Parlementario di AVP, Benny Sevinger, den conferencia di prensa extra-ordinario di AVP na Semeleerstraat na Noord, a cuminsa pa enfatisa e compromiso di su partido pa kita BBO. Segun Sevinger, e subida di prijsnan aki na Aruba a subi prome cu BBO caba. Loke BBO a hasi, ta caba di hasi e situacion tristo den un situacion hopi precario. Sevinger a enfatisa cu prome cu BBO, gabinete Oduber a bin ta hisa tur sorto di prijs. Aki e parlamentario ta corda ariba accijnzen y invoerrechten cu a wordo hisa. Dunando algun ehempel mas specifico, sr. Sevinger a sigui splica cu un papel cu den pasado tabata costa 1 florin na bevolking, awe ta costa 5 florin. Paspoort, cu tabata costa 40 florin, awe

a surpasa 100 florin. Cedula, segun sr. Sevinger ta un otro ehempel indicativo di e manera si traha di gabinete Oduber. Cedula cu tabata costa 10 florin, awe ta mas di 40 florin. Tur e tipo di aumento di prijsnan aki ta refleha den prijsnan di otro productonan. Tin cu tene na cuenta cu e aumento di prijsnan aki ta di 400% te na 500%!

Awe, cu gabinete Oduber a pone BBO di 3%, nan kier culpa entre otro e comerciantenan di ta abusa. Segun sr. Sevinger, e abusador di mas grandi pa cu placa di pueblo, ta gobierno di MEP. Y si tene na cuenta cu a impone e 3% di BBO, den un systema di schakels, por compronde ta con prijsnan di tur comestible y tur otro producto a subi di e manera cu nan a subi. BBO ta e causa principal, si no ta e unico causa di e inflacion cu nos pueblo ta sufriendo di dje na e momentonan aki. Sr. Sevinger a mustra, cu un bleki di lechi den man, con e prijs di e producto importante pa muchanan a subi pa motibo di BBO. E bleki aki cu den pasado tabata costa fls. 20.40 prome cu introduccion di BBO, awe ta costa fls.31.44. Esaki ta un subida di 50%.

Sr. Sevinger ta mustra cu aunke BBO ta 3%, e ta hasi un efecto hopi grandi ariba e prijs te cu awe tin algun prijs a aumenta cu 50%. E gobierno aki, den un maneho ad hoc, no a compronde kiko e efecto di schakelnan, den distribucion di productonan, tin ariba prijsnan. Pero no ta esey so. Mester tene na cuenta cu BBO ta wordo cobra ariba tur cos. Te hasta e servicio di security cu e companianan mester, tambe mester paga BBO. E accountant cu tambe tin di paga BBO, tambe tin di cobra esaki na e compania cu ta distribui su productonan aki na Aruba. E abogado ta den servicio di e compania. Pero no mester lubida cu te hasta productonan di oficina manera papel tambe tin di paga BBO. Tur e aumentonan aki, awe ta causa cu costo di bida a bira asina halto. Y no mester perde for di bista, segun parlamentario Benny Sevinger cu tur e aumentonan aki ta bay directamente den saco di gobierno. Gobierno a saca mas di 150 miyon di florin for di economia y di pueblo di Aruba.

Otro ehempelnan cu sr. Sevinger a mustra riba nan ta kipashi di pan, azeta di cushina, aroz y fruta. Un kipashi di pan cu na 2001 tabata costa 1.90, awe ta costa 2.50, un subida di mas di 30%. Y aki ta papia di un producto di primera necesidad. Gobierno ta hasi como si fuera cu ariba algun di e productonan aki no tin BBO, pero e ta tristo pa mira con prijs di azeta pa cushina a subi di 9 florin pa casi 12 florin. Y asina por keda duna ehempel tras di ehempel di e tipo di aumentonan aki. Y mester tene cuenta aki cu e productonan aki ta productonan basico pa famianan por sobrevivi.