mundo grandi. Mike Eman su posicion awe den mundo politico internacional ta motibo pa orguyo pa AVP, Aruba y cada ciudadano di e baranca chiquito aki. Accento di Mike Eman desde su entrada den politica riba un maneho di politica cu ta basa riba e nececidadnan di mas basico di pueblo y oportunidadnan nobo pa futuro di Aruba articula den un vision ideologico cu ta worde fundamenta cu estudionan serio a hacie crece na Aruba como e politico mas popular, pero tambe den mundo a bai ta ganando respet, simpatia y reconocimento. Cu e reconocimentonan internacional aki Mike Eman mes ta keda humilde. E kier bisa mas kico e y AVP por haci cu e posicionnan aki cu locual nan ta nifica personalmente pe. “Nos kier habri porta pa un mihor futuro pa Aruba, haya ehempelnan di un politica mas serio y eleva pa Aruba y crea relacionnan cu mayan lo crea hopi oportunidad pa mihor calidad di bida pa tur hende cu ta biba na Aruba", e lider di AVP, Mike Eman ta bisa na punto di un ciclo di exitonan grandi den politica internacional pa su persona, AVP y Aruba.

E RETO TA GRANDI

E situacion social economico na Aruba ta empeorando dia pa dia mas. Gastonan enorme pa e cuidadano, un status financiero di gobierno cu ta deteriorando y e escandalonan continuo cu ta rondona e gobernantenan ta haci e malcontento bao di e pueblo bira mas grandi. Mike Eman, lider di partido AVP: “Primordialmente e introducción di BBO dia 1 di januari tabata e gota proverbial cu a haci e hemchi bai over. Cada luna cu pasa e consecuencinan negativo di e BBO ta bira mas visibel ainda. E maneho di e gobierno actaul ta wordo caracterisa pa oportunismo, faboritismo y nepotismo". Eman: “Diariamente nan ta mustra cu nan no ta apto pa hiba un maneho coherente. E gobierno ta nenga di haci e aparato gubernamental mas eficiente. Pero loke ta mas inaceptabel ta cu e cuenta pa e maneho descabeya aki ta wordo presenta na e pueblo di Aruba. Invoerrechten a subi, tarifanan a subi, tur sorto di belasting a wordo hisa y como punto culminante a bin e introducción di BBO. Tur e medidanan aki a wordo tuma sin nunca a haci un estudio macro enonomico of uno di e impacto social cu nan ta trece cu nan. Un debacle economico alimenta pa aumento discontrola di prijsnan ta e concecuencia”
AVP TA TRAHA CU PLAN Y VISION
Contrario na e gobierno actual, partido AVP ta hiba un maneho integral y cu un base cientifico. Durante eleccion di 2005 AVP a presenta un Plan total, na unda no solamente e finanzas di gobierno lo a wordo drecha y na unda cu lo a busca solucionnan pa e nivel di cuido na Aruba (cuido social, pensioen ect.), pero tambe lo a pone atencion amplio na e pilarnan di nos futuro: manera enseñanza y infrastructura. Eman: “Plan Aruba na 2005 ta mustra claramente e diferencia cu tin entre MEP y AVP.
MEP ta un partido tipico di zundramento y ofensa, exitoso den oposicion, pero cu ta faya barbaramente ora cu e mester goberna. AVP, como un partido cristian democrata den e centro politico ideologico, ta basa su maneho riba vision, decencia y ta para mas cerca di nos pueblo. Plannan bon hinca den otro pa nos ta esencial.” Desde 2001 partido AVP a hiba su maneho solido na un plan mas halto. Cu introduccion di FESCA (Fundacion Estudionan Social Cristian Aruba), AVP a haci di su maneho uno basa riba estudionan cientifico. Eman: “Plan Aruba na 2005 tabata e prome Master Plan cu a wordo haci a base di estudionan haci dor di FESCA. Awor nos ta dos aña y mei mas leu. Lamentablemente e situacion na Aruba a empeora, pesey awor a bira necesario pa desaroya un continuacion di Plan Aruba. Ta pesey mes cu partido AVP a yega na acuerdonan y cooperacion den Reino pa por intensiva e trabao di FESCA cu un proyecto grandi di 8 estudio.
ESTUDIONAN NOBO COOPERACION CDA/WI-AVP/FESCA
       
     
       
Nos lo integra e resultadonan di e estudionan aki den un update di Plan Aruba. Cu e Plan adapta aki nos lo por goberna cualkier momento cu nos wordo yama pa trece solucionnan pa e problemanan enorme cu e isla aki ta pasando aden awor aki.” E nivel di desaroyo di maneho di partido AVP den e espirito di renovacion profesionalisacion a wordo logra conhunto cu e WI di CDA, cu no mucho tempo pasa tabata wordo maneha pa Ab Klink, e actual Minister di Salubridad Publico di Gabinete Balkenende IV. Un persona cu ta worde reconoci den henter Hulanda pa su intiligencia y capacidad pa traduci e ideologia di centro di cristianan democrata den manehonan practico cu hopi éxito. E ex parlamentario Klaas Tuinstra, experto riba tereno di presupuesto y un aliado di CDA WI, tabata un par di dia pasa un biaha mas na Aruba pa hunto cu e fraccion di AVP y FESCA duna e prome impulso di un up date y profundisacion di Plan Aruba. Tuinstra ta traha desde 2002 como co-desaroyador di e plannan di CDA. Durante su bishita AVP a mustre riba e deseo pa mantene y intensiva e cooperación entre FESCA y CDA WI. Mike Eman tin den Klaas Tuinstra un consehero excelente y hopi aprecia. Den un publicacion recien di e revista renombra Elsevier Klaas Tuinstra ta wordo califica como un di e conseheronan top di Premier Jan Peter Balkenende. E ta wordo considera como e miho calculador di CDA. “Si Premier Balkenende di berdad kier sa si e cifranan di e Minister di Finanzas ta klop, e ta haci un apelación riba Tuinstra”, asina Elsevier ta señala.
APOYO INTERNACIONAL
       
     
   

Ex-presidente di Mexico, Vicente Fox Quesada, hunto cu Mike Eman; Presidente y vice-presidente res-pectivamente di Crsitian Democrata Internacional

  
       
Na Roma y Straatsburg e lider di AVP, Mike Eman a duna e apoyo pa e vision ideologico y forma profesional di traha di AVP un dimension mas grandi cu cooperacion reconocimento di e mundo politico internacional den e centro di spectrum ideologico. Enfoke di e cooperacion internacional aki ta fortifica e balornan y vision di e politca cristian democarta y di centro. Ta reconoce cu e rol di estado ta importante y cu e mercado liber ta esencial pa e economia, pero tur den un balansa cu ta sirbi e calidad di bida di e pueblo y e stabilidad, cohesion y indentidad di e nacion. Esaki ta locual un politico den e centro di e spectrum politico semper ta busca pa su pueblo y pais. Pesey e ta keda mira interes di e pueblo y e pais y no ta liga su mes cu expansionismo irieponsabel di gobierno of un mercado liber descontrola. E calidad di bida di e famia, e bario, e pueblo y e historia, vision y mision di e pais ta keda central. Ta e pensamentonan aki ta locual ta forma e base pa un politica estabiel cu por hiba un pueblo y un pais berdaderamente padilanti. “Nos no ta busca prosperidad (“welvaart”) so pa e pais, pero bienestar social (“welzijn”) tambe pa tur ciudadano. Esaki ta marco di referencia pa tur e reconocimento y cooperacion cu Mike Eman y AVP ta hayando pa nan vision y compromiso pa futuro di Aruba.
CONFERENCIA COMUNITARISMO NA ARUBA
E pensamento di un sociedad mas uni den buskeda di calidad di bida y coopercion comunitario ta base di e pensamento cu Mike Eman ta articula na cas y den exterior cu ta e plataforma cu ta dunando e reconocimento y apoyo pa un vision cu por sera e “gap” entre prosperidad y bienestar general cu tin den hopi pueblo. Progreso economico comercial mester ta bon planea y sostenibel y mester worde traduci na interes di e bienestar y calidad di vida di e pueblo. Pa garantisa esaki pueblo mester ta parti di desaroyo. Mester tin metanan y objetivonan cu ta worde carga den e comunidad y organisacionan den e comunidad den realisacion di e bon comun. Esaki ta e base di pensamento cu Eman y AVP ta sigui sostene y promove pa crea mihor calidad di vida y harmonia den desaroyo di Aruba. Pa e motibo aki e lider di AVP a sera contacto cu e persona cu ta conoci internacionalmente como e tata di e pensamento communitarista moderno. E ta worde reconoci den e categoria di e 100 pensadornan mas grandi den mundo. A ricibi un cantidad grandi di premio, nominacion y reconocimento pa su bukinan y publicacionnan y su aporte na crea un mihor calidad di bida pa humanidad. Ta trata aki di Profesor Amitai Etzioni actualmente Profesor y Director di e facultad di Sciencia Politico na George Washington University. E ta tambe fundador di “The Communitarian Network”.
       
     
   

Prof. Amitai Etzioni cu Mike Eman den su oficina na Washington D.C.

 
       
Basa riba e contactonan aki awor AVP, FESCA y Fundacion Digna Lacle Herrera ta organisa na inicio di November un conferencia riba comunitarismo den cual Prof. Etzioni lo ta e keynote speaker. “Topico di e conferencia ta nos interes pa profundisa mas den e filosofia communitarista y pone e tema aki riba mesa como un fuente di pensamento for di cual nos por haya inspiracion pa un linea politico y di maneho cu un enfoque mas humanitarista, cu ta pone norma y valornan central, cu ta enfoca riba reinforza e nuclio familiar y relacionnan di amistad, sentimiento di solidaridad y convivencia den comunidad”, e lider di AVP, Mike Eman a splica.
PROSPERIDAD MESTER BAI HUNTO CU BIENESTAR GENERAL
“Hopi di e problemanan cu nos ta mira na Aruba tin di haber cu e deteoro den relacionnan familiar y den comunidad. Pa drecha esakinan mester tin un maneho dirigi riba fortalece e valornan aki, reinforza e fibranan cu ta mara un sociedad hunto”, Eman ta expresa. Profesor Etzioni a plantea ideanan, reconoci internacionalmente, con cu maneho, ehempel y liderasgo inspirativo por logra hustamente e mihor sociedad aki. Etzioni den su publicacionnan ta mustra cu nos tin derecho individual, pero nos tin un responsabildad social tambe pa cu nos prohimo, nos pais, nos futuro. Logra e bon comun ta un responsabildad comparti. Nos no mester biba cu e pensamento di “ami”, pero di “nos”. Homber, muher y muchanan ta miembro di hopi comunidad: famia, barrio, un cantidad grandi di nuclionan social, religioso, etnico, di trabao y asosiacionnan professional y di un pueblo completo. Existencia humano y tampoco libertad individual por worde sosteni pa un tempo largo pafor di e comunidadnan interdependiente y interrelata na cual nos tur ta pertenece. Ningun comunidad tampoco por sobrebibi pa largo si su miembronan no dedica parti di nan atencion, energia y recurso na projectonan y causanan comun. Un comunidad cu worde trata husto di parti di estado lo responde riba e yamada pa pone su schouder bao di metanan comun. Mike Eman ta bisa cu tur e iniciativanan aki ta pa nos por yega na un un Aruba feliz atrobe: “di momento cu Aruba haya un gobierno nobo nos por crea e espirito pa union humanitario. Aruba tin mester di e comienso nobo aki. Nos kier inspira nos comunidad pa tene speransa. Cu tin lider nobo cu vision nobo pa nos pais. Un vision nobo cu ta worde delinea a base di profesionalismo, un vision nobo cu lo worde ehecuta cu e espirito comunitario di union, convivencia y solidaridad di uno pa otro y di nos tur pa nos comunidad, nos pais y nos futuro”.
 

top