Parlamentario pa fraccion di AVP, Alexander Tromp ta hanja cu e symptonan menciona ya pa algun anja atras ta hechonan y preocupacion creciente riba nos isla. Anja nobo a drenta na unda cu e pueblo no ta mira un luz pa cu solucion di e problemanan social aki.

Pesey mes durante tratamiento di e presupuesto di minister encarga cu ensejansa, asuntonan social y infrastructura, parlamentario Tromp a enfoca riba e deterioro social cu nos pueblo ta bibando den dje y di otro banda por wak via di canal Telearuba con Gobierno ta propaganda su mes cu Aruba ta den pleno progreso!! Progreso di kiko, e parlamentario ta puntra su mes.

Berdad ta cu por ejempel e asunto di chollersnan ta cay zowel bao di e carteranan di Salubridad di Minister Wever y di Husticia di Minister Croes!! Pero sigur sigur esaki ta un problema cu ta afectando e bida social di nos cuidadanonan en general drasticamente tambe. Kiko e minister di asuntonan social a hasi of purba di hasi pa cu e problematica aki creciente?? Net nada!!! Di otro banda nos ta wak minister Lopez-Tromp na Television ta corta un cinta aki, ta pone un piedra aya rondona rond di flornan y invitadonan pa un que otro proyecto pa propaganda su mes. Parlamentario Tromp ta puntra su mes ki dia pueblo por a wak e minister aki na un programma na unda e ta trese e preocupacion aki di chollersnan dilanti y kiko ta e solucion cu e como minister lo bay propone den conseho di minister pa cu e fenomeno negativo aki. Tin un ley di curatela cu a wordo introduci pa Gabinete Eman na unda e ley aki a keda unanimamente aproba door di parlamento e tempo ey! Dikon no ta ehecuta e ley aki?? Pasobra no tin placa pa cu esaki pero si pa otro proyectonan cu ta na beneficio di Gobierno?? Of acaso debi cu e proyecto di ley aki ta un iniciativa di un otro Gabinete cu no ta esun actual?? Es adictonan aki ta forma un peliger pa nos cuidadania y hasta pa anan mes. Un dos siman atras un caso tristo a keda conoci na unda cu un di e adictonan aki a drenta cas di un anciano di 93 anja y maltrata e anciano aki. Asina tin hopi casonan lamentabel cu ta sosodiendo y Gobierno na su turno ta keda man cruza y no ta hasi net net nada pa cu e problematica creciente aki.

Formashon di gangnan bao di nos juventud ultimo anjanan tambe ta un problema social creciente. Jovennan cu no menos bon intencion ta forma gangnan y asina mustra nan frustracion den nan actonan!! Acaso e problema aki tin atenshon di minister Marisol Lopez- Tromp? Ki dia nos lo wak minister na television trese e problematica aki dilanti y kiko ta su intencion pa asina trese un alivio of solucion pa cu e problema social aki bao di nos juventud?

Fraccion di AVP den parlamento durante e tratamiento di e cyclo di presupuesto pa anja 2008 a hasi un entrega di un Tegenbegroting pa asina na juda contribui na bienestar y tambe pa cu un solucion pa cu e problematica di nos jovennan. Den e Tegenbegroting ta stipula cu Gobierno mester bay introduci na nos schoolnan e asina jama “maatschappelijke stage”, cu e intencion pa nos jovennan hanja begeleiding y traha tambe den sectornan di por ejempel cuido di nos grandinan, cuido di esnan handicap.etc.

Esaki ta pa entre otro pa formashon di e karakter di nos jovennan riba nos normanan y balornan y naturalmente pa asina nan ta mas aleha for di caya y for di cosnan negativo. Parlamentario Tromp ta sigui enfatisa cu ta masha facil mes pa critica so y no trese argumentonan dilanti pa cu un solucion di un problema. Pesey mes nos Fraccion den parlamento ta trese nos criticanan y preocupacionnan pero tambe nos ta argumenta esakinan tambe y trese solucionnnan pa cu e problemanan social cu nos pueblo ta confrontando cu ne dia tras dia debi na e mal maneho y derochamiento di placa diparti di Gobierno.