mr. Mike Eman discurso eloquente na 1’er Symposium Comunitarismo

Gratitud tabata loke mr. Mike Eman a subraya durante su discurso na e exitoso symposium riba comuniatrismo. Gratidud cu ta surpasa lo humano y ta yega te na lo spiritual. Esaki ta e ehempel cu mr. Mike Eman a accentua di haya di si su senjora mama Blanche Eman(q.e.p.d.). E a lanta nos cu fe den Creador, cu e valornan di honestidad, integridad y trabao duro, cu e virtud grandi di gratitud. E a biba su bida den gratitud. Gratitud na nos creador pa su bida y creacion. Gratitud pa e bida cu un casa cu cual e a comparti famia y lucha y sacrificio. Gratitud na tur cu a jude na e momentonan mas dificil: famianan cu a comparti dolor di perdida, amistadnan cu a saca un man pa juda den sobrebivencia, desconocirnan cu a duna consuelo, maestronan di school, polis, dokternan, bisinjanan cu a juda carga e peso di un viuda cu hopi jiu. Gratitud pa e suelo di Aruba, su hendenan di unda cu nan por a bini, su naturalesa, riba tera of den lama, su historia carga cu retonan grandi. Cu e ehempel di su bida e a sinja nos e virtud aki di gratitud’ asina e lider di AVP a mustra riba locual e a sinja conoce di su mama den e forma con nan a lanta y experiencia e calor y solidaridad di e sentido di comunitarismo.

For di esaki ta nace un compromiso. Nos a sinja esey di chiquito. Atencion pa un amistad di semper, judansa pa un bisinja den dificultad, pa un pober den nececidad, pa un anciano den soledad, caricia di consuelo pa un famia den dolor, tur mi mama a sinjami, a sinja nos.

Cu gratitud bo ta sinja stima, convivi y comparti. Bo ta sinja mira den cara di bo bisinja su dianan pisa y sinti unda abo por ta util pe. Bo ta sinja y compronde cu no tin stranhero pero unicamente un amigo cu ainda bo no conoce. Bo ta sinja lesa e cicatriznan di nos grandinan, e aprecio y respet cu ta duna honor y gratitud ne caminda duro y largo cu nan a cana. Bo ta sinja carga e sonjonan di bo comunidad y pais y pone bo schoudernan bao di e reto pa un mihor mayan pa un y tur..

Asina gratitud ta forma miles di lineanan invisible di felicidad, amor y respet comparti, cu ta forma e fibranan cu ta mara un sociedad hunto expresa den palabranan manera famia, comunidad, bario, bisinja, orguyo civico y amistad.

Esaki ta fundeshi di un sociedad. Awe sinembargo nos ta bibando den un sociedad cu deteoro grandi den e fibranan aki y concequentemente fracturanan profundo den e pilarnan cu mester carga nos pais.

E famia ta worde kibra cu orarionan dobel di trabao y cu un peso incargabel di costo di bida. E animo y espirito di comunidad ta worde fractura cu inhusticia den trato. Nos barionan ta worde desintegra dor di deteoro, negligencia, falta di atencion y perspectiva. Nos calor di amistad mutuo ta worde kibra dor di un maneho di division, oprecion y persecusion. Nos perspectiva pa futuro ta worde nubla cu scuridad dor di falta di claridad den direccion y ausencia total di un proposito comun y un guia nacional.

Pero amigonan, den tur nos tristesa, desapunto y dolor ta scondi e fuente di nos forza y determinacion pa trece cambio. Aruba mester di un direccion nobo urgentemente. Nos mester retorna confiansa den nos systema politico cu un renovacion di pensamento y direccion. Gobernacion mester bira atrobe un manehador integro y responsabel di nos recursonan, un cumplidor cabal di su tareanan, un inspiracion y catilasador pa ideanan nobo, un wardador confiable di nos futuro y di nos imagen den exterior.

E pilarnan di sociedad, e famia, e bario, e iglecia, e school, comisionnan di majornan, e gruponan voluntario social y deportvo mester haya banda di e estado y mercado un rol central, nan espacio, nan estimulo, nan sosten ..pa nan por juda carga responsabildad den direccion di nos pais y garantisa un desaroyo equilibra, sano y feliz.

Nos mester duna bek e oportunidad na un famia pa ta un famia, cu un balansa husto den momentonan di trabao, momentonan di educacion, momentonan di voluntarismo, momentonan di recreo, momentonan di felicidad y union.

Nos mester duna bek e oportunidad na un comunidad pa ta un comunidad, cu e sentido di amistad, orguyo y responsabilidad comparti cu ta duna e forza necesario na calor humano cu ta sostene bida, cu ta duna e seguridad di union bao otro, cu ta duna signigficacion di nos existencia den assosacion y cooperacion uno cu cu otro.

Dirigentenan di nos organisacion politico durante 2006 a forma parti di refleccionan internacional cu lidernan politico, academico, profesionalnan, riba e rol aki di pilarnan di un communidad den carga un pais.Cu e symposio aki nos ta sigui construi e fundeshi pa e vision di un bon comunidad.

Paisnan grandi a modernisa y renova nan systema di gobernacion cu e filosofia comunitarista pa cementa nan desaroyo den un fundeshi mas fuerte di norma y valornan di solidaridad, hermandad, amor pa prohimo y espirito communitario.

Un espirito comunitario cu ta trancende tambe fronteranan. Cu mester ta nos guia tambe den delinea un relacion mas constructivo den Reino Hulandes basa riba metanan comun y den delinea nos relacion cu Union Europeo cu ta ofrece oportunidadnan nobo di desaroyo y marconan di referencia na cual nos por eleva e calidad di bida di nos hendenan.

Aruba tin mester di e vision nobo aki. Un vision cu ta basa riba confiansa cu nos tin den e optimismo cu tin warda den curason di tur nos hendenan sperando e luz di un direccion nobo, un direccion nobo cu ta bai apela riba un estado organisa, un mercado fibrante y un comunidad participativo y integra pa hunto carga e pais aki den un etapa nobo di progreso. E luz di gratitud consistiendo di miles di lineanan invisible di felicidad, amor y respet comparti lo ta e speransa pa e mayan nobo.

Mr. Mike Eman a mustra cu asuntonan di norma y valorna no ta exclusivamente di e ambito individual of priva. Falta di vision por tin consecuencianan grandi pa e comunidad den su totalidad. Un comunidad mester di lidernan cu ta refleha un sentido di guia y proposito, concentrando riba un vision. Partidonan politico ta e conneccion cu ta existi entre e comunidad y e institucionan democratico. Thinktanknan, manera FESCA y institutonan di formacion politico, manera Fundacion Digna Lacle-Herrera ta indispensable pa yuda forma un vision pa un comunidad y lidernan politico pa inspira y carga hunto cu pueblo e caminda pa un bon sociedad.