Ta conoci cu e situacion financiero di Pais Aruba ta preocupante. Esaki ta hasi monitoring di gasto y entrada di Gobierno hopi mas importante, pa por hiba un maneho financiero profesional y responsabel, permitiendo asina pa hanja mihor control di e situacion. Un bon systema di monitoring di entrada y gastonan ta e base fundamental pa por stuur situacionnan den un direccion responsabel. E ta permiti pa hanja un idea si entradadanan cu ta spera di hanja durante un cierto anja realmente ta drenta den caha di Gobierno y na momento cu ta spera esaki tambe. Tambe ta permiti di sigui di serka e desaroyo di gastonan di Gobierno, dunando un bista di e nivel di gasto na cualkier momento y tambe na ki typo di gastonan e placa di impuesto ta ser usa. A la vez, ta juda na basa conclusion encuanto e situacion financiero di Pais Aruba.

Maneho financiero di Gabinete Oduber: To know or not to know?

Cu hopi asombro por a lesa, net promer cu dianan di fiesta, di un déficit grandi pa 2007 den e Fondo di AZV. Supuestamente esaki ta core den Afl. 30 mln. Sin embargo, mas sorprendente ainda ta e hecho cu Minister di Finansas y Asuntonan Economico (Min FAE) y Minister Presidente ta declara públicamente di no tabata na altura di e déficit aki. Ta e propio Min FAE na final di cuenta ta responsable pa cubri cualkier déficit den e Fondo di AZV. Pero, e hecho cu Min FAE, como schatkistbeheerder di Pais Aruba, na final di 2007 no tabata na altura di e suma di déficit di e Fondo di AZV, ta hopi mas preocupante pa e situación financiero di Pais Aruba cu e déficit di AZV ariba su mes. Esaki ta ilustra e capacidad di e minister aki y tambe e forma di traha di e Gabinete Oduber den su totalidad. E forma di proceder di miembronan di Gabinete Oduber pa cu e Fondo di AZV ta ensera risiko grandi di ripiticion di e situacion.

Considerando cu Minister di Finansas y Minster President ta declara na november 2007 di no tabata na altura di e déficit di AZV over di mes un anja, por conclui cu e interes financiero di Pais Aruba ta mal sirbi cu bou di Gabinete Oduber. Por tin – of no - razonan legitimo pa e déficit aki, pero hecho ta cu e schatkistbeheerder di Pais Aruba, mester ta semper informa di consequencianan financiero cu e fondo aki lo tin pa e presupuesto di Pais Aruba. Paso, na momento cu bo no tin control, bo mester ta semper prepara. Min FAE y Minister Presidente ta confirma públicamente di no ta prepara, corda pa controla. Cu nan negligencia, Gabinete Oduber a no solamente a permiti e deficit den e Fondo di AZV pa 2007 pa afecta e presupuesto di Pais Aruba drasticamente, pero tambe pa afecta e meta pa jega na un presupuesto balansa na 2009, despues cu e mes un meta aki no por a keda realisa na 2007 manera planea originalmente.

Minister di Salubridad Publico: zwakke schakel in de keten?

Cuestionable den henter e asunto aki ta keda e rol di e minister encarga cu salubridad publico, kende tin mas bevoegdheden pa cu e Fondo di AZV. No ta conoci si e Minister aki tabata na altura of no di e deficit den e Fondo di AZV. Pero, considerando e autoridad cu Ley di AZV ta otorga na e minister, y considerando e representantenan di Pais Aruba cu e Minister aki a nombra den Raad van Bestuur di AZV, no por otro cu e mester tabata al tanto di e situacion financiero di e Fondo di AZV desde incicio, den caso cu el a hasi su trabou debidamente. Motibo pa cual ta importante pa sa pakiko e Minister di Salubridad Publico no a informa e Minister di Finansas na tempo di e deficit pendiente di e Fondo di AZV. Sigur awor cu e propio AZV ta indicando cu un motibo importante pa e deficit ta e atrasonan den recogemento di prima di AZV door di SIAD. Si esaki ta e caso, e lo ta hasi e Minister di Finansas complice den e deficit, como cu e ultimo aki ta carga responsabilidad politico pa eventual falta di cumplimento di SIAD pa cu metanan fiscal. Den caso cu no a informa Minister di Finansas na tempo di e atraso den prima di AZV, tampoco ta spreek e vrij di su responsabilidad politico, como cu e mester tabata sa di tur moda y husga pa su mes e consequencianan pa Pais Aruba.

Accion di Parlamento: curashi y disciplina?

Ta deber di Parlamento pa tuma accion y evita cu maneho no-profesional asina lo ripiti, perhudicando un bes mas e interes financiero di Pais Aruba. Ta importante pues pa trece claridad den e linja di responsabilidad di cada un di e actornan relevante envolvi cu AZV, y exigi un mihor coordinacion y feedback di e actornan aki, pa salvaguardia interes financiero di Pais Aruba. Si Parlamento den su totalidad, en particular e grupo mayoritario den Parlamento, no asumi e responsabilidad aki, anto ta kende si lo por pone un paro na mal maneho. Fraccion di AVP lo pone e issue aki ariba agenda di Staten y lo pusha pa un tratamento debido den Staten.