Educacion ta un prioridad den programa di Partido AVP. Mediante bon educacion nos ta prepara nos juinan pa tuma e responsabilidad over di e generacion actual pa continua na construi y conserva nos Pais pa e siguiente generacion. E Presupuesto Alternativa 2008 di AVP ta refleha e importancia cu nos partido ta duna na educacion. A pesar cu e Presupuesto Alternativa 2008 no a hanja e sostén necesario durante tratamento den Parlamento, ta bon pa vocifera e ideanan tras di e presupuesto alternativa aki.

Enseñansa na Aruba actualmente ta pasando door di temponan dificil. Hopi edificionan di scol ta den un estado hopi malo pa falta di mantencion. Daknan ta lek, toiletnan cu no ta funciona, instalacion di coriente bieu of cu no tin suficiente capacidad pa e necesidad actual, y hopi otro deficiencia mas na e edificionan di scol. Na banda por mira con klasnan grandi ta impedi e guia y atencion necesario di maestronan pa nan alumno. Tambe ta constata con falta di suficiente material y fondonan ta stroba e operación di scolnan.

Fraccion di AVP, mediante e Presupuesto Alternativa, ta intensiva fondonan pa educacion cu Afl. 12,1 mln den 2008. Educacion ta e area cu ta ricibi mas fondonan extra den e Presupuesto Alternativa. Ta aloca Afl. 5 mln extra na drechamento di edificionan di scol. Cu e fondonan aki ta duna inicio na reparacionnan necesario di diferente edificionan di scol. E fondo aki por ser aloca tambe pa traha extra klas cu e meta pa juda reduci e cantidad di alumno den un klas. Alaves ta aloca un suma di Afl. 2.1 mln bou di subsidio di salario den educacion pa asina crea mas capacidad pa reduci e cantidad di alumnonan den un klas.

Ta aloca un suma di Afl. 5 mln na subsidie exploitatie onderwijs pa percura cu scolnan por tin material necesario disponibel pa eleva e calidad di enseñansa y opera scolnan na un manera mas eficiente. Cu e suma aki ta compensa pa e cortamento di gasto di Afl 3 mln (25 porciento) door di Minister di Enseñansa ariba e suma total di subsidio disponible pa exploitatie di enseñansa. Ta pone Afl. 2 mln extra pa compensa pa e perdida di poder di compra a consecuencia di e aumento drastico di inflacion, cual ta suma e Afl 5 mln cu AVP ta pone disponibel pa subsidie exploitatie kosten.

AVP ta intensiva fondonan pa enseñansa y di e forma aki ta opta pa inverti den futuro di nos juinan, y pues den futuro di Aruba.