|
 Miembro di parlamento pa fracccion di AVP, Alexander Tromp, ta splika cu presupuestonan no tin solamente como meta pa autorisa un minister pa hasi gastonan pero tambe ta duna un refleho riba e maneho financiero cu Gobierno tin plan di hiba.
Aki ta e tarea di parlamento cu ta encera e control y legislacion di nos leynan, debi cu un presupuesto ta un concept landsverordening (concepto di ley) cu mester aprobacion di parlamento.
Alexander Tromp ta sigui enfatisa cu ta e derecho di amienda cu parlamento tin ta hasi e posibilidad pa amendeer e maneho di Gobierno conforme e deseo y bienestar di e pueblo cu nos como parlamentarionan tin e derecho y deber pa hasi esaki y cu esaki ta asina fundamental cu Gobierno tin di respeta y accepta esaki tambe. |
|
Ta masha facil mes pa durante tratamiento di un presupuesto pa oppositornan politico vota “contra” di un concepto di ley, den e caso aki un presupuesto, di un of mas otro ministerionan, sin duna e argumentonan valido. Cu e entrega di e presupuesto alternativo aki, fraccion di AVP kier a duna realse kiko en realidad ta e deber di parlamentarionan den parlamento. Meta di e presupuesto alternativo di fraccion di AVP ta pa trese alivio den e situacion financiero di nos cuidadanonan. Alexander Tromp ta sigui enfatisa cu debi na tur e medidanan cu Gobierno a bini ta ehecutando riba nos cuidadanonan durante e ultimo 6 anjanan, entre otro e “massacre” di introduccion di BBO, e poder di compra di nos cuidadanonan a bay mas cu 25% atras!! Costo di bida a bira super caro mes. Awa, electricidad, gasoline, comestiblesnan di primera necesidad etc.etc. no ta cos di papia mes. Gobierno den afan pa defende nan mal maneho y irresponsabilidad di a introduci BBO, ta sinta tira culpa riba comerciantenan. Cu ta e comerciantenan ta esnan cu ta abusando di prijsnan. Shonnan, si den principio boso tawata sa cu lo bo no ta bay tin e mechanismo di control, anto pakiko toch a introduci e “massacre” di BBO?? Fraccion di AVP, mirando e inhusticia aki a pone como meta principal pa elimina e BBO. Ta pesey mes cu e entrega di e presupuesto alternativo a hasi un apelacion na Gobierno pa elimina e BBO den un periodo di 2 anja. Den e promer anja elimina e BBO riba productonan di primera necesidad di uso diario. Anto e di 2 anja elimine riba tur otro productonan. Si Parlamento completo a bay di acuerdo cu e presupuesto alternativo aki sigur sigur esaki lo a trese un poco alivio pa nos cuidadanonan y principalmento pa esnan mas vulnerabel den nos comunidad, cu ta nos pensionadonan, esnan cu ta cobra un salario minimo y tambe esnan cu ta cobra un onderstand. Pero di otro banda pueblo tristemente mester constata e constante deroche di placa debi na e mal maneho cu Gobierno ta hibando durante e ultimo 6 anjanan. |
