AVP - CRISTIAN DEMOCRATA ARUBA
   
Un splicacion di e presupuesto Alternativa 2008
INTRODUCCION DI E INICIATIVA DI PRESUPUESTO ALTERNATIVA
Home > Centro di Prensa > Noticia > 20071209

Den su raport titula “Parlamento di Aruba na caminda pa madures” (De Staten van Aruba op weg naar volwassenheid) e instituto cientifico FESCA a duna un empuhe pa pone henter comunidad refleha riba e funcionamento di democracia parlamentario na Aruba y pa stimula e calidad di e proceso politico, pa amplia esaki ya hasta pa trece esaki riba un nivel mas halto.
 
 

Click aki pa Download!

Momentonan importante na unda Parlamento por mustra su valides ta ora cu e ta haci uso di su dos derechonan mas importante: su derecho di presupuesto y su derecho di amienda. Na 1964 tabata prome bes cu na Hulanda un "tegen-begroting" a wordo entrega. Cu entrega di e prome  presupuesto alternativa aki, fraccion di partido AVP kier no solamente realisa obhetivonan concreto manera hancra den su proposicionnan alternativa pa cu e presupuesto 2008, pero tambe kier crea un precedente pa hisa e nivel di tratamento di presupuesto di Parlamento na unda e solides y e argumentacion di e ideanan fundamental ta bin na prome lugar.

Pa por realisa e papel di controlador cu Parlamento tin, ta necesario pa tin un cierto nivel di dualismo. Tanto e fraccion di gobierno como esnan di oposición mester bira partnernan di discusion maduro y critico di gobierno. Fraccionnan di oposición ni di gobierno ta sirbi e interes general si nan keda pega den un esfera di desconfiansa y polarisacion cu ta mancha e confiansa den politica. Un credibilidad cu ta menguando mester wordo drecha dor di argumentacionnan cu contenido. No dor di trata na desvia problemanan social difícil, pero juist dor di atende nan na un forma skerpi y honesto y dor di bin cu contestanan contundente. Manera e nomber di e sistema - democracia representativo - mes ta bisa, su curason ta wordo forma dor di su representación politico. Un representacion cla ta loke ta wordo verwacht tambe di e politiconan. Dor di bisa cu bo ta contra un presupuesto no automáticamente ta encera pakico si bo ta voor. Dor di tin un vision alternativa riba cua escohencianan politico cla por wordo haci y dor di responsabilización e representacion politico ta haya contenido. Meramente vision por lanta e dinamismo den e comunidad cu ta necesario pa por genera e energia colectivo pa por resolve problemanan.

Un estado ta un instituto den cua e poblacion ta organisa y realisa su mes ariba e linja di derecho. E mision politico di e estado ta pa tin seguridad y pa promove interes general, e asuna yama “bonum commune”. Pa un parti esaki at wordo haci dor di iniciativa tanto particular como conhunto y na unda na necesario dor di gobierno y Parlamento. Gobierno y Parlamento tin poder. E poder ey te cierto sentido ta e abilidad pa actua hunto den realisacion di interes general. Esaki ta rekeri si pa tin un comunidad (estado) politico den cua e sociedad ta sinti cu e tin un afinidad cu ne. Afinidad ta crucial den esaki. Pa por mantene e afinidad aki ta necesario pa e institutonan di gobierno ta funcion bon. E yabi pa yega aki nan ta specialmente un politica contundente.
E funcionamento di e democracia parlamentario ta wordo respalda ora cu argumentonan ta wordo defende cu solides y no ora cu di antemano caba e puntonan di bista di e contra partido ta wordo rechasa. Tambe e solides di argumentacion di presupuesto alternativanan ta atribui na un politica convincente. Den su amiendanan amplio y bon argumenta riba e presupuestonan di finansas di 2006 y 2007 e fraccion di AVP a habri caminda pa yega na un politica convincente. Cu e presupuesto alternativa 2008 aki AVP ta trata na eleva esaki mas ainda, cu e meta pa hisa e calidad di democracia parlamentario na Aruba. Trata na forma e mundo rond di nos ta exigi un esfuerso conhunto di comunidad y politica. E ta exigi pa un democracia cu na tempo y na un manera convincente ta pone temanan social riba agenda y cu ta haci posibel pa e asuntonan aki ta wordo atende cu audacia y determinacion.
E funcion di presupesto no ta solamente pa duna e minister autorisacion pa cumpli cu cu su debernan. E presupuesto ta tambe e refleho financiero di e maneho cu ta bai wordo hiba. Ta meramente e maneho aki ta na unda Parlamento por haci uso di su trabao di controla y eherce su derecho di amienda pa asina, segun deseo di e representante di pueblo, e maneho aki por wordo amienda y hasta fundamentalmente wordo cambia. E presentacion di e presupuesto alternativa 2008 ta cuantifica e vision di futuro di su entregantenan. E presupuesto alternativa aki ta un refleho di e escohencianan di maneho cu segun partido AVP ta esencial pa e cambio di rumbo di pais Aruba.
Presupuesto Alternativa 2008
Corectamente e conseho di “National Commission on Public Finance (NCPF)” ta afirma cu no asunto solamente pa tin un presupuesto balansa, pero cu tambe mester tin un balance sano entre gsstonan coriente y inversionnan. E escohencianan di maneho alternativa manera propone dor di fraccion di AVP den e presupuesto alternativa 2008 ta duna contenido concreto na e recomendacion aki.
 
 

top