AVP - CRISTIAN DEMOCRATA ARUBA
   
Presupuesto Alternativa 2008 di Fraccion di AVP:
REDUCCION DEN GASTONAN CORIENTE DI GOBIERNO TA POSIBEL
Home > Centro di Prensa > Noticia > 20071208

Durante tratamento di Presupuesto di Finansas y Asuntonan Economico 2008 ariba 11 december 2007, Fraccion di AVP lo entrega un Presupuesto Alternativa 2008. Cu e Presupuesto Alternativa AVP ta propone cambio drastico den e structura di e presupuesto. Ta corta den gastonan coriente pa usa e placa cu ta bin liber pa hasi inversion necesario den educacion di nos muchanan, den nos infrastructuranan economico manera nos careteranan, nos centro di ciudad y den nos waf, y pa juda gruponan vulnerabel den nos comunidad pa mantene nan poder di compra. Cu e cambio den structura di gasto ta hasta realisa un reduccion considerabel di prestamonan necesario, e asina jama financieringsbehoefte, pa cubri gastonan di e aparato gubernamental.

Base di e cortamento den e presupuesto di Gobierno ta e posicion di AVP cu no por sigui aumenta entradanan di gobierno a costo di nos comunidad, mientras cu tin alternativa. Pa e motibo aki ta propone pa kita BBO, mientras cu ta reconsidera e grandura y costo actual di e aparato gubernamental. Cu un bon maneho, e aparato gubernamental por ta mas chikito y menos costoso, y sigur hasta mas eficiente. Un aparato gubernamental menos costoso ta resulta den mas entrada disponibel pa hogarnan y empresanan cu por ser aloca pa consumo, spaar y pa inversion. Esaki lo stimula nos economia den un forma positivo.
Cortamento di gastonan mester tuma lugar na un manera responsabel y no mag di afecta e bedrijfsvoering di e aparato gubernamental den un forma negativo. Den liña grandi AVP ta propone den su Presupuesto Alternativa pa corta den e siguiente postnan:
•  

Gastonan di personal ta reduci cu Afl. 19 mln florin. Ta trata aki di gastonan mas halto di Gobierno. Pa por realisa y mantene un balanced budget ta essencial pa corta den e gastonan di personal. Mediante mehoracion di e bedrijfsprocessen den e aparato gubernamental, cual ta den liña cu e projecto di kerntakenanalyse, y aplicando e maneho actual di personeelsstop na un manera mas serio, ta logra reduci e necesidad pa mas personal den e aparato gubernamental. Di e forma aki ta reduci un parti importante di e gastonan di personal. Usando e pool existente di empleadonan publico pa jena cuponan cu ta bini liber a consequencia di natuurlijk verloop, manera pensioen, of vrijwillige uit diensttreding, etc. ta hasta crea mas eficiencia den e aparato gubernamental, usando optimalmente e recurso humano di e aparato. E cambio di maneho mester ta refleha den e posicion cu Gobierno ta exigi tegenprestatie pa trabou na lugar di entrada fijo. E cortameno den gastonan di personal cu 5 porciento ta trece un reduccion automatico di 2,5 porciento den gastonan coriente di operación di e aparato gubernamental.

     
•  

Gastonan di operación (goederen en diensten) pa 2008 ta ser reduci cu Afl. 15 mln, y ta trece esaki na e nivel di e typo di gastonan aki den aña presupuestario 2007. Esaki ta den liña di locual e Comicion Nacional pa Finansas Publicas a prescribi, esta un crecimento maximo di 2 porciento. Den cuadro di esaki ta corta ariba e sigiuente postnan:

     
   
•  

Huur di edificionan: Gobierno no tin un maneho pa cu espacio pa ubica su servicionan. Mientras costonan totaal di huur na 2005 tabata Afl 14,1 mln, pa 2008 e costonan aki ta subi te na Afl. 22 mln. Esaki ta un aumento di 48 porciento den 4 anja di tempo, equivalente na un promedio di Afl. 1.7 mln extra pa anja durante e periodo en cuestion. E crecimento den e cantidad di empleadonan den e aparato gubernamental sigur no ta hustifica e aumento aki. Tin suficiente espacio pa corta gasto y lo exigi di e minister pa desaroya y ehecuta un maneho di huur mas transparente.
     
•  

Reis- en verblijfkosten: E gastonan aki ta Afl. 2,6 mln pa 2008. Pa realisa e metanan di e ombuiging ainda tin espacio den e postnan di dienstreizen bou di e diferente Bureaunan di Minister pa corta gasto di dienstreizen.
     
•  

E post di Deskundig advies ta aumenta cu Afl 3 mln pa 2008,jegando un total di Afl 11 mln. Esaki ta un aumento for di proporcion si considera cu e aparato gubernamental mes tin suficiente expertonan den cas, y considerando cu Gobierno kier realisa un presupuesto balansa pa 2009.
     
•   Gastonan di Electricidad ta aumentando pa tur hende, y tambe pa Gobierno. Pa 2008 a presupuesta un suma di Afl. 14 mln florin pa gastonan di electricidad. Si inverti Afl. 500.000, = den material pa bespaar coriente, manera bombiyonan economico, timers pa airco, etc y atende personal ariba uso conciente di coriente, por duna un bon ehempel na comunidad y bespaar Afl. 1 mln. ariba costonan di electricidad. Di e manera aki Gobierno lo ta prepara pa posibel futuro aumento den costonan di electricidad.
     
•  

Yamadanan pa cellular. Si restigi yamadanan pa celular na uso di trabou so, y centralisa e yamadanan aki den puntonan central, servicionan di Gobierno por realisa un besparing di 25 porciento den costonan di yamadanan di telefon. E accion aki naturalmente no ta aplicable pa servicionan di gobierno manera “911” y otronan semehante. Cu e accion aki por baha e gasto di telefon di Afl. 5,7 mln actualmente pa alrededor di Afl. 4 mln na 2008.
     
•  

Voorlichting en promotie: gastonan di Public Relations di gobierno ta keda na e nivel di Afl. 30 mln na 2008. For di e post aki AVP ta propone pa reduci gastonan. en particular bou di e diferente Bureaunan di Minister.
   

 
Cu tur e puntonan menciona, lo realisa un reduccion considerabel di gasto di alrededor di Afl. 38 mln, creando asina suficiente espacio pa inversionnan necesario y reduciendo e nivel di prestamo, e financieringsbehoefte, pa cubri gastonan di e aparato gubernamental. Cu e alternativa aki AVP kier concientisa ariba e rumbo negativo cu gastonan di e aparato gubenamental ta tumando, y demonstrando cu tin alternativanan pa e rumbo aki.
 
 

top