Den prepraracion di e seminario riba comunitarismo cu ta tuma lugar diamars awor den aula di Colegio EPI na Sero Blanco, (7:30 or di anochi), a surgi hopi pregunta y interes grandi pa e pensamentonan aki, pasobra nan ta duna salida pa un comunidad polarisa manera esun di nos. Un di e preguntanan cu a surgi constantemente ta cua ta e metanan specifico di comunitarismo. Den preambulo di e pensamento ta duna contesta riba e pregunta aki:
e pensamento comunitario no ta prescribi ningun meta specifico. E ta wordo dirigi door di algun principio humano, civico, social y moral cu ta aplicabel den tur contexto di bida real. Con un comunidad aplica e principionan aki ta varia di e realidad di e comunidad. E esencia ta keda semper e buscamento di un balance entre individuo y su comunidad; entre e derechonan y e responsabilidadnan di cada individuo; entre e institucionnan di estado y gruponan particular di comunidad.

Esnan cu ta aplica e pensamentonan comunitarismo no ta aspira na un posicion majoritario of pa tin tur poder pa realisa nan metanan. Un di e conclusionnan importante di estudionan haci ta cu “exito di democrasia den un comunidad cu ta wordo dirigi pa ley y libertad, no ta depende di aprobacion incondicional of di forsa, pero di construccion di concenso riba balornan essencial, custumber y practicanan cu ta sigura respet pa derechonan di otronan y cumplimento constante cu responsabilidadnan personal, civico y colectivo.” Un politica of maneho cu ta exitoso, no ta esitoso pasobra ken ta presenta nan, pero pasobra nan ta wordo reconoci y accepta door di comunidad como legitimo y no impone. Esnan cu kier impone nan ideanan pa orden social di comunidad of cu kier impone nan normanan moral door di tapa boca di esnan cu ta opone nan of cu tin otro normanan, ta practica un politica inefectivo y moralmente insostenibel. Diferencianan di opinion y ideanan diferente, no mester conduci na cacophonia (=bruhacion di palaabra). For di dialogo real sin exclusion di ningun si por surgi voznan civico fuerte y aspiracionnan comun cu por sigui crece. Pesey esnan cu ta sigui principionan comunitario ta na fabor di un democracia fuerte. Esey ta ensera un gobierno mas representativo, mas participatorio y cu ta duna mas atencion na necesidadnan specifico di tur miembro di comunidad. Maneho y politica basa riba comunitarismo semper ta busca forma pa sigura cu ciudadanonan ta haya mas informacion y ta haya mas di bisa den mas situacion. Maneho y politica basa riba comunitarismo ta busca semper forma pa canalisa e poder di interesnan y placa particular y mas cu tur stop corupcion den gobierno. .

Na mes un momento ta traha hunto cu organisacionnan particular, sea comercial, sindicatonan of organisacionnan voluntario, busca forma con pa nan cumpli mas cu necesidadnan di nan miembronan y di comunidad. Den pensamento comunitario un comunidad cu ta responde nan necesidadnan di su miembronan ta uno cu tin normanan moral cu ta refleha e necesidadnan humano di tur e miembronan di e comunidad. Caminda e necesidadnan aki ta competi cu otro, e normanan di e comunidad responsabel ta indica e prioridad relativo di un necesidad riba otro y cu wordo accepta den e comunidad, sin cu ta impone esaki riba e comunidad.

Durante di e seminario Profesor Amitai Etzioni di George Washington University di Merca y Profesor Jose Antonio Ruiz San Roman di Universidad Complutense di Madrid, Spaña, lo elabora riba e temanan aki y su relevancia pa formacion di comunidadnan mas democratico y cu ta responde mas na necesidadnan di su miembronan.
E seminario cu ta wordo organisa pa e Fundacion FESCA y Fundacion Digna Lacle Herera di AVP, ta diamars dia 6 di November, pa 7:30 anochi den aula di Colegio EPI na Sero Blanco. Entrada ta gratis.