Srta. Angele Martijn a hiba e palabra di bon bini den nomber di e instancianan organisador y a duna un introduccion chikito riba e invitadonan. E la remarka cu e fibra y pilarnan di sociedadnan na mundo ta bou di un presion enorme pa via di falta di solidaridad entre e miembronan. Comunitarismo manera Prof. Etzioni ta trece dilanti ta un reaccion riba e fracturanan social ariba menciona. E conceptualizacion di e filosofia abstracto aki a wordo rapidamente atendi den e discurso di Sr. Serrant di YMCA San Nicolas. Di un manera down to earth e la conta di su experiencianan aki na Aruba den trabow social, e desafionan cu e ta trece cun’e y tambe con e ta kere cu e ideologia di YMCA ta encaha den e filosofia comunitario. E la subraya e necesidad di solidaridad cu ta necesario den un comunidad y e persuacion moral cu ta necesario pa yega na e meta aki. Sr. Serrant ta wak e comunidad manera un interaccion cu ta existi den “Ami ta loke abo ta”.

Gratitud tabata loke Sr. Mike Eman a subraya durante su discurso cu segun e ta necesario pa yega na un communidad firme. Gratidud cu ta surpasa lo humano y ta yega te na lo spiritual. Esaki ta e ehempel cu Sr. Eman a hanja si su senjora madre (q.e.p.d.). Sr. Eman a cu asuntonan familiar of comunitario no ta exclusivamente di e ambito individual of priva. Falta di vision por tin consecuencianan grandi pa e comunidad den su totalidad. Un comunidad mester di lidernan cu ta refleha un sentido di guia y proposito, concentrando riba un vision. Partidonan politico ta e conneccion cu ta existi entre e comunidad y e institucionan democratico. Thinktanknan, manera FESCA y institutonan di formacion politico, manera Fundacion Digna Lacle-Herrera ta indispensable pa yuda forma un vision pa un comunidad.

Prof. Ruiz San Roman a introduci e idenan di Professor Etzioni ilustrado e dialogo moral cu tin di existi pa fortalece e comunidad. Den e cuadro aki e la ilustra e derechonan di e ser humano y tambe nan obligacion y responsabilidadnan. Prof. Ruiz San Roman a elabora tambe riba e hecho cu e libertad di un ser humano ta cuminsa caminda cu e libertad di un otro ser humano ta caba. Pa por convivi mester mas su simple consensus, pero tambe un sentido di solidaridad. Prof. Ruiz San Roman a remarca cu Prof. Etzioni ta un di e poco sociologo nan cu un ideologia y pensamento propio cual e ta defende cu orguyo, pero si teniendo na cuenta e opinion di e criticonan.

Na final di e anochi Prof. Amitai Etzioni cu ta den e lista di e top 100 pensadornan di mundo moderno a hiba palabra. E tabata hopi gradicido pa e invitacion y, manera e mes a bisa, a purba recorta un curso di 2-3 anja den 20 minuut. E silencio den sala tabata mustra e concentracion y e interes di esnan presenta pa e palabranan di Prof. Etizioni. E la trata di conceptualiza su filosofia den ehempelnan di bida diario. E la remarca cu su filosofia no ta trata di solamente e comunidad. Communitarismo ta surgi di un balanse perfectamente crea entre mercado, estado y comunidad, caminda cu e individuo ta solidario na e identidad comun sin tin nodo di perde su mesun indentidad. Prof. Etzioni a menciona cu su filosofia a sirbi di inspiracion pa ex-Presidente di Merca Clinton, ex- y actual Prome Ministro britanico Blair y Brown respectivamente, Prome Ministro Hulandes Balkenende. Cada un den nan mesun interpretacion.

Tabata un honor grandi pa Aruba di por a tin e invitadonan akinan presente inspirando tur esnan presente. Den publico tabata tin un comision Yuwana Morto cu ta un bibo ehempel di comunitarismo na Aruba. Nan mes como miembro ta actua pa fortalece nan comunidad sin ta dependiente di mercado of gobierno. E publico presente a ser recorda cu esaki ta solamente e 1er Symposio riba Comunitarismo na Aruba y cu den futuro sigur mas lo sigui. Sigur si tuma na cuenta con exitoso e symposio aki a resulta di ta.