Durante tratamento di presupuesto 2008 AVP lo presenta un “tegenbegroting” riba e presupuesto di Gabinete Oduber caminda ta corta den gastonan innecesario pa sirbi como “dekkingsmiddelen” pa cubri pa cambio di prioridad den presupuesto di pais Aruba, entre nan revocacion di BBO. Esaki tabata entre otro topico di combersacion entre e lider di AVP, mr. Mike Eman y staatssecretaris Ank Bijleveld na apertura di oficina nobo di representacion di Hulanda na Aruba den fin di siman. Staatssecretaris Bijleveld tabata hopi interesa pa conoce e cambio di rumbo aki y a keda acorda cu e “tegenbegroting” di AVP lo worde poni disponibel pa e ministerio encarga cu asuntonan di Reino. Ta promer vez den historia cu un fraccion ta presenta un presupuesto alternativa.

Ta trata di un alternative cuantifica. Eman a mustra cu fraccion di AVP a scrutina e presupuesto y a haya hopi “postnan” caminda por reduci gasto pa por cubri pa inversionan cu ta necesario den desaroyo social, ensenjansa, infrastructura y promocion di turismo y revocacion di BBO.

Gobierno ta gastando mucho placa na gastonan coriente y inversionnan ta keda atras y Aruba ta worde bendi na findishi. E gastonan coriente ta disproporcionalmente halto compara cu su inversionan. Pesey edificionan, caretera, ensenjansa y asuntonan social y economia ta sufriendo un deteoro.

E tegenbegroting di AVP ta propone pa corta gastonan inecesario cu e fraccion ta menciona specificamente (post pa post) y ta pone e placa disponibel pa pa inversion den cuido social; pa inversion den renovacion y mantencion di schoolnan; den mantencion y renovacion di caretera; den promocion di turismo; mantencion, restaruacion y renovacion di edificionan historico di pais Aruba, manera Bestuurskantoor. Un ehercisio grandi y cambio di maneho fiscal cu AVP su werkgroep a traha riba dje a produci e plataforma financiero pa revoca BBO. E ehercisio ta grandi, pasobra ta bai revoca BBO manteniendo e reduccionan di tarifa den impuesto cu a bin cu BBO. Esaki lo trece un alivio grandi pa pueblo y lo duna inversionistanan confianza atrobe den prioridanan fiscal sano y futuro di Aruba, Eman ta bisa.

Un parti grandi di e recursonan necesario pa haci e reforma presepuestario aki posibel fraccion di AVP a busca den reduccion di gastonan riba postnan den presupuesto y no dor di busca otro entrada adicional pa gobierno cu comunidad tin cu paga. E reduccionan den e cambio di presupuesto 2008 cu fraccion di AVP ta propone ta entre otro den e postnan “Salarissen en Toelagen” (keda sin yena vacaturanan cu ta habri den e resto di anja); Reis-en Verblijfkosten; Telefoon, Fax en Internetkosten; Huurgebouwen; Voorlichting en Promotie (politico di gobernantenan); Deskundig Advies; Overige Uitbestedingen; Overige Kosten.

E lider di oposicion, mr. Mike Eman ta bisa cu ta bisto cu por corta hopi den un anja. Pa no papia mes di centenares di miyones cu por worde reduci den cuater anja cu un maneho eficiente, transparente y cu control di gastonan stringente den e postnan “Salarissen en Toelagen”; “Goederen en Diensten” y “Werkgeversbijdrage”. Desde 2002 Gabinete Oduber a gasta 500 pa 600 miyon extra na postnan: “salarissen en toelagen”, “goederen en diensten” y “werkgeversbijdrage”.

Pa e fraccion berde e presupuest alterantiva aki ta un ehempel cu cos por bai hopi diferente. Pa futuro AVP kier soluciona e problemanan aki na un forma structural y asina ofrece Aruba otro perspectivanan. Ta pesey mes cu partido AVP ta traha cu un cantidad di expertonan tanto local como internacional y tambe su propio institututo cientifico (FESCA) pa yega na solucionnan pa pais Aruba. “Nos ta sigui un procedura solido pa por defini un vision pa e pais aki”. Eman ta haci referencia na tantisimo seminarionan y symposia cu su partido y organonan di conseho a organisa y ta menciona e raportnan y estudionan cu a base di e metodo aki AVP a y ta prepara. Cu e preparacion y e equipo nobo AVP lo deshaci di e desaster cuminsando riba e “day-after” di gabinete Oduber.

A base di e estudionan aki y “brainstorming” amplio ‘Plan Aruba’ a wordo desaroya. Ta pesey cu den un maneho nobo di AVP e situacion ta wordo ataca na nan rais. E vision di AVP ta pa kita e desbalance financiero cu gobierno a causa. E ta pa na un forma bon y dirigi sostene e economia y pa reestablece e confiansa.

Henter e Plan ta basa tambe riba principio cu gobierno no mag di gasta mas cu e ta haya na entrada. Esey kier men: un balanse den presupuesto y un saldo financiero den concordancia cu e inversionnan. E maneho nobo cu AVP ta propne ta dirigi riba trece alivio pa pueblo, stimula inversion den calidad y no cantidad y ta enfoca riba inversion den hende. Eman ta bisa cu e pensamento di restructuracion aki di e forma con ta utilisa e entradanan di pais Aruba ta worde sosteni tambe pa e rapport di “The National Commission on Public Finance (NCPF) “. E no ta simplemente un balance budget, pero con bo ta inverti e recursonan di pais. Eman ta cita NCPF: “how best to limit and control the growth of government current expenditure, the size of government employment and to change the mix of public expenditures”.

Mr. Mike Eman te enfatisa cu e maneho di rescate cu AVP ta ofrece no ta encera solucionnan parcial (pues no temanan los riba un lista di deseo), pero cu e ta ofrece solucionnan total cu ta real, structura y debidamente presupuesta, cu a wordo prepara na un forma profesional, profundo y responsabel. Esaki ta keda demonstra den e “tegenbegroting” di fraccion di AVP y e vision cu ta bin hunto cune.