Durante tratamento di Presupuesto di Husticia pa 2008 por a constata a base di cifranan di realisacion di e presupuesto 2006 suministra pa Minister di Finansas cu Minister di Husticia a surpasa e presupuesto 2006 di su Ministerio cu Afl 2.6 mln. Ariba su mes esaki por pasa, sinembargo tin proceduranan cla pa regla esaki. Ley di Comptabilidad (Presupuesto) ta prescribi cu mester entrega promer cu 1 april di e anja siguiente – den e caso aki promer cu 1 april 2007 – un concepto di Ley pa pidi autorisacion di Parlamento pa hasi mas gasto di locual Parlamento a aproba den e Ley di Presupuesto pa e anja en cuestion. For di contestacion di Minister di Husticia por a compronde cu e no a cana e caminda prescribi pa Ley.

Fraccion di AVP ta di opinion cu e Minister di Husticia a falta respet pa Parlamento. E organo aki a aproba den e Ley di Presupuesto 2006 di Ministerio di Husticia un suma maximo pa e Minister su gastonan pa 2006, y e Minister ta surpasa esaki sin mas. Den un mocion fraccion di AVP a indica cu a base di cifranan di realisacion di presupuesto 2006 suministra pa Minister di Finansas, y a base di contestacion di Minister di Husticia, por a constata cu Minister di Husticia a surpasa su presupuesto pa 2006. A base di e hecho aki, den e mocion ta pidi sosten di Parlamento den su totalidad pa condena e actitud aki di Minister di Husticia y rechasa su maneho pa 2006. E mocion ta hanja sosten di Partido AVP, mientras cu MPA ta abstene di vota. MEP y RED ta desaproba e mocion, pues asina el a keda desaproba pa mayoria den Parlamento. E argumentacion di Partido MEP ta cu e cifranan di realisacion suministra pa Minister di Finansas ta cifranan preliminario cu no ta confiabel y no ta valido.

Rechasando e confiabilidad di cifranan di realisacion saca for di administracion di Departamento di Finansas, e grupo mayoritario den Parlamento ta rechasa e adminstracion financiero central cu nan Minister di Finansas a bini ta hibando desde 2002. Esaki ta un desconfiansa implicito den e manera di hiba administracion financiero di e minster en cuestion.

Sentido di tin un Parlamento?

Cu e rechaso di cifranan di realisacion saca for di administracion central di Departamento di Finansas, bou di responsabilidad politico di Minister di Finansas, Parlamento mes ta kita e fundeshi di control activo ariba ehecucion di e presupuesto for di bou di su propio pia. Parlamento tin como tarea pa controla maneho di Gobierno. Presupuesto y su realisacion, ta refleho di e maneho cu e Gobierno ta y a hiba. Si Parlamento kier por controla y evalua e maneho cu a ser hiba, mester cuminsa na evalua cifranan di realisacion, considerando cu desde 2001 no a presenta mas ningun cuenta anual di Pais Aruba. Anto, ta kiko e trabou di control di Parlamento lo mester ensera si no tin confiansa den cifranan saca for di administracion financiero di Departamento di Finansas? Budgetrecht di Parlamento, según mayoria den Parlemento, ta keda reduci na stempel presupuestonan cu Gobierno ta entrega.

Parlamento pues ta canando ciego den tur locual ta trata e forma con Gobierno ta usa su presupuesto. Den e rasonamento di fraccion di MEP, ta bon pa hanja un splicacion ariba e forma con si lo por hanja sikiera un bista di e manera con Gobierno, na 2006, a aloca e suma di alrededor di Afl. 1.050 mln na gasto. Y tambe pa splica cual ta balor agrega y sentido pa tini un Parlamento cu ta costando Afl. 13 mln pa anja, si no tin un manera pa tin bista - corda control - di gastonan real di e presupuesto. Por ultimo, si ta di opinion cu e cifranan di e administracion financiero central di Minister di Finansas no ta confiabel pa mayoria di Parlamento, ta na su lugar pa atende e Minister di Finansas ariba esaki y exigi pa presenta cifranan confiabel. Cu cifranan di realisacion no-confiabel, e promer cu bo ta gaña ta bo mes.

Balor di conclusion di IMF y Fitch?

Pero cu e desconfiansa den cifranan di realisacion suminstra pa Minister di Finansas, mayoria den Parlamento, ta rechasando tambe conclusionnan encuanto e maneho di gobierno manera presenta pa IMF y Fitch. No ta riba e mesun cifranan di realisacion, saca for di e adminstracion financiero central di Departamento di Finansas, e instancianan aki a basa nan analysis y conclusionnan? E calidad di analysis y conclusionanan di IMF y Fitch encuanto finansas publicas, segun fraccion di MEP, ta bira hopi cuestionabel na momento cu e fuente di informacion no tin e confiansa di Parlamento di Aruba. Ki sentido y balor e raportahenan financiero regular di Minister di Finansas pa Koninkrijk Ministerraad tin, si e cifranan ariba cual e ta basa no ta goza di e confiansa di Parlamento di Aruba?

Democracia parlamentario: ken su interes ta defende?

E escogencia di fraccion di MEP pa defende, ariba custia di nan Minister di Finansas, e hecho cu nan Minister di Husticia a comete na 2006 un infraccion contra Ley di Comptabilidad, ta demonstra claramente y na un manera hopi penoso e nivel di decadencia di nos democracia parlamentario. Cu e forma di proceder aki ta trece duda den e interes cu fraccion di MEP ta sirbiendo den Parlamento. Esaki tambe ta trece duda den e posicion di e fraccion di MEP pa cu e meta pa jega na un presupuesto balansa na 2009. Ta con e fraccion di MEP por ta sostene e maneho di Minister di Finansas pa jega na un presupuesto balansa den 2009 mientras cu nan ni ta kere den cifranan cu e Minister aki ta presenta, y ta tolera cu otro Ministernan ta surpasa nan presupuesto sin mas? Ilustrativo ta e caso di Minister di Educacion, Asuntonan Social y Infrastructura, kende a surpasa su presupuesto na 2006 sin informa Minister di Finansas y Parlamento na tempo, y cu no sigui e procedura usual pa coregi esaki. Na inicio di 2007, fraccion di MEP sin mas ta duna dispensacion na e infraccion di e Minister aki.

Conclusion

E episodio aki ta demonstra pakiko no por a realisa un presupuesto balansa na 2007 manera planea originalmente y pakiko tampoco lo por jega na un presupuesto balansa den 2009. Integrantenan di Gabinete Oduber ta fayando den e ehecucion di presupuestonan, y mayoria den Parlamento no tin e capacidad ni boluntad pa controla esaki. Ta demonstra tambe cu no tin un forma fijo pa midi na ki momento por realisa e plan di un presupuesto balansa pa 2009. Den caso cu e presupuesto cu ta presenta pa 2009 ta balansa ariba papel, no tin garantia cu lo por realisa un ehecucion di e plan manera prescribi den e presupuesto pa 2009. Tampoco tin forma pa midi na tempo si enberdad a ehecuta e presupuesto balansa den un forma corecto.

E falta di boluntad di mayoria den Parlamento pa realmente eherce control ariba e ehecucion di presupuesto ta demonstra e falta di curashi pa pone un paro na e ehecucion robez di e presupuesto 2006. Ta opta abiertamente pa laga e Minister di Finansas cay, y defende interes di otro Ministernan. E forma di proceder aki ta hasi Parlamento di Aruba, particularmente e fraccion di MEP, un complice activo di e situacion financiero cu nos Pais ta hinca aden.