AVP - CRISTIAN DEMOCRATA ARUBA
   
Parlamentario fraccion di AVP, mr. Alexander Tromp
FRACCION DI AVP SI TIN E CONFIANSA DEN NOS CUERPO POLICIAL
PA DUNA NAN MAS AUTORIDAD PA COMBATI CRIMINALIDAD
Home > Centro di Prensa > Noticia > 20071217

Pueblo por a tuma nota di e lamentabel caso cu a tuma lugar fin di siman ultimo, na unda un miembro di nos Cuerpo Policial a keda gravemente herida y un joven a perde su bida tragicamente a causa di un tiroteo!

Parlamentario pa fraccion di AVP, mr. Alexander Tromp kier a accentua “cu durante e tratamiento di e “ontwerp landsverordening houdende wijziging van de Vuurwapenverordening”, esta e cambio di ley cu ta regarda armanan na februari ultimo, fraccion di AVP a presenta un amienda pa asina duna nos cuerpo policial mas autoridad pa asina na logra na expande e autoridad di nan pa cu listramento na armanan illegal, mirando e hecho cu e concepto di ley no ta duna nos cuerpo policial mucho espacio pa hasi esaki. Fraccion di MEP y RED a vota contra di e amienda aki”.
Minister di Husticia durante e tratamiento di e ley aki a enfatisa cu no ta necesario pa expande e autoridad di nos Cuerpo Policial, mirando e hecho cu aki na Aruba no tin criminalidad manera nos hermana isla Corsow. Parlamentario Tromp a hasi minister e pregunta “si mester warda anto te ora casonanan lamentabel manera esun di fin di siman ultimo sosode pa actua”. Cu no ta mihor pa preveni cu lamenta manjan? Ata un otro ejempel locual a sosode algun luna atras, ora cu gangnan ta enfrenta otro y na unda un joven a tuma e curashi di joyride un auto di Cuerpo Policial y pa despues cende esaki na candela tambe. Y por ultimo manera cu ja mi a menciona caba, e lamentabel suceso di fin di siman ultimo. Parlamentario Tromp ta accentua; “Den e proyecto di cambio di ley di arma cu a keda presenta pa Gobierno, ainda no ta duna Cuerppo Policial suficiente autoridad pa ehecuta nan trabao preventivo. Promer cu Cuerpo Policial kier hasi uso di nan autoridad cu e ley aki ta duna nan, Fiscal mester pidi aprobashon di un Huez Comisario pa cu esaki. Aki claramente ta trata di un procedura cu ta tuma su tempo (getrapte bevoegdheid) y ora cu dicho aprobashon keda cla, kisas informashonnan a leak caba cu na tal lugar lo ta bay tin un accion di Polis. Consequentemente e accion aki lo no bay tin su fruto mas”. Tromp ta sigui elabora cu ta pesey mes fraccion di AVP a presenta dicho amienda na unda cu aprobashon di Fiscal, Polis lo por eherce su autoridad y tuma accion en busca di armanan illegal y tambe por listra personanan cu ta wordo sospecha di ta den posesion di armanan illegal den un termino di tempo di 12 ora. Esaki ta conta pa sitionan cu ta wordo considera “hotspotsnan”. Anto ora kier hasi un accion general (henter Aruba), Fiscal mester pidi aprobashon di Huez Comisario. Kiermeen fraccion di AVP kier a duna e Fiscal y Cuerpo Policial mas autoridad ora nan ta hanja nesecario cu diripiente nan mester tuma accion na lugarnan cu ta wordo considera “hotspotsnan”. Den nos Wetboek di Strafvordering, Fiscal ta e autoridad cu ta duna ordo pa laga encarcela sospechosonan y hasta prolonga e detencionnan aki si e ta hanja nesecario. Anto awor pa duna ordo pa laga un accion tuma lugar na lugarnan sospechoso en busca di armanan illegal, e no tin e autoridad pa cu esaki. Parlamentario Tromp ta accentua;”Si no tin confiansa den nos Cuerpo Policial y den nos Fiscalnan, ta den ken nos mester tin confiansa anto pa cu nos tranquilidad y seguridad?” Parlamentario Tromp ta spera cu minister di Husticia reflexiona y cuminsa na tuma pasonan pa asina duna nos pueblo e seguridad y tranquilidad y no warda te ora e baca hoga.
 
 

top