Den su raport titula “Parlamento di Aruba na caminda pa madures” (De Staten van Aruba op weg naar volwassenheid) e instituto cientifico FESCA a duna un empuhe pa pone henter comunidad refleha riba e funcionamento di democracia parlamentario na Aruba y pa stimula e calidad di e proceso politico, pa amplia esaki ya hasta pa trece esaki riba un nivel mas halto. Lider di AVP, mr. Mike Eman ta bisa cu momentonan importante na unda Parlamento por mustra su valides ta ora cu e ta haci uso di su dos derechonan mas importante: su derecho di presupuesto y su derecho di amienda.

Na 1964 tabata prome bes cu na Hulanda un contra-presupuesto (tegenbegroting) of presupuesto-alternativa a wordo entrega. Cu entrega di e prome contra presupuesto na Aruba fraccion di partido AVP kier no solamente realisa obhetivonan concreto manera hancra den su proposicionnan alternativa pa cu e presupuesto 2008, pero tambe kier crea un precedente pa hisa e nivel di tratamento di presupuesto di Parlamento na unda e solides y e argumentacion substancia di e ideanan fundamental ta bin na prome lugar. Eman ta mustra cu Fundacion Formacion Politico Digna Lacle-Herrera a dedica henter un serie di curso na miembronan di AVP y esnan cu ta interesa hustamente pa a traha riba e conocemento di finanzas publico y e relacion cu Parlamento. Ta for di e refleccionnan aki ta crece e pasonan nobo pa eleva politica na otro nivel, manera ta haci awor cu presentacion di Tegenbegroting 2008.

E lider di AVP, mr. Mike Eman ta bisa cu pa por realisa e papel di controlador cu Parlamento tin, ta necesario pa tin un cierto nivel di dualismo. Tanto e fraccion di gobierno como esnan di oposición mester bira partnernan di discusion maduro y critico di gobierno. Credibilidad di argumento ta worde drecha dor di argumentacionnan cu contenido. Manera e nomber di e sistema - democracia representativo - mes ta bisa, su curason ta wordo forma dor di su representación politico. Un representacion cla ta loke ta wordo spera tambe di e politiconan. Dor di bisa cu bo ta contra un presupuesto no automáticamente ta encera pakico si bo ta na favor. Dor di tin un vision alternativa riba cua escohencianan politico cla por wordo haci y dor di responsabilización e representacion politico ta haya contenido. Meramente vision por lanta e dinamismo den e comunidad cu ta necesario pa por genera e energia colectivo pa por resolve problemanan. Ta esaki e fraccion di AVP ta spera di por stimula tambe cu introduccion di presupuesto alternativa.

E funcionamento di e democracia parlamentario ta wordo respalda ora cu argumentonan ta wordo defendi cu solides y no ora cu di antemano caba e puntonan di bista di e contra partido ta wordo rechasa. Tambe e solides di argumentacion di contra proposicionnan ta atribui na un politica convincente. E yabi pa yega aki ta specialmente un politica contundente, serio, studia y cuantifica dirigi riba bienestar general.

Den su amiendanan amplio y bon argumenta riba e presupuestonan di finansas di 2006 y 2007 e fraccion di AVP a habri caminda pa alcansa un nivel nobo pa un politica di contenido substancia. Cu e presupuesto alternativa 2008 (Tegenbegroting 2008) aki AVP ta trata na eleva esaki mas ainda, cu e meta pa hisa e calidad di democracia parlamentario na Aruba. Trata na forma e mundo rond di nos ta exigi un esfuerso conhunto di comunidad y politica. E ta exigi pa un democracia cu na tempo y na un manera convincente ta pone temanan social riba agenda y cu ta haci posibel pa e asuntonan aki ta wordo atende cu audacia y determinacion.

E funcion di presupesto no ta solamente pa duna e minister autorisacion pa cumpli cu su debernan. E presupuesto ta tambe e refleho financiero di e maneho cu ta bai wordo hiba. Ta meramente e maneho aki ta na unda Parlamento por haci uso di su trabao di controla y eherce su derecho di amienda pa asina, segun deseo di e representante di pueblo, e maneho aki por wordo amienda y hasta fundamentalmente wordo cambia. E presentacion di e Tegenbegroting 2008 ta cuantifica e vision di futuro di e fraccion di AVP. E ta un refleho di e escohencianan di maneho cu segun partido AVP ta esencial pa e cambio di rumbo di pais Aruba.

Corectamente e conseho di “National Commission on Public Finance (NCPF)” ta afirma cu no ta asunto solamente pa tin un presupuesto balansa, pero cu tambe mester tin un balance sano entre gsstonan coriente y inversionnan. E escohencianan di maneho alternativa manera proponi dor di fraccion di AVP den e presupuesto alternativa 2008 ta duna contenido concreto na e recomendacion aki.