Na Aruba, enegria genera for di biento, ta priminti di tin
		un futuro importante, danki na e biento fuerte y stabil.

Ayera mainta partido AVP a convoca un conferencia di prensa extra-ordinario pa anuncia nan entrada den era nobo di energia alternativo. Mirando cu e ultimo añanan prijs di crudo, cu ta determina prijs di awa y coriente entre otro, hopi a papia cu mester promove energia alternativo den nos comunidad, pero nada ta wordo hasi. E opinion di e partido ta cu nan vision no mester keda na palabra so. Accion ta mas importante cu djies bisa cu bo lo hasi algo. Mike Eman na nomber di e partido a splica cu nan lo adkiri un wind-charger for di un compania local, Gianda Imports & Exports, cu pa hopi tempo caba ta distribuidor, agente y promotor di e tipo di technologia aki. Representante di e compania, Gilbert Arends tambe tabata presente y a splica cu e tipo di technologia aki ta algo cu na Aruba mester tene bon cuenta cu ne mirando e costo di bida na Aruba. Sr. Arends, den comunidad conosi bou di e nomber Skerre, a mustra cu mirando cu costo di bida ta birando dia pa dia mas pisa pa tur hende, ta bira hopi importante pa consientisa un y tur ariba e technologia aki y con hopi por spaar usando e technologia aki, si tene na cuenta e biento stabil y fuerte cu nos ta goza di dje na Aruba.

Mike Eman a sigui splica cu AVP lo hasi uso di e wind-charger modelo “WHISPER-200” aki pa sende un kerstboom pa temporada di pasco y tambe juda un bisiña humilde cu coriente. E cas aki ta keda serca di Cas di Partido na Playa y e meta di e partido ta pa baha e presion di costo di coriente pa e famia aki. Mike Eman y Skerre Arends, a sigui pa firmamento di e acuerdo pa adkicion di e Wind-Charger pa asina e molina wordo instala dentro di poco.

Mike de Meza, parlamentario di AVP, pero tambe un experto ariba e technologia di generacion di energia, a splica cu e meta di e entrada di partido den e area aki, mester bira un punto di consientisacion ariba e hecho cu nos no mester keda pega den un technologia djies pasobra cu nos no kier purba otro technologia. Sr. de Meza a sigui splica cu pa genera awa y coriente, no tin mester di depende unicamente riba e tipo di fuel cu ta usa na e momentonan aki. E la menciona algun ehempel di otro tipo di technologianan cu por hasi e mesun trabou, pero na un costo hopi mas abou. “Pet-Coke” y “Pitch” ta algun di e ehempelnan cu e la menciona, banda di energia di biento.

Tambe Sr. de Meza a splica cu e realidad di $100 pa bari di crudo, ta algo cu nos lo no scapa di dje mas. Y nos mester tin suficiente vision pa por hiba Aruba den un futuro energetico responsabel y stabil. Esey tambe, segun sr. Mike de Meza, ta e meta di e “Comision di Energia” di AVP cu a wordo institui aña pasa. E comision di energia, a traha un plan di energia pa AVP y na su turno e partido berde a presenta esaki den parlamento. E tempo ey pa falta di vision, partido MEP a disidi di kita e plan energetico for di mesa, bou instruccion di Nel Oduber. Awe un y tur por ta testigo con e vision di AVP ta wordo usa pa e mesun partido MEP cu atrobe ta den un preta pa motibo di nan falta di vision.