Na inicio di su presentacion na e 1’er Symposium riba comunitarismo Prof. Amitai Etzioni cu a traha hunto cu Presidente Clinton, Promer Minister Blair y Promer Minister Balkende a bisa cu e filosofia comunitarista a sirbi di inspiracion pa ex-Presidente di Merca Clinton, ex- y actual Prome Ministro britanico Blair y Brown respectivamente y Prome Ministro Hulandes Balkenende. Cada un den nan mesun interpretacion. Y na Aruba e ta mira e vision aki carga den un forma inspirativo dor di e lider politico Mike Eman.

Prof. Amitai Etzioni cu ta den e lista di e top 100 pensadornan di mundo moderno tabata hopi gradicido pa e invitacion y, manera e mes a bisa, a purba recorta un curso di 2-3 anja den 20 minuut. E silencio den sala tabata mustra e concentracion y e interes di esnan presenta pa e palabranan di Prof. Etizioni. E a conceptualiza su filosofia den ehempelnan di bida diario. E la remarca cu su filosofia no ta trata di solamente e comunidad. Comunitarismo ta surgi di un balanse perfectamente crea entre mercado, estado y comunidad, caminda cu e individuo ta solidario na e identidad comun sin tin nodo di perde su mesun indentidad.

Prof. Amitai Etzioni ta un hudiew cu a nace na Alemania na 1929. For di eynan e a huy cu su famia pa core for di persecusion di Nazi. Su nomber Amitai ta bini di e palabra “berdad” (emed) na hebreuw. E ta e nomber di Jonah su tata den Testament Biew. Ora Amitai a huy cu su famia pa bai biba na Palestina e tabata carga e nomber aleman “Werner Falk”. Como mucha e nomber aleman no tabata worde aprecia dor di e otro muchanan hudieuw naci na Palestina. Pesey su maestro a recomenda su famia pa dune e nomber hebreuw Amitai. E a keda carga e fam aleman “Falk” te ora cu esaki a pone den peliger di bida. Na un momento critico pa salba su bida Amitai su fam ta worde cambia di “Falk” pa Etzioni cu ta nifica palo di mata na hebreuw (Etz). Na Palestina e a lanta den un kiboets.

Den su formacion juvenil ta destaca e riguroso educacion cu e ta haya na e school “Ben Shemen” na Palestina (promer cu e pais Israel a nace). Aki e ta haya e influencia di cooperativismo agrario, y e idealnan cu ta motive pa lucha (tambe cu arma) pa un tera pa e pueblo judío. E horornan di arma ta transforme. E ta drenta den contacto cu un proyecto educativo promovi pa Martin Buber (sociologo mundialmente conoci). Di e lesnan di Buber e ta recibi e conceptonan y ideanan basico di un sociedad harmonisa caminda hende ta stima otro. Bao influencia di Buber e ta cambia di cargador di arma pa un cargador di pen y intilgencia pa yega na cambionan pacifico pa un mihor sociedad. Un publicacion comunitarista importante di Buber ta: Paths to Utopia.

Den su memorias Etzioni ta hacie cla cu su vocacion no ta unicamente academico. Tambe e kier ta un “voz publico” cu ta aporta ideanan pa aborda problemanan concreto y actual. Etzioni ta alcansa un notable influencia politico na momentonan puntual den su carera. Incluso e ta yega na traha den Cas Blanco. Eynan e ta traha como consehero directo pa Presidente Jimmy Carter. Esaki ta inicio di si influencia riba lidernan grandi den mundo.

Den e tempo ey tambe e ta aborda e tema cu no ta trata pa laga tur cos na e estado (tendencia favorito di sistemanan burocrático di poder y di funccionarionan interesa semper den acumula mas poder); tampoco ta mihor e sistema proponi pa e ideologia cu kier laga tur cos den man di empresa priva. Etzioni ta mustra cu ta existi un amplio sector no-lucrativo di altisimo interes. E ta subraya e interes di ideanan como di Robert Putnan y Francis Fukuyama riba e rol di comunidad y sociedad.

Etzioni su publicacionnan y su respet munidial ta crece enormemente unavez cu e ta establece su mes na Merca. Eynan e ta bira profesor na e Universidadnan mas prestigioso na Merca. For di e posicion ey tambe e ta sigui desaroya academicamente e pensamento comunitarista.

Den su memoir (My Brother’s Keeper) e ta splica con na un momento dado, mientras cu e ta prepara pa bai duna un di su lesnan na su studiantenan na Harvard, e ta ripara con norteamericanonan ta ocupa nan mes pa cu nan derechonan, pero ta lubida nan responsabilidadnan civico. Desde e momento ey parti di su biografía (bukinan, lectura) ta bira e difusion di ideanan rond di “socioeconomia” y “comunitarismo”, tanto den foronan academico como den foronan publico. Etzioni ta worde eligi como Presidente di e Asosacion di Sociologonan na Merca y ta bira e fundador y Presidente di Comunitarian Network.

Etzioni ta bira e profesor den sociologia mas renombra na mundo. Su bida ta worde categorisa den tres fase rond di su publicacionnan. Locual ta worde denomina “promer” Etzioni (e Etzioni estudioso di structuranan di organisacion), e “segundo” Etzioni (e Etzioni di socieconomía y comunitarismo). Y e Etzioni intelectual y cu un voz y visionnan publico cu ta hacie bira tambe consehero di lidernan manera Clinton, Blair y Balkenende. Un consehero mundial cu awe ta duna nos isla chiquito tambe atencion y a bira amigo di e lider politico mas popular di Aruba, Mike Eman.