BBO ta causando un inflacion espantoso na Aruba. E lider di AVP, mr. Mike Eman ta haya e cifra di inflacion hopi preocupante. Si mira e cifranan di CBS cu ta indica cu e “bestaansminimum” na Aruba awor pa un famia di tres (pareha y 1 jiu) ta Afl. 2500,== pa luna. E cifra aki di CBS ta uno di un estudio na 1994 corregi cu inflacion te na 2007. Eman ta kere cu ora tin un “budgetonderzoek” nobo ta bai resulta hasta cu e “bestaansminimum” ta hasta mas halto.

Locual ta evidente for di e cifra aki pa e lider di AVP ta cu si tata y mama no traha un parti grandi di nos poblacion no ta alcansa e minimo cu mester pa nan biba of mihor bisa pa nan por sobrebibi. E problemanan social grave cu ta bin cu esaki ta worde ignora tambe pa Gabinete Oduber y Minister Marisol Lopez Tromp.

Eman ta bisa cu e ultimo 6 anjanan inflacion a acumula te casi 25%. Awor cu BBO ta mira cu inflacion ta bai ta hopi halto na 2007. Gobierno ta bisa cu a reduci impuesto pa cubri pa e introduccion di BBO. Sinembargo e lider di AVP ta bisa cu ora bo haci calculacion riba un inflacion di 8% manera Banco Central ta pronostica y compara esaki cu e reduccion di impuesto bo ta mira cu esnan bao di Afl. 2500,== pa luna ta bai hopi atras.

Eman ta duna e cifranan pa substancia esaki. Aplicando e tarifanan nobo di loonbelasting (reduci pa introduccion di BBO) den comparacion cu efectonan di un inflacion di 8% bo ta yega na e siguiente resultado:

		Click riba e imagen pa un version mas grandi.

E situacion pa esnan riba un onderstand, pesioen di vehez of huerfano of salario minimo no ta di papia mes.. E ahuste di 3% riba onderstand y pensioen y Afl. 100,== riba salario minimo ta worde absorba caba dor di aumentonan di pan y corant. Un dia no a cuminsa y ya e famia a perde na aumento di prijs di corant y pan so caba tur locual supuestamente a haya na aumento. Aki no ta papia mes di tur e otro aumentonan di cuminda, panja y transportacion. Mr. Mike Eman ta bisa cu ta evidente cu Gabinete Oduber ta strangulando e pobernan den comunidad haciendo nan dolorosamente mas pober.

Eman ta bisa cu esnan den clase medio por sobrebibi, pero nan aspiracion y labor duro diario ta pa bai padilanti. Esaki antes tabata posibel na Aruba. Awor no mas. Gabinete Oduber ta sofocando nos clase medio. Tur e aumentonan di prima (AOV y AZV), aumentonan di invoerrechten, cambionan di “premiegrens” y “premiegrondslag”, cierto cambionan den reduccionan antes posibel for di impuesto y tambe cambionan di “fringe benefits” a haci locual tabata un reto pa e clase medio, esta di bai padilanti algo imposibel awor.

Eman ta bisa cu mientrastanto esnan cu tin mas entrada tambe ta mira cu biba den un pais caminda no tin claridad y consistencia den reglanan, maneho, rumbo y direccion ta creando un clima di “high risk” cu inversion particular ta bira menos atractivo tur dia.

E lider di AVP, mr. Mike Eman ta bisa cu di tur manera a purba adverti Gabinete Oduber pa no sigui gasta placa di e forma iresponsabel pasobra na final pueblo lo tin cu paga pa e deficitnan monstruoso por medio di medida y stabilidad monetario-economico di Aruba lo sufri cu aumento di debe pa paga pa deficitnan iresponsabel.

No tabata tin forma pa convence Promer Minister Oduber. Ambiciona pa placa pa esnan den y tur rond di gobernacion a haci fiesta cu sudor di pueblo y awe e mesun pueblo y Aruba ta carga e concequencia. Mescos cu nos Banco Central a yega di adverti cu e maneho aki di gabinete Oduber lo conduci na “sociale verpaupering” awe nos ta mira e resultado. E lider di AVP, mr. Mike Eman ta bisa cu BBO mester worde revoca, pasobra e ta strangulando pueblo. Mr. Mike Eman ta finalisa bisando: cu nos Creador padilanti e lucha pa cambio ta continua, husticia lo prevalece.