Pa basta dia tin un situacion na hospital basta preocupante caminda cu tin hopi trahador cu a haya un carta cu ta bisa cu eventualmente nan lo haya nan retiro y otro grupo di trahador cu a wordo kita for di nan funcion, mi tin un preocupacion sumamente grandi pa cu e desaroyo aki, pasobra e necesidad pa cuido na Aruba a aumenta drasticamente y e calidad y cantidad di cuido a bira menos bao di responsabilidad di Minister Booshi Wever.

Si tene na cuenta cu ta papiando di un ahoro di 2 miyon florin y pa esaki lo mester kita un cantidad di trahador for di hospital den cuadro di un reorganizacion, mi ta puntra mi mes si e calidad y e cantidad di cuido cu ta wordo duna ta keda garantiza. Impresion ta cu e calidad y mas ainda e cantidad di cuido medico cu mester wordo duna na Aruba no ta bai lo bira menos den e añanan cu ta bin.

Prioridad di Gobierno ta pa corta gasto den forma drastico, y ta mira cu hospital ta canando e mesun caminda cu gobierno ta dicta na e momentonan aki y esey lo nifica cu lo yega un momento cu pueblo no lo tin suficiente cuido. E momento ey a yega caba pa loke ta cuido pafor di hospital, Wit Gele Kruis tin lista di espera hopi largo. Hospital te na e momentonan aki por a brinda suficiente cuido. Si gobierno ta sostenen y den cierto sentido por medio di AZV ta pone precion pa corta den gasto di Hospital. E pregunta ta lanta si ta kita trahadornan di hospital, dicon no tabatin un plan integral pa cuido na Aruba caminda cu mirando cu falta un cantidad di persona pa duna cuido na cas, pa yega na un forma cu lo por traslada parti di esnan cu ta saliendo for di hospital pa cuido na cas.

Igualmente ta menciona ta visto un falta di maneho total pa loke ta trata cuido na Aruba y esaki ta responsabilidad di Gobierno y mi ta spera cu Minister di Salubridad Publico bin duna cuenta di con por ta posibel cu na e momentonan aki cu hopi hende ta bisa cu nan no por haya suficiente cuido, ta kita profesionalnan y no ta haci uso di nan den otro sector. Pa loke ta hospital, mi ta critica e forma con hospital ta haciendo e reorganizacion aki. Mi ta reconose cu tur organisacion tin e libertad pa hiba su maneho di personal y interno, pero como parlamentarionan di Aruba nos tin e responsabilidad tambe pa wak pa cos cana bon y pa cos bai na interes di comunidad den su totalidad, pero tambe di e trahadornan den e caso aki. Mi ta constata cu hospital ta bruhando algun cos door di otro. Den mi concepto, tin un grupo di trahador cu hospital lo kier saca for di hospital, pasobra nan lo por tin problema cu nan y hospital ta haciendo mal uso di e reorganisacion pa sacanan, creando e impresion e ora serca e otro trahadornan cu a nan tambe no lo ta na agrado di hospital.