Lesa cpermiso pa opera 24 ora pa dia

Dia 12 di juni 2007 Minister di Husticia Rudy Croes a duna Stellaris Casino permiso pa opera nan casino 24 ora. Riba su mes esaki por ta un nececidad pa e industria, sinembargo e lider di AVP, mr. Mike Eman ta bisa cu tipo di permiso asina mester worde duna condiciona pa garantisa orarionan husto di trabao pa empleadonan den e industria cu ya ta conoce poco tempo di calidad cu nan famianan.

Eman ta lamenta cu no ta mara un permiso asina na condicionnan cu ta tene cuenta cu e posibel concecuencianan negativo pa empleadonan, nan famia y comunidad. E operacionnan 24 ora ta un “stress” adicional pa hopi envolvi y comunidad. Si e ta necesario pa e industria, anto mester mengua e concecuencianan negativo, e lider di AVP ta haya. “Tin operador a base di propio responsabilidad y comprension ta yega na acuerdonan husto y otronan no. Tin un rol di supervision y proteccion aki di parti di gobierno cu ta worde neglisha”, na opinion di e lider di oposicion. E lider di AVP a mustra, cu constitucion den su man, cu gobierno tin un responsabilidad den esaki. E a splica cu unda tin un responsabilidad di gobierno tin un derecho y un responsabilidad di parlamento pa controla con gobierno ta eherce of no ta eherce e responsabilidad aki.

Mr. Mike Eman a mustra cu seguridad di trabao ta un area di responsabilidad continuo di gobierno. E a cita dos articulo for di nos constitucion (Staatsregeling) articulo V.22 cu ta cai bao di e asina yama “sociale grondrechten”:

Den caso di Bushiri Hotel y Aruba Grand Hotel nos ta topa empleadonan cu ta sinti cu nan a worde trata inhustamente, pero no ta haya ningun apoyo y atencion di gobierno pa mira den nan caso y purba corregi locual no ta bon, e lider di AVP, mr. Mike Eman ta bisa. Ta hopi ta e empleadonan den e dos casonan aki cu awe ta den corte purbando di haya nan derecho y otronan cu a worde priminti un posicion den e hotel renova te awe no por mira e promesa ey cumpli. E forza di Aruba su industria turistico ta e calidad di e servicio cu nos hendenan ta duna. P’ esey nan mester worde hustamente compensa y trata. Esaki den cierto casonan ta lagando basta di desea cu concecuencia negativo pa e empleadonan y pa e industria principal di Aruba.

Eman ta haya cu gobierno y Promer Minister Nel Oduber continuamente ta papia di miyones di inversion y hotel di 5 strea, pero no ta mira e poco florin di entrada y e poco strea na trato cu lamentablemente tin vez tin pa esnan cu ta carga e industria aki cu nan sudor y sacrificio. Den e caso di Grand pa Rio a keda pregunta grandi rond di e motivacion di Promer Minister Oduber. Trahadornan a worde laga na caya, pero “spa” si a keda regla pa segura otro interes cu esun di bienestar general di pueblo.