Aruba 17 Oktober 2007

	Convivi cu Pueblo
	Convivi cu pueblo. E sentido di solidaridad y humanismo cu awe nos comunidad ta anhela pe tin inspirador grandi den dos lider politico stima di pueblo cu den nan trajectoria a resalta den sacrificio total pa pueblo y pais: Henny Eman y Shon A Eman. E anja aki Henny Eman ta haci 50 anja cu e a fayece riba 17 di Oktober 1957 y Shon A Eman ta haci 40 anja di su despedida inespera y doloroso riba 13 di Juli 1967.
	Henny Eman
	Jan Hendrik Albert Eman (Henny) a nace na Aruba dia 7 di augustus 1887. Inspira pa su tata Cornes Eman for di un edad hoben a lanta den Henny Eman e deseo ferviente pa haci su mes util pa su isla natal. Pa añanan largo e figura energico aki a domina e escena Arubano como e indiscutibel estadista, pionero, lider politico y sirbido di interesnan di Aruba. E carera di e pionero y politico aki a inicia oflcialmente na aña 1921 tempo cu nan a eligie como Landraad di Aruba. Durante e tempo cu e no tabata Landraad mes, como unico Arubiano, Henny Eman tabata haci uso di un articulo bieu den ley pa for di tribuna publico articula fuertemente den e organo colonial Raad van Politie deseo y derecho di e pueblo Arubano. Na 1941 nan a eligie pa prome bes den staten di Antiyas, puesto cu el a ocupa te na su morto. Cu Henny Eman su entrada den Staten e caracter di e cuerpo aki a cambia. Henny Eman a haci e otro miembronan di Staten, cu su actuacion fuerte pa su isla natal, conciente cu Parlamento ta caminda representantenan di pueblo mester lucha y para fuerte pa e derecho di nan respectivo pueblo-y islanan.
	Aruba 17 Oktober 2007

 

	Henny Eman a haci su mes catibo di su vision pa Aruba. E tabata biba riba un pida baranca seco, bao di dominio colonial, meimey di pobreza y hopi amargura, pero tabata mira e futuro di e baranca aki y su pueblo como uno cu por ta prospero, organiza y autonomo. E diversidad di lucha, cambionan y organizacionnan cu Henny Eman a inicia, como pionero, riba tereno sindical, comercial, politico y estatal ta splica e vision di un pais completo cu e tabata tin pa su isla chikito ya na inicio di e siglo aki. E tabata pionero den añanan 30 di e causa Arubiano pa Aruba ta "Baas den su mes Cas", cu el a yama "Separacion", y di e lucha pa derecho di voto pa cada ciudadano. Pa encamina su vision politicamente cu mas forza el a cristaliza e movecion politico di pueblo cu c tabata guia den fundacion, na 1942, di e prome partido politico moderno na Aruba, Partido di Pueblo Arubano, AVP. Di 1942 te na su morto Henny Eman tabata presidente di AVP y lider di fraccion di su partido den Staten. Henny Eman su lucha politico y estatal a spierta den e pueblo Arubano consenshi politico. Dor di su lucha Aruba su anhelo pa mas autonomia insular a haya c prome reconocemento cu introduccion di Eilanden Regeling Nederlandse Antillen, ERNA. Loke e tabata considera, sinembargo, unicamente como un paso den direccion di e lucha pa alcansa Separacion: Un Status Aparte pa Aruba den Reino Hulandes. Na aña 1952 Henny Eman a representa Aruba na Conferencia di Mesa Rondo y a wordo ricibi pa La Reina na Palacio Soestdijk. Den su Iucha estatal pa autonomia di Aruba semper el a accentua e necesidad pa continuacion di un relacion estatal directo entre Aruba y Hulanda. Su amor pa Cas Real tabata sumamente grandi. Dor di su esfuerzo tambe a lanta Oranje Comité. Den Henny Eman su vision di un Aruba economica-, politica- y institucionalmente desaroya el a mira tambe e necesidad pa organizacionnan sindical y comercial. Asina el a stimula e formacion di e promer sindicato y instalacion di un Camara di Comercio. Den e desaroyo economico di Aruba Henny Eman y su famia a hunga un papcl grandi den binimento di Lago y establecemento di Aruba su prome compania di awa y electricidad. Cardinal den su vision di un Aruba desaroya y autonomo tabata e necesidad di facilidadnan adecuado di comunicacion. Siguiendo e paso di su tata, Cornelis Eman, el a continua cu e lucha pa Aruba construi su propio waf y aeropuerto. Henny Eman a mira cu solamente dor di saca Aruba for di su isolacion cu construccion di un waf y aeropuerto moderno Aruba por a sali for di pobreza y cuminza encamina un desaroyo economico y social propio. Waf grandi y e prome aeropuerto di Aruba ta obranan di su empeño. Su lucha pa esnan mas vulnerabel den comunidad, manera e campesino y e piscado, tabata incansabel. Pesey e tabata conoci como e homber cu semper a defende y lucha pa e homber chikito, pa cual nan a yam'e: Defensor di Pueblo. Stimacion di e pueblo Arubano pa Henny Eman tabata profundo y inmensamente grandi. Durante un gran parti di su carera politico e tabata e "votegetter" mas grandi di Aruba. Riba su nomber ainda ta marca un record den voto personal: 60% di e total di votonan emiti. Na e anhelo grandi aki pa un miho porvenir pa e pueblo Arubano y pa construi Aruba como un pais desaroya, autonomo y fuerte, el a dedica su bida cu perseverancia for di trempan den su hubentud practicamente te na momento di su fayecemento. Frankeza, determinacion y honradez tabata e calidadnan mas grandi cu a marca e caracter di e ilustre Arubiano aki den e trayectoria aki. Henny Eman a fayece dia 17 di oktober 1957. Henny Eman su lucha a bira un inspracion pa lidernan grandi cu a sigui despues. Vox Populi Vox Dei, Voz di Pueblo ta Voz di Dios tabata e forza di e conviccion di pueblo cu semper e a articula y despues lo tabata tambe e pensamento cu cual Arubianonan a sigui cu e causa pa reconocimento pa deseo y anhelo di pueblo. Henny Eman, e defensor di pueblo, e pionero di e lucha pa autonomia pa Aruba, a cana un trajectoria di sacrificio y dedicacion total pa e pueblo Arubano cu ta keda graba den curason di e historia di Aruba.
	Aruba 17 Oktober 2007

 

	Shon A Eman
	Shon A Eman Aruba ta e nomber cu a compaña Cornelis Albert (Shon A) Eman for di dia cu el a nace dia 17 di mei 1916 te dia cu el a muri, dia 13 di juli 1967. Shon A Eman a lanta di mucha den un ambiente di un dedicacion total na un lucha cu a subscribi esencia di su bida: e lucha pa Aruba bira un pais autonomo den Reino Hulandes, e lucha pa saca e pueblo Arubano for di pobreza pa un futuro cu porvenir. Su tata Henny Eman tabata pionero di e lucha aki, estadista y fundador di Partido di Pueblo Arubano (AVP), e partido politico mas bieu di Aruba. Den e ambiente aki e hoben Shon A mester a tuma un decision pa su bida. Como hoben adolescente, el a accepta su herencia. Aruba tabata tin mester di un abogado, un persona prepara pa yuda defende su causa. Su estudio no tabata p'e un porta pa bira un abogado famoso cu un carera briyante. Pa Shon A e estudio di abogado tabata e preparacion cu e mester a haya pa por a duna e base legal na Separacion, pa e por tabata abogado di Pueblo, e nomber cu el a haya pa su empeño. Na edad di 22 aña Shon A Eman a gradua como abogado y a wordo inscribi como abogado na Corte di Husticia. Abogado den Corte pa e homber pober y humilde. Abogado di Aruba: cu a skirbi e documentonan legal y a vocifera e lucha pa e realizacion di e deseo grandi di Aruba pa haya un Status Aparte den Reino Hulandes. Avance social pa e homber chikito, enseñanza pa e muchanan den tur bario y autonomia pa Aruba y su pueblo ta e aspectonan na cual Shon A a duna su bida. E orguyo di ta Arubiano a wordo transmiti cu cada palabra y gesto di Shon A Eman. Na edad di apenas 23 aña Shon A a wordo yama pa promer bes pa sirbi su Pueblo: eligi miembro di Politieraad na 1939 te na 1951, ora nan a eligie como miembro di Eilandsraad cu introduccion di autonomia insular; miembro di College van Algemeen Bestuur na 1949 encarga cu e cartera di Asunto Social; 16 aña largo el a sirbi su pais den Eilandsraad; Presidente di AVP di 1957 pa 1967; Lider di Fraccion pa su Partido den Eilandsraad y na 1958 a asumi e posicion aki tambe den Staten di Antiyas. Na 1946 Raad van Politie a delegue pa entrega na Su Majestad La Reina e peticion pa Aruba haya un Gobierno propio. Na 1948 e tabata lider di e delegacion Arubano na Conferencia di Mesa Rondo. Durante e conferencia aki, dia 18 di maart 1948, e fecha cu ta recorda te awe como Dia Nacional di Aruba, Shon A Eman a entrega un mocion. Cu acceptacion di e mocion aki e derecho di Aruba pa opta pa un "Afzonderlijke Status" (Status Aparte) pa promer bes a keda reconoci. Shon a dedica su bida na forma y planifica e futuro nobo di su pais.
	Dia 26 di mei 1967 pueblo a vota na fabor di un combinacion di AVP y UNA/PIA/PRO den Bestuurscollege di Aruba. Dia l di juli 1967 Shon A a mira un soño realiza. Pa prome bes den historia tur Diputado den Bestuurscollege tabata Arubiano. Poco dia despues, dia 13 di juli 1967, Shon A Eman a fayece inesperadamente. E Abogado di Pueblo a muri pober. E no a laga riqueza, pero si e herencia di un lucha. Shon A tabata casa cu Blanche Hartogh, e tabata un tata di ocho yiu. E no a biba pa mira su yiunan crece y bira grandi, pero su memoria a sigui inspira y guia nan. Su yiu homber mayo, mr. Henny Eman, nombra na su abuelo, na aña 1986 a bira e promer Ministro Presidente di Aruba, e pais pa cual tanto Shon A. Eman a lucha y sacrifica su mes: un Aruba autonomo den Reino Hulandes. Su jiu homber mas chiquito, Mike Eman, awe ta e politico mas popular di Aruba y siguiendo su paso di servicio total na e bienestar general. Nan devocion pa pais ta worde carga pa un generacion nobo cu tambe ta entrega nan mes na idealnan pa duna Aruba un futuro nobo. Conmemorando e idealismo di Henny Eman y Shon A Eman den serbicio na pueblo e comision special kier duna honor na nan sacrificio pa Aruba y e ehempel cu nan a laga pa otronan sigui den nan paso di entrego total na pais y pueblo. Nan stimacion pa pueblo y pais nan a pasa di generacion pa generacion.
	Aruba 17 Oktober 2007

 

	Conmemorando e idealismo di Henny Eman y Shon A Eman den servicio na pueblo e comision special kier a duna honor na nan sacrificio pa Aruba y e ehempel cu nan a laga pa otronan sigui den nan paso di entrego total na pais y pueblo. Nan devocion pa pais ta wordo carga pa un generacion nobo cu tambe ta entrega nan mes na idealnan pa duna Aruba un futuro nobo.

 

	Aruba 17 Oktober 2007