Pueblo di Aruba pa prome biaha den su historia ta bibando epocanan sumamente difícil pa loke ta trata e tereno di justicia. Durante campanja Minister di Justicia, Rudy Croes a vocifera di ta bay pone mas polis (blauw) ariba Caya pa combati criminalidad.

Después di a sera school pa polis pa un temporada y después di a corta den presupuesto di Cuerpo Policial pa loke ta trata pago pa pone personal extra ariba pia pa asina alivia e pueblo su situación pa motibo di scarsedad di polis, awor Ministerio di Justicia pa 2008 ta corta cu 90 mil florin extra den e post di goederen en diensten di Cuerpo Policial. Pues enves di inverti extra den Cuerpo Policial pa aumenta su efectividad cual resultadonan pueblo lo sinti sigur, Ministro di Husticia ta neglisha seguridad di un pueblo y ta pone e 90 mil florin cu e a kita for di Cuerpo Policial y pone na disposición di su ministerio. Kiko nos por conclui di e forma di proceder di Minister di Hustica? E seguridad di e pueblo di Aruba ta parse di ta menos importancia pa e Minister en cuestion. E 90 mil florin aki cu por a yuda Cuerpo Policial equipa su mes mihor pa e diferente peligernan existente door di cumpra por ehempel mas vestnan anti bala, consientisacion di e pueblo atraves di diferente programanan usando diferente medionan di comunicación. E 90 mil florin aki lo wordo usa muy probablemente door di Ministerio di Justicia pa nombra políticamente mas campanjadornan y amigonan serca di partido MEP. Partido AVP recientemente a dirigi un carta pa Minister di Asuntonan General, Sr Nelson Oduber, urgiendo e mandatario pa pone mas fondonan disponibel pa Cuerpo Policial pa combatimento di e criminalidad cu ta alarmante.

Pueblo ta biba e situación caotico aki den justicia diariamente caminda por ehempel ta ser pidi pa recherche y no tin, pasobra nan no mag di traha oranan extra pa resolve casonan.

 Tambe tin e fenómeno cu no tin suficiente personal di trafico pa investiga e avalancha di casonan di hit and run cu ta tuma lugar diariamente, caminda cu e stapel di casonan no resolvi a bira incalculabel. Hopi biaha pueblo ta experimenta cu no tin suficiente polis pa atende tur e asistencianan cu ta wordo demanda for di seccion di patruya, pues e departamento uniforma. E población a conose un cresemento hopi grandi, pero e cantidad di polis pa cada warda durante e transcurso di anjanan no a cambia cu consecuencia cu no ta tur hende por haya e servicio di polis na momento cu nan ta desea of pidi. Informaciónan cu fraccion di partido AVP ta dispone di dje ta cu e viahe di Minister Presidente, Sr Nelson Oduber, pa China a costa e pueblo pagador di belasting, di Aruba alrededor di 200 mil florin, ainda sin conta e biaha pa India caminda ruman di promer minister tambe tabata envolvi. Nos por observa claramente cu e prioridad di Gabinete Oduber 4 sigur no ta e seguridad di e pueblo di Aruba.

Partido AVP sigur ta kere den e Cuerpo Policial di Aruba y lo inverti grandemente pa su bienestar y tambe y e bienestar general di nos comunidad.