Den e di dos tanda di tratamento di Presupuesto di Asuntonan Social, Enseñansa y Infrastructura, e fraccion di AVP a haci entrega di un mocion amplio con pa ataka e problemática di e pobresa creciente y alarmante na Aruba. Ya caba e fraccion berde a entrega un presupuesto alternativa cu un amienda cu e meta pa convence gobierno cu e mester baha su gastonan coriente otro caminda pa di e forma aki usa e placa pa un miho enseñansa, un aparato gubernamental mas chikito, un infrastructura mas solido, bahamento di gastonan na un forma structura, bahamento di interes y un miho ayudo social. Pa loke ta trata e parti di ayudo social AVP lo kier mira un aumento di 50% di bijstand y bijslag y pa tambe bin cu un asina yama “schoolkinderentoeslag” pa e famianan económicamente debil den nos comunidad.

Den su presupuesto alternativa partido AVP ta reduci gastonan otro caminda pa asina cubri e 8 miyon necesario pa inverti den un miho ayudo social. Mirando e echo cu e presupuesto alternativa y e amienda corespondiente riba e presupuesto di Finansaz e fraccion di gobierno MEP a vota contra, fraccion di AVP a trata awor via e mocion aki pa insisti cerca gobierno pa tuma e problemática di pobresa na serio.

Bijstand na Aruba na momentonan aki ta Afl.325,00 pa e cabes di cas cu no tin trabaocu un bijslag di Afl.140,00 pa cada miembro di e famia cu no tin trabao. Un mama soltero cu dos yui mester biba di Afl.605,00 pa luna. Cu e gastonan actual ya no ta posibel pa biba di e placa aki, según fraccion di AVP. Banda di hisa e sumanan basico aki di bijstand y bijslag cu 50% (te na 50% di e salario minimo pa mantene e incentiva pa busca trabao) fraccion di AVP kier bin cu un sosten extra pa mayor(nan) cu tin yuinan cu ta bai scol. Pa esnan cu tin derecho riba onderstand mester bin tambe banda di e aumentonan menciona, mester bin cu un compensacion financiero (schoolkinderentoeslag) pa e yuinan cu ta bayendo scol ainda. Esaki pa yuda den nan mantencion. E mayor cu - como cabes di famia - tin derecho riba bijstand, segun e proposicion di fraccion di AVP ta bin na remarka pa haya e schoolkinderentoeslag aki. E placa aki ta bin riba e bijslag cu e mucha ta haya caba como miembro di e famia. E suma schoolkinderentoeslag lo ta 100 florin pa luna pa cada yui cu ta bai scol.

Fraccion di AVP ta motiva su proposicion mustrando riba e echo cu hendenan tin cu biba pa temporadanan largo di un entrada masha bou mes sin cu nan mes por haci algo na e situacion aki. Si structuralemnte nan no por biba di e entrada aki esaki ta causa cu e hendenan ta cai den probresa. Esaki hopi bes ta trece cu ne cu nan no por participa tampoco na e bida social. E cantidad di hende cu ta hayando nan mes den e situacion aki ta creciendo tur dia mas y mas. Ta tuma na consideracion cu prijsnan di cuminda, vivienda y tambe prijs di awa y coriente a subi enormemente den e ultimo añanan. Pero, e efectonan directo y e factor multiplicador di BBO causa na 2007 a manda e indice di prijs na un aumento alarmante te cu el a yega e percentahe record di 10.2%.

Mirando cu e aumento grandi di gasto sin cu tin un adaptacion igual di e sumanan di bijstand y bijslag di parti di gobierno ta causa un influencia negativo riba e calidad di bida di ciudadanonan kendenan sea temporalmente of pa periodonan mas largo ta biba di bijstand. Fraccion di AVP ta di opinion cu gobierno mester bin cu un plan drastico pa haci algo na e pobresa cresciente. Segun e entregadornan di e mocion ta un echo relevante cu un parti grandi di e casnan na Aruba cu tin un entrada abou no por wanta cabes riba awa mas. E fraccion berde ta argumenta cu tur forma pa combati probesa ta cuminsa dor di prome cu tur cos construi e fundamentonan pa un existencia humano. Despues e combatimento di pobresa mester bai tambe riba asuntonan cu ta bai mas leu cu solamente economia. Tambe e acento ta wordo poni riba prevencion y sosten cu bista riba participacion. Loke ta e parti material di e cuestion di pobresa e pregunta ta si e hendenan na un forma rasonabel por cumpli cu nan gastonan fiho y otro gastonan necesario. Fraccion di AVP ta enfatisa cu combatimento di pobresa no ta un monopolio di gobierno: e comunidad completo mester wordo envolvi. E famia, enseñansa, gruponan di sociedad y institucionnan religioso mester ofrece e hendenan (hoben) e fundamentonan pa por para independiente den bida. E institucionan social y organisacionnan mester cuida esnan cu a haya nan mes den problema. Promove comunitarismo y solidaridad ta di gran importancia. Sosten informal di bisiña, famia y amigonan ta di un sentido eminente pa por enfrenta contratiempo. Ademas mester tin amplio espacio di oportunidadnan riba mercado laboral y di dunadornan di trabou cu kier inverti den calidad di nan empleadonan, mescos tambe mester tin un sistema drechi di recompensa y proteccion ora di kita hende di trabou. Asina mes fraccion di AVP ta mira un responsabilidad grandi di parti di gobierno pa sirbi como un red di seguridad ora hende dor di malesa, contratiempo of desempleo haya su mes den problema. Pa esaki e adaptacion di bijstand y e introduccion di e schoolkinderentoeslag ta sibri. Esaki ta loke fraccion di AVP den su mocion ta boga pe.