AVP - CRISTIAN DEMOCRATA ARUBA
   
30 di November: Prome aniversario di marcha contra BBO
"BBO TA BAY! HUNTO CU E GOBIERNO AKI, BBO LO BAY"
Lider di Partido di Pueblo Arubano AVP desicivo, determina y fuerte
Home > Centro di Prensa > Noticia > 20071130
 

Diabierna ultimo, Partido di Pueblo Arubano, AVP a jama un conferencia di prensa extra-ordinario. E conferencia di prensa aki ta precisamente ariba e aniversario di e marcha contra BBO un aña pasa. E lugar di e conferencia ta uno special. Un cas di un famia cu ta pasando temponan hopi duro pa motibo di BBO. E cas aki ta di famia di Sra. Wouters na Noord.

Mike Eman a cuminsa e conferencia di prensa resumiendo e cantidad di organisacion, instancia y gremionan cu a adverti gobierno di MEP ariba e efectonan desastroso cu BBO lo tin ariba nos economia y en particular riba esnan economicamente mas vulnerabel den nos pais. Entre e grupo cu a adverti gobierno di e problemanan cu awe nos ta sinti, ta Banco Central, Raad van Advies, Algemene Rekenkamer, SER (Sociaal Economische Raad), gremionan sindical y comercial y un cantidad di otro instancia y organisacionan mas. "Hunto cu e gobierno aki, BBO lo bay!” tabata palabranan fuerte y determina di sr. Mike Eman.

Ta tristo pa bisa, pero e palabranan na Ingles ta bisa hopi: "I told you so!" Gobierno di MEP, contra tur conseho y regla, a disidi di cueste loke cueste, cu mester pasa e BBO. E problema cu BBO no ta simplemente cu e la wordo impone cu 3%, pero manera un y tur ta conciente di dje, e ta aplicabel ariba tur schakel den e linja di distribucion di productonan. Ta esaki ta loke ta hasi cu prijs di combestibel ta asina halto awe: e multipier effect di BBO!

Loke nos mester ta conciente di dje como ciudadano di Aruba, ta e hecho cu, banda di e cantidad di cifranan, e sufrimento di esnan mas vulnerabel den nos sociedad ta alarmante. Famianan ta haya nan mes ta hasi escohencianan dificil pa motibo di BBO. Jiunan ta kita for di scol pa juda nan famia of famianan ta keda sin paga coriente e luna aki pa por cumpra cuminda. Esaki ta djies algun ehempel di situacionan serio cu hopi ciudadano ta hinca aden. Mas alarmante ainda ta loke ta pasa cu muchanan cu tin edad di bay scol. Pa simanan largo nan ta bay scol sin pan of cos di bebe, pasobra esey a bira practicamente un luho.
Un bisiña di e cas caminda partido AVP a tene su conferencia di prensa, un Sra. pensionado ta ehempel bibo di hopi otro pensionadonan cu ta hiba un existencia dificil e ultimo aña aki. Sra. Webb, di 75 aña di edad ta biba di un pension di 900 florin pa luna como pensionado soltera. For di esaki e tin di paga 256 florin pa su cas, 53 florin pa awa y 104 florin pa coriente. Paracticamente e tres gastonan aki ta kita mitar di su entrada (900 florin) y ainda no a inclui cuminda, paña, transporte y tampoco telefon den e calculacion. E realidad pa pensionadonan di awendia ta hopi serio, pero pa pensionadonan cu ta nan so, e situacion ta hopi mas precario.
Na cas di sra. Wouters, anfitrion di e conferencia di prensa di AVP e situacion ta hopi mas serio. Sra. Wouters ta mama di 2 jiu cu ta bay scol y ta biba na cas. E no tin trabou y e ta un mama soltera. Su onderstand, como cabes di cas, ta di 325 florin. Pa motibo cu e jiunan ta di edad di scol, nan ta haya cada uno 140 florin. E total di entrada pa e famia di 3, ta acumula na 605 florin. Esaki ta algo sumamente indignante den un comunidad manera Aruba. Pa motibo di e BBO, e situacion di e famia aki ta birando dia pa dia mas dificil. Y tur esaki ta trece cu ne presionan emocional y personal pa e famia.
Un otro bisiña den Semeleerstraat ta sra. Wathey cu a perde su trabou y e tin 59 aña di edad. E señora aki cu tur su perseverancia a purba y purba, pero considerando su edad, e no por haya trabou. Cu hopi reservacion e ta mira onderstand, pero e presion ta demasiado pa e sigui den e situacion cu e ta na e momentonan aki. Su jiu cu tabata bay scol na EPI (Educasion Profesional Intermedio) a scohe pa kita for di scol pa por juda su mama. Asina e famia ta manteniendo su mes den e situacion dificil aki. E presion economico di BBO, ta resulta den un hoben mas cu ta laga su estudio, pa motibo cu e presion economico pa e keda scol ta demasiado grandi. Y segun estadisticanan, e caso aki no ta un excepcion.
E dañonan social cu BBO ta causando ta irreparabel den hopi di e casonan aki. BBO no tabata y nunca lo ta un solucion pa un gobierno hambra pa placa, pasobra ora cu e placa cu BBO genera no ta suficiente mas, lo simplemente hisa BBO. E direccion cu Aruba mester tuma awor ta uno financieramente responsabel y visionario. Pesey mes Partido AVP ta introduci otro siman e presupuesto alternativa. Den e presupuesto aki, partido AVP, lo mustra con por maneha nos pais na un manera responsabel y na e mesun tempo elimina BBO.
Segun Mike Eman, BBO lo wordo elimina den dos stap. E prome aña lo baha e BBO te na 1.5%, y e aña despues lo elimine por completo. Henter e ehersicio aki no ta algo cu lo cai for di cielo. Den un manera detaya y serio, e partido a investiga cifranan di entrada y gastonan di gobierno y pone prioridadnan caminda nan mester ta.
Gabinete Oduber, for di inicio di nan gobernacion a enfoca riba e fenomeno di "Family & Friends". Aki por pensa riba huurmento di edificionan for di tur proporcion for di famia y amigonan jegá na ministernan di MEP. Algun ehempel ta e tantisimo edificionan na huur den Vondellaan cu ta propiedad di ruman di un minister di MEP. Un otro ehempel ta e huur exorbitantemente halto pa "Hotel Central". Esakinan ta djies algun, di un cantidad grandi, di e edificionan di famia y amigo, cu gabinete Oduber ta gasta un porcion grandi di entrada di pais Aruba ariba nan. E ultimo 6 añanan, gabinete Oduber a hinca mas di 2000 hende den e aparato gubernamental. E influx di hendenan aki a hasi Aruba e pais cu tin mas hende den gobierno si compare cu henter Antiyas. Henter Antiyas, na nivel di "eiland" y "land" hunto, tin menos hende ta traha den gobierno cu Aruba so!
Segun Mike Eman, "e presupuesto alternativa lo bira testimonio di e compromiso cu AVP tin cu pueblo."
 
 

top