Luznan paga rond di nos isla. Scuridad na unda antes tabata briya cu claridad ta evidencia di dianan duro, dianan cu mas cu nunca antes nos tin cu haci un compromiso di caridad di un pa cu otro.

Nos a lucha pa e luznan aki di speransa y felicidad no paga den nos pais. Nos a bai baricada pa hamber no bira un realidad penoso den hogarnan di nos dushi Aruba. Pero bida tin vez ta pone nos dilanti retonan grandi pa nos por profundisa nos fe, pa nos por fortifica nos compromiso pa para sin miedo pa locual ta husto y bon y supera cu inspiracion y caridad locual ta inhusto y malo.

Riba dia di Pasco nos ta recorda y celebra cu nos Creador a manda nos su yiu den carni y sanger pa duna nos muestra di e caminda pa cana hustamente den temponan asina. Su guia mester duna nos inspracion pa trece claridad den e scuridad y e sombranan di dolor cu awe ta vislumbra riba Aruba.

Creacion di un sociedad humano mester ta nos aspiracion den tanto nos bida personal como den nos compromiso como sirbidor publico. Nos no por ta indiferente pa e sufrimento cu nos ta mira den nos pais. Pobresa creciente y penoso, inseguridad cu ta pone nos perde criaturanan stima, ensenjanza di nos generacion di futuro neglisha, salubridad di nos hendenan deteorando tur dia cu mas victima inespera, nos grandinan abandona, un comunidad den dolor buscando consuelo y felicidad atrobe, esey ta realidad doloroso refleha den scuridad riba Aruba.

Den nos fe nos mester haya e forza pa trece cambio. For di nos caridad pa nos prohimo nos mester crea e compromiso pa lanta para pa humanidad. Den nomber di Partido di Pueblo AVP, cu espirito social-cristian-humanista mi ta comparti cu nos pueblo: nos a mira, nos a scucha y nos a sinti e temor, e dolor y sufrimento di e pueblo. Mi tey cu bosonan. Sea cual sea e sacrificio personal, mi compromiso cu Boso ta inconcondicional. Durante 2007 partido AVP a comparti cu Pueblo e cantidad di problemanan cu tabata bati na porta di cas di tur famia na Aruba. Despues di a lucha fuertemente pa evita cu BBO lo a bira realidad, AVP a sigui traha riba plannan cu ya e tabata tin prepara pa futuro di Aruba. Bisa hende cu “situacion lo cambia” no ta suficiente. Pesey AVP a entrega su mes completamente pa crea e base solido pa e cambio cu mester bin na Aruba. Na vispera di Pasco, AVP kier invita e comunidad di Aruba pa laga Pasco ta e inspiracion grandi pa por yega na e Aruba cu nos tur kier y caminda tur hende ta sinti nan mes di berdad na cas. Pasco ta fiesta di speranza. AVP kier invita Aruba pa laga e Luz di Pasco trece claridad den e scuridad den nos pais y duna nos e virtud di paz cu nos mester pa por biba den speranza.

AVP a presenta alternativa cu ta prueba cu cosnan mester y por otro. E documentonan ta na Parlamento y ta demostra cu Aruba por worde goberna na forma sano sin e peso di BBO. E hecho cu nos a duna prueba cu BBO no ta necesidad pero decision di Gobierno pa loke ta trata su maneho, mester anima confianza den un futuro nobo.

Pesey pa nos e mensahe di dianan aki di nacimento y di profesion spiritual ta momento pa nos, como sirbidornan di pueblo, confirma nos compromiso cu tur cu ta biba riba e baranca aki pa laga e claridad di un bida cu perspectiva y oportunidad yega atrobe den hogarnan den nos pais.

E dianan di Pasco ta e momento cu nos mester laga e virtud di caridad, di amor prohimo, renace cu un forza cu no lo tin muraya di opresion pa para husticia di prevalece, cu lo no tin previlegio pa algun cu lo por keda trapa y nenga prosperidad di e pueblo henter cu ta e real merecedornan di oportunidad y felecidad.

Den nomber di Partido di Pueblo ricibi mi deseonan cu Bendicion di nos Creador yena nos hogarnan den e dianan di Pasco y ilmina nos curason cu un Speransa Nobo pa un Anja Nobo cu salud y felicidad pa un y tur. Bon Pasco y un Feliz Anja Nobo.

Boso Amigo, Mike Eman, Lider di AVP.