Na december 2006 gabinete Oduber a keda para ariba su punto cu BBO lo tin efectonan positivo pa Aruba su economia y Finanza Publico. Asina, cu ayudo di fraccion di MEP den parlemento, nan por a pasa e ley di B.B.O. Te cu awe, un aña despues e efectonan ta leu di positivo. Cuminda, segun cifranan di CBS, a subi cu 9.5%, vivienda a subi cu 14.7%, transporte y comunicacion a subi cu 7.0% y asina por sigui cu un cantidad di aumentonan cu pueblo tin cu biba cu ne awe.

Si ta asina cu ningun hende of instancia a premira loke nos ta aden awe, ta un cos. Pero gabinete Oduber a wordo suplica, conseha, splica y proponi pa por lo menos postpone e introduccion di BBO: SER, Raad van Advies, Banco Central, Sindicatonan, Associacionan Comercial, Camara di Comercio, O.P.P.A., Banco Central di Aruba y un cantidad di accountant bureaunan a conseha contra introduccion di BBO. Di otro banda gabinete Oduber a sera horea pa tur e gritonan di desesperacion di e agrupacionan aki.

Partido AVP, a vocifera su opinion pa cu BBO, hopi cla. E partido tabata y ta contra BBO. Den opinion di AVP, e structura di "schakelnan" di BBO ta algo cu ta inacceptabel. E ta un structura cu (lo) ta devastador pa nos economia. Mescos cu Banco Central, partido AVP tabata di opinion (despues di un estudio profundo) cu BBO lo causa un inflacion cu lo jega te 8% pa 8.5%.

Di otro banda, Gabinete Oduber, bou liderazgo di Nel Oduber y Nilo Swaen, a bisa cu e efectonan inflatorio lo ta minimal y temporario. Hunto cu departamento pa asuntonan economico, Minister Swaen a bay ariba un "tour" pa splica un y tur cu BBO lo ta algo bon pa Aruba y cu e consecuencianan inflatorio lo ta minimo.

Awe ta un aña despues di e introduccion di BBO y cifranan di inflacion di CBS ta aden. Ta resulta cu tanto prediccionan di Banco Central (cu a predeci 7 pa 8% di inflacion), partido AVP y tambe di gabinete Oduber y Ministro Swaen y Oduber tabata incorrecto.

Inflacion, segun cifranan for di Boletin di CBS (Oficina Central di Estadistica di Aruba) a mustra cu inflacion a surpasa te hasta e predicconan di tanto Banco Central y esun di partido AVP. e inflacion a jega te cu December 2007, na un nivel historico di 10,2%. Algo unuca bisto den historia moderno di Aruba.

Un hecho cu ta preocupa economistanan mas ta, cu e diferencia entre e inflacion di Aruba y su partner economico di mas grandi ta demasiado extenso (y ta birando mas y mas extenso). Esaki ta indica cu e causa di e efecto inflatorio ta uno local. Normalmente e inflacion na Aruba ta depende di e inflacion di su partner economico di mas grandi cu ta Merca (U.S.A.). Ora cu e inflacion subi na Merca, automaticamente e ta subi na Aruba (y vice versa, e ta baha). Den e caso aki e inflacion haltisimo na Aruba ta causa exclusivamente door di BBO y aki ta na unda tur experto ta diacuerdo.

Loke e graficonan ariba ta mustra ta increibel y te cu awe representantenan di partido MEP aina no kier accepta cu e efectonan minimo cu nan a priminti pueblo aña pasa no tabata realistico.

Loke ta tristo den tur e situacion aki ta cu famianan cu tabata biba na of serca di margen economico, awe ta sufriendo inmensamente. un otro grupo cu ta sufri inmensamente ta e pensionadonan cu a wak nan entrada baha mas cu ningun otro grupo den nos comunidad.

A jega tempo, awor cu CBS a publica cifranan inflatorio, pa gobierno pone man na su curazon, y cuminsa accepta su error y hasi algo pa remedia e chaos increibel cu nan a causa. Aruba nos por sigui asina, sin un vision pa futuro y cu un maneho ad hoc cu ta hibando nos pais den un situacion economico hopi serio.