Lesa version na Hulandes

Lesa carta pa N.O. Oduber

Apreciable conciudadanonan,

E momentonan aki di transicion di anja, cu nos ta comparti den e calor di presencia di nos amigonan y familiarnan…ta momentonan di anhelo pa un mihor mayan combina cu recuerdonan profundo.

Mas cu tur otro momento den bida, esaki ta e dianan y oranan cu nos ta observa con nos bida y bida di nos pais a transcuri pa reflecciona riba nos compromiso y retonan pa futuro.

Scuridad awe na unda antes tabata briya cu claridad ta evidencia di dianan duro. Nos a lucha pa e luznan aki di speransa y felicidad no paga den nos pais. Nos a bai baricada pa hamber no bira un realidad penoso den hogarnan di nos dushi Aruba

Aruba a haya un gobierno cu a dicidi cu su prioridad ta pa faborece esnan rond di dje a costo di tur cos. Sin escrupulo, sin moral, sin etica y sin pena pa nada y pa ningun hende a dispidi den seis anja e fortuna di e pais aki, e sudor di pueblo y a hypoteca nos futuro pa enriquece familiarnan y amigonan.

Ora placa a caba, a fia y a redobla debe di pais Aruba, a cuminsa bende propiedadnan di pais Aruba, tur accion di Aruba den Hyatt, den SETAR y den Raddisson..mas di 300 miyon na propiedad di pais Aruba. Asina mes placa no a yega pa nan. A bin cu medida. Uno tras di otro y finalmente e carga fatal BBO.

Pa sigui …kier haci apodera di reservanan di Banco Central, riba reservanan di Utilities.

Aruba a haya un prijs. Gobernantenan di Gabinete Oduber a bira e agentenan di e benta. Hasta nos Waf, Bestuurskantoor, Parlamento y pier di Piscado ta riba e lista di findishi di gobierno.

Con nos por a degenera asina ? Con nos ta bai para e degeneracion aki.

Aruba mester di un direccion nobo urgentemente. Nos mester libra pueblo y pais di e carga aki. Nos mester haci Aruba feliz y contento atrobe. Y hunto nos por realizé.

Nos a entrega un presupuesto alternativa na Parlamento den cual fraccion di AVP ta prueba den un forma cuantifica cu cos mester y por otro.

E presupuesto alternativa cu AVP a entrega na Parlamento ta un refleho di e escohencianan di maneho cu segun fraccion di AVP ta esencial pa futuro di pais Aruba.

E prioridadnan di e presupuesto alternativa ta: miho enseñansa, un gobierno menos grandi, un infrastructura mas fuerte, rebaho di gastonan na un forma structura, drecha e poder di compra di pueblo, revoca BBO y rebaha e debe y interes riba debe di pais Aruba.

Den total e presupuesto di partido AVP ta percura pa un realocacion di 185 miyon. Esaki na interes di inversion den comunidad, pueblo y pais.

Den nos presupuesto alternativa nos ta duna prioridad na e hecho cu desaroyo di Aruba ta exigi un coreccion di inversion di tanto infrastructura fisico como capital humano.

Drecha e retraso den inversionnan, tanto esnan di e infrastructura fisico, como esnan di e economia di conocimento y enseñansa. Esaki ta locual nos Prespuesto alternativa ta haci. Esaki mester pone Aruba bek riba un trayecto di un fase nobo di desaroyo socio-economico.

Aruba por inverti den enseñanza si nos duna e schoolnan, klas di nos jiunan, nan pen, nan buki, nan maestro prioridad riba fortuna pa huurdonan di oficina.

Den nos prespuesto alternativa nos ta saca un man pa esnan den mas nececidad.

E prioridadnan aki ta prioridadnan logico, husto, cu ta habri caminda pa un speransa nobo, un avenida pa alivio, optimismo y progreso.

Conciudadanonan, E ta penoso pa un pais y pueblo ora cu esnan cu e a confia hiba un maneho cu ta causa tanto danjo, sufrimento y inhusticia.

Pero e dolor ta bira mas grandi, e tristesa mas profundo ora cu esnan cu nan a confia bira sordo y ciego pa nan grito, pa nan sufrimento, pa nan desapunto.

E tristesa ta bira mas profundo ora esnan responsabel nenga di reconoce e decadencia fysico cu nan a crea den e centronan di nos pais, e deteoro den nos ensenjanza, e negligencia pa cu nos hubentud, e aumento di violencia y criminalidad, e empobrecimento den e barionan di nos pais, e ruptura di e fibranan cu tabata mara nos hunto como un comunidad, famia cu famia, amigo cu amigo, bisinja cu bisinja.

Pa overtime pa polis pa cuida nos ciudadanonan no tin placa. Pa maestronan di school pa educa nos jiunan no tin placa. Na Hospital caminda nos mester mannan na cama pa juda nos enfermonan, gobierno no ta mira hende pero vet pa corta, pero den gobierno ministernan no tin basta di hende pa sirbi nan koffie, pa carga nan maleta pa nan, pa stuur auto pa nan.

Con por tin tanto indiferencia pa e realidadnan di pueblo. Na Promer Minister mi kier bisa laga bo curason mira locual bo wowonan no kier wak.

Entre biahenan costoso, lucrativo, leuw y sin sentido pa China, Braziel y India lo ta husto pa haci un vuelta cortico, serca y necesario pa mira, papia y scucha e famianan riba nos propio suelonan, na e casnan na Semeleerstraat, na Bushiri, Tarabana, Seroe Patrishi, Cashero, de Vuyst, Juana Morto, Cura Cabai, Zeewijk, Sabana Basora, Esso Heights. Nos hendenan aki no ta puntrando pa hotel di 5 strea, nan no tin e basico, e mas fundamental pa un existencia husto.

Anochi e casnan ta scur, den dia nan ta papia pa nan mes, kibra curason di ken cu realmente ta stima su prohimo.

E porta di cura gezak, palet biew ta sirbi como trankera, e frigidair bashi…wanta hunto cu stopverf y corant, corchon di cama kibra cu carton pa proteha kurpa, e criatura cu awa ta core for di su nanishi, vulnerabel y debil pa cualkier griep of dengue cu un mama cu ta yega anochi lat for di un dia largo di trabao y sidejob pa wanta cabez riba awa ….ta e realidad penoso cu Promer Minister ta nenga cu e ta causando, pasobra di Aruba e no tin tempo pa papia.

Si esaki ta bo responsabilidad pa pueblo, cu riba nan sudor bo ta biba y fiesta, anto mi ta bisa cu ta yega un momento cu pueblo ta cansa y fada di tanto arogancia, abuso y humiliacion, ta yega e dia pa responsabilisa bo mes. Recursonan di gobierno ta propiedad di pueblo cu bo mester maneha cu responsabilidad pa presente y futuro.

E gritonan ta bini di tur skina; e situacion ta urgente. Pueblo no por carga mas y gobierno no por conta cu pueblo lo soporta mas.

Un filosofo grandi, David Hume, cu a inspira e fundeshinan di principionan politico riba cual nos democracia y estado di derecho ta basa a yega di mustra cu legitimitad di gobierno ta basa riba un systema cu ta conta cu tolerancia di pueblo:

Autoridad ta depende di obedencia y obedencia no ta un gracia di poder. Esaki ta un pacto di confiansa cu pueblo a entrega podernan natural di dje na un instituto cu ta goberna. Ta cu e conciencia aki y cu modestidad aki gobernantenan mester usa e confiansa cu pueblo a duna nan. Arogancia y abuso di poder ta kibra e confiansa y na Aruba nos ta yegando e punto aki. Pesey awe mainta mi a manda un carta den nomber y den representacion di un parti grandi di pueblo pa Promer Minister Oduber poniendo su gobierno responsabel pa e situacion di crisis social y di aumento di criminalidad den nos pais y exigiendo pa gobierno mirando e concecuencianan social econonomico grave cu BBO tin pa cuminsa di imediato e proceso pa revoca e impuesto inhusto aki, institui un fondo di emergencia pa polis y pa juda famianan den crisis social. E presupuesto alternativa di AVP a mustra cu esakinan mester y por.

Conciudadanonan,

Bida ta yen di contratiempo. Nos mester para hunto pa supera nan.

Mi a consola y convivi cu famianan rond Aruba cu a sufri perdidanan grandi, mira un cantidad preocupante di famianan den ultimo tempo perde nan jiu, mama of tata hoben na cancer y otro malesanan, nos pais mester para keto y mira con e malesa aki ta bini di trishon riba tanto di nos hendenan.

Mi a comparti cu famianan cu ta biba cu e dolor y interogatorio cu nan jiu den pleno flor di su bida por a tuma su mesun bida, of a fayece na man di arma, acidentenan tragico, nos mester mira ta kico ta pasando cu nos hobenan y nos sociedad.

Mi ta parti awor di tur locual mi a mira, di tur locual mi a tende y di tur cu a tenemi y brasami cu e deseo pa cambio, pa un futuro pa nan famia y pais.

Den nomber di Partido di Pueblo AVP, cu nos conviccion humanista-social-cristian- mi ta comparti cu nos pueblo: nos a mira, nos a scucha y nos a sinti e temor, e dolor y sufrimento di e pueblo. Nos ta comparti e sonjonan di nos profesionalnan, nos inversionistanan, nos hobenan pa haci di Aruba un pais progresivo moderno y cu oportunidad pa nos hendenan por alcansa nan maximo potencial. Aruba por.

Den nos fe nos mester haya e forza pa trece cambio. For di nos caridad pa nos prohimo nos mester crea e compromiso pa lanta para pa humanidad.

Den locual nos a mira cu nos wowonan y sinti cu nos curason ta e fuente di nos forza y determinacion pa trece cambio.

Ban laga e virtud di caridad, di solidaridad, di amor prohimo, renace cu un forza cu lo kita baricadanan di opresion pa husticia por prevalece, cu lo libra nos di probecho pa algun pa habri caminda pa prosperidad pa e pueblo henter cu ta e real merecedornan di oportunidad y felicidad.

Anja 2008 ta e anja cu mester pone e pais aki bek den man di pueblo. Mi tey cu bosonan. Sea cual sea e sacrificio personal, mi compromiso cu Boso ta incondicional. Hunto nos lo lucha te na e momento cu pueblo recobra su felicidad y Aruba ta contento atrobe. Hunto nos lo cende e luznan den nos hogarnan atrobe y laga e claridad di un bida cu perspectiva y oportunidad yega di nobo den cada skina di nos pais.

Den nomber di Partido di Pueblo ricibi mi deseonan cu Bendicion di nos Creador yena nos hogarnan y ilumina nos curason cu un Speransa Nobo pa un Anja Nobo cu salud y felicidad pa un y tur. 

Bon Anja.