AVP - CRISTIAN DEMOCRATA ARUBA
   
ENTREGA DI PRESUPUESTO ALTERNATIVA
AVP: MESTER Y POR OTRO
Home > Centro di Prensa > Noticia > 20071211

E presupuesto alternativa cu AVP a entrega na Parlamento ta un refleho di e escohencianan di maneho cu segun fraccion di AVP ta esencial pa futuro di pais Aruba. E fraccion berde a papia cu partnernan social encuanto su presupuesto alternativa. A papia cu e sindicatonan den uinion, e organisacion di dunadornan di trabao ATIA, Camara di Comercio y bloque sindical. E prioridadnan di e presupuesto alternativa ta: miho enseñansa, un gobierno menos grandi, un infrastructura mas fuerte, rebaho di gastonan na un forma structura (drecha e poder di compra) y un rebaho di interes. Den total e presupuesto di partido AVP por percura pa un realocacion di 185 miyon. Esaki na interes di inversion den comunidad, pueblo y pais. Fraccion di AVP ta haya cu e gastonan di e e presupuesto proyecta di 2008 di gobierno ta muestra di un maneho pober. “Den nos presupuesto alternativa nos ta haci un reduccion grandi di gasto, pasobra den e presupuesto proyecta di gobierno ningun caminda cuenta ta wordo teni cu mantencion di prosperidad di e pueblo di Aruba y e necesidadnan di e comunidad aki”, asina lider di fraccion di AVP Mike Eman a declara.
Presidente di parlamento di Aruba, drs. Mervin Wyatt-Ras, acceptando e presupuesto
alternativo 2008, "Mester y por otro!" for di man lider di fraccion di AVP, Mike Eman.

Un maneho revisa

E inversionnan di pais Aruba den infrastructura y enseñansa ta loke mester wordo aumenta na un nivel aceptabel di 5% BBP. Segun e presupuesto alternativa di AVP e desaroyo di Aruba ta exigi un coreccion di inversion di tanto infrastructura fisico como capital humano. E ultimo añanan e inversionnan tabata hasta insuficiente pa drecha y traha caminda nobo, edificionan di scol y otro activa fiho.

Tambe masha poco a wordo inverti den promocion di turismo di Aruba, conocimento y educacion pa nos yiunan y di e pueblo trahado.

E infrastructura publico di nos economia a haya un restraso grandi. Esaki a haci Aruba innecesariamente caro pa e industria turistico. E contesta di gobierno pa bende propiedad publico, manera edificionan di gobierno y partinan di waf, AVP ta rechasa tambe pa motibonan economico. E no ta solamente mas caro, pero ta caba den futuro tambe cu placanan di waf si Royal Caribbean mescos cu na Haiti haya e opcion pa cumpra parti di waf. E efecto negativo di e gastonan di Oranjestad ni a wordo conta aden ainda. Gran mayoria di inversionnan cu a wordo haci a cana via FDA, un fondo cu placa di tanto Aruba como Hulanda.
Den un maneho exitoso e prome cos cu mester wordo haci ta pone un paro na benta di propiedadnan publico y mester drecha e retraso den inversionnan, tanto esnan di e infrastructura fisico, como esnan di e economia di conocimento y enseñansa, asina e lider di AVP ta bisa. Esaki mester pone Aruba bek riba un trayecto di un fase nobo di desaroyo socio-economico. Entreganten di e presupuesto alternativa aki ta duna di forma aki den e presupuesto un comienso den direccion di un maneho exitoso cu mester wordo incorpora den e maneho di presupuesto di pais Aruba. E cifranan di presupuesto ta mustra hopi cla cu e problemanan di e deficit financiero no ta bin dor di un entrada insuficiente, cu al final de cuenta ta subi tur aña, pero ta wordo causa dor di gastonan enorme di e aparato gubernamental. Dor di gastonan coriente por saca un solo conclusión, e gobierno a hisa tur sorto di belasting y despues a usa e entrada netto di BBO den 2007 pa financia e gastonan di gobierno. Pa e escohencia di gobierno pa nombra mas hende den e aparato gubernamental, belasting di BBP a subi cu un extra 100 miyon florin.
Aumento di inversion y e pago corespondiente
Meta principal di e amienda adhunto ta pa aumenta e inversionnan den enseñansa, infrastrucura, turismo, promocion y e mantencion di un bida digno. Pa por logra e meta aki cu un balanced budget suscritonan a bin cu proposicionnan di austeridad pa trece cambio den e presupuesto proyecta di gobierno pa 2008. E economisacionnan aki ta necesario tambe pa por elimina BBO, basa riba un presupuesto balansa y un financiamento responsabel. A pesar di e hecho cu partido AVP ta na fabor di un cambio di belasting directo pa indirecto - e efecto cumulativo y e daño cu BBO ta trece cu ne na e infrastructura economico - ta duna AVP e extra empuhe pa elimina BBO.

BBO ta causante di e inflacion na Aruba durante 2007. Esaki ta 7.3% den e periodo januari-october 2007. Compara cu 2.3% durante e mesun periodo na 2006. Tambe e gastonan di administración di empresanan a subi grandemente a consecuencia di e introduccion di BBO. Den e presupuesto alternativa aki fraccion di AVP ta crea e espacio pa entrante 2008 den dos aña di tempo pa elimina gradualmente BBO. E rebaho di tarifanan di inkomsten- y loonbelasting y esun di winstbelasting lo keda manera cu e ta awor. Den esey lo no bin cambio. Fraccion di AVP ta mantene pues e reduccion compensatorio cu hunto cu BBO a keda introduci, tambe e aumento di salario minimo.

Despues di acepta e presupuesto alternativa aki pa 2008, lo traha uno tambe pa 2009. Esaki pa asina haci posibel pa por caba di aboli e BBO den un presupuesto balansa. E eliminación di BBO den dos aña di tempo ta duna e empresarionan seguridad con pa fiha nan prijsnan y esaki lo tin como consecuencia cu prijsnan lo keda na un forma modera. Inflacion di 2007 lo sigui bai dor den 2008, pasobra aumento di prijs ta wordo paga dor di e cliente y dor di esaki e tin un efecto di tardansa. Si no elimina BBO e inflacion den 2008 lo subi cu 4% mas. Eliminacion di BBO entrante 1 di januari 2008 lo percura pa e inflacion lo subi cu 2% menos. Esaki lo tin un efecto faborabel riba e poder di compra den 2008 di 2%. E beneficio aki pa tur Arubiano por wordo traduci den 60 miyon florin.

E cambionan ta encera austeridad cu ta wordo haci den tur ministerio pa por paga e aumento di inversionnan riba e presupuesto. Tambe e “National Commission on Public Finance” a enfatisa e necesidad pa trece cambio den e gastonan enorme den e aparato gubernamtal y pa trece cambio den e relacion di gastonan na fabor di inversionnan, asina Mike Eman a finalisa bisando.
 
 

top