Lesa version na Ingles

E ta conoci internacionalmente como e tata di e pensamento communitarista moderno . E ta worde reconoci den e categoria di e 100 pensadornan mas grandi den mundo. A ricibi un cantidad grandi di premio, nominacion y reconocimento pa su bukinan y publicacionnan y su aporte na crea un mihor calidad di bida pa humanidad. Ta trata aki di Profesor Amitai Etzioni actualmente Profesor y Director di e facultad di Sciencia Politico a George Washington University. E ta tambe fundador di "The Communitarian Network".

Prof. Etzioni lo ta e orador principal na e symposium cu AVP, FESCA y Fundacion Digna Lacle-Herrera ta organisa riba e tema comunitarismo dia 6 di November 2007. Tambe lo ta invitado especial na e symposium Prof. José A Ruiz San Román, Facultad di Sociologia di Universidad di Madrid. Un autoridad academico grandi tambe cu hunto cu otro profesornan manera Prof. Jose Perez Adan y Prof. Carlos Diaz ta ampliando grandemente conocemento di e pensamento comunitarista den e mundo castellano.

E symposium lo profundisa den e filosofia communitarista y pone e tema aki riba mesa como un fuente di pensamento for di cual nos por haya inspiracion pa un linea politico y di maneho cu un enfoque mas humanitarista, cu ta pone norma y valornan central, cu ta enfoca riba reinforza e nuclio familiar y relacionnan di amistad, sentimiento di solidaridad y convivencia den comunidad", e lider di AVP, mr. Mike Eman a splica.

"Hopi di e problemanan cu nos ta mira na Aruba tin di haber cu e deteoro den relacionnan familiar y den comunidad. Pa drecha esakinan mester tin un maneho dirigi riba fortalece e valornan aki, reinforza e fibranan cu ta mara un sociedad hunto", Eman ta expresa. Profesor Etzioni a plantea ideanan, reconoci internacionalmente, con cu maneho, ehempel y liderasgo inspirativo por logra hustamente e mihor sociedad aki. Comunitarismo ta mustra cu nos tin derecho individual, pero nos tin un responsabildad social tambe pa cu nos prohimo, nos pais, nos futuro. Logra e bon comun ta un responsabildad comparti. Nos no mester biba cu e pensamento di "ami", pero di "nos".

Homber, muher y muchanan ta miembro di hopi comunidad: famia, barrio, un cantidad grandi di nuclionan social, religioso, etnico, di trabao y asosiacionnan professional y di un pueblo completo. Existencia humano y tampoco libertad individual por worde sosteni pa un tempo largo pafor di e comunidadnan interdependiente y interrelata na cual nos tur ta pertenece. Ningun comunidad tampoco por sobrebibi pa largo si su miembronan no dedica parti di nan atencion, energia y recurso na projectonan y causanan comun. Un comunidad cu worde trata husto di parti di estado lo responde riba e yamada pa pone su schouder bao di metanan comun.

Mirando e importancia di e tema aki, su similaridad cu fundamentonan di e ideologia Social Cristian di AVP y su relevancia pa futuro di Aruba e lider di AVP, mr. Mike Eman y parlamentario Benny Sevinger a participa na e 1’er encuentro Iberoamericano riba comunitarismo na Boyaca, Colombia na juli 2006. Eynan nan a profundisa nan mes den e tema aki durante un seminario di tres dia y a pone e contactonan cu autoridadnan intelectual riba e tema aki pa trece un symposium riba comunitarismo na Aruba. Na maart 2007 Eman a haci un bishita na George Washington University serca Prof. Amitai Etzioni y a extende e invitacion pa por concretisa e organisacion di e 1’er symposium riba comunitarismo na Aruba.

Comunitarismo ta e pensamento cu un bon sociedad por worde alcansa si e tin tres pilarnan di sosten: estado, mercado y comunidad. Den ideologianan grandi manera e ideologia social, e estado ta hunga un rol dominante. Den e ideologia liberal e mercado ta e factor preponderante. Den desaroyo di e ideologia cristian democrata, e idea di comunitarismo a haya un base hopi tempo pasa, cu e pensamento social-cristian cu tin un di tres factor cu mester carga un sociedad, esta e comunidad. Esaki ta resalta den e punto di salida di “responsabilidad comparti”.

Aki ta pensa riba e ciudadano, e famia, e bario, e iglesia, e institutonan escolar y tur otro oprganisacion non-gubernamental den un comunidad, sea social, deportivo, comercial, sindical, politico y e institutonan constitucional cu ta conseha y controla gobernacion. Pa alcansa un bon sociedad, e tres factornan gobierno, mercado y comunidad mester por tin tambe un acuerdo cu un base moral, cu e enfoke, respetando e libertad y espacio necesario di cada un, mester tin como meta comparti e realisacion di un mihor socieda pa un y tur.

Den esaki e Estado mester actua responsabel cu e recursonan di e pais y mester crea mas espacio pa protagonismo comunitario y alavez mester crea e espacio y stimula cu e mercado sinti su mes yama tambe pa comparti responsabilidad den e meta comun pa interes general. Serca e individuo, famia y nucleonan di organisacion comunitario mester stimula solidaridad pa cu otro pero tambe responsabildad social, di uno pa otro y pa e bienestar general.

Den paisnan cu ta crece y modernisa cu e retonan di globalisacion e fibranan di un sociedad ta bao di hopi presion. Ta importante pa anlysa con por fortalece esakinan dentro di e realidad nobo di bida. Esaki ta e meta cu AVP, FESCA y Funadacion Digna Lacle-Herrera kier logra cu e symposium riba comunitarismo.