Diamars ultimo a cuminsa cu tratamiento di e presupuesto di e ministerio di Finansas y Economia den parlamento. Promer cu inicio di e reunion publico, fraccion di AVP a hasi entrega di un presupuesto alternativo (Tegenbegroting) pa asina trece alivio pa pueblo, principalmente esnan mas vulnerabel den nos comunidad, cual ta nos pensionadonan, esnan cu ta cobra un salario minimo y esnan cu ta cobra un onderstand.

Parlamentario Alexander Tromp ta envatisa cu hopi ta e cuidadanonan cu ta cobra un onderstand y mirando e suma cu nan ta hanja, esaki no ta llega pa nan gastonan di primera necesidad. Ta wordo bisa cu hopi ta esnan cu ta cobra un onderstand siendo cu nan por traha masha bon. Parlamentario Tromp ta bisa cu enberda por tin un grupo marginalmente chikito cu ta cobra un onderstand siendo cu nan por traha, pero esaki ta na e departamento di Asuntonan Social pa averigua of hasi nan onderzoek al respecto. Tromp ta bisa cu no mester generalisa pasobra hopi ta e famianan cu pa algun motibo valido ta cay den e penoso situacion di mester pidi ayudo social, esta pa bini na remarke pa un onderstand. Hopi ta esnan cu un edad ya halto, pero ainda no ta bini na remarke pa un pensioen, no por hanja un trabao. Tromp kier a illustra esaki cu un ehempel. Actualmente un mama soltera cu 2 jui ta cobra 605 florin pa luna( 325 pa e mama y 140 florin pa cada jui). Segun e bestaansminimum pa un famia asina pa e por cubri su gastonan ta 2.500 florin pa luna. Imaginabo pueblo con un famia asina por sobrevivi. Mas cu claro conociendo nos cultura, sigur e famia aki lo ta wordo juda pa un bisinja of un of otro familiaresnan. Pero esaki no ta husto mirando e derochamiento di fondonan publico y e mal maneho cu nos Gobernantenan ta hibando. Ta prefera di gasta miyones y miyones na “deskundig advies”, consultancynan, huurmento di edificionan etc.etc., envez di pone atencion na e situacion di e sociale verpaupering cu nan ta bini ta hinkando nos pueblo aden debi na tur e medidanan cu a keda ehecuta den e ultimo 6 anjanan di nan Gobernashon.