Parlamentario Tromp pa fraccion di AVP ta di opinion cu e gastonan den e aparato Gubernamental cu no ta contribui na e structura economico ni na dunamento di servicio (dienstverlening) na publico, ta wordo considera como “bureaucracia” y esakinan mester wordo beperkt (restringi).

Esaki ta un di e puntonan primordial den e Tegenbegroting cu fraccion di AVP a entrega december ultimo durante e tratamiento di e presupeusto di Finansas y Economia pa anja 2008, parlamentario Alexander Tromp ta accentua. Durante e tratamiento di dicho presupuesto a keda constata cu p.e. na Directie der Belastingen e gastonan cu ta cay bao goederen en diensten, specificamente “deskundig advies” a aumenta casi dobbel compara cu anja 2007. Na anja 2007 esaki tawata casi 2 miyon 203 mil florin (2.203.000) y pa anja 2008 esaki a aumenta na un suma astronomico di 4 miyon 238 mil florin (4.238.300,00). Colmo de los colmo ta cu locual ta concerni na gastonan di personal, es decir pa esnan cu ta den servicio di Direccion di Impuesto, e gastonan ta suma na 2 miyon y mei. Kiermeen cu locual cu ta wordo paga na e “expertonan”aki ta dobbel cu locual ta wordo paga na esnan cu directamente ta den servicio di Direccion di Impuesto. No ta pornada cu hopi ta esnan cu tawata den servicio di Impuesto ta prefera di tuma nan retiro mirando e hecho cu ta prefera di paga miyones na “expertonan externo” y no ta inverti den upgrading di propio personal.

Hopi ta e empleadonan cu kisas no tin un titulo Universitario, pero sigur sigur door di anjasnan di trabao a sa di hanja nan respectivo experencianan y cualidadesnan cu kisas hopi bez ta na nivel di esnan cu ta kere cu ta nan so ta e expertonan.

Parlamentario Tromp durante e tratamento di e presupuesto a hasi e minister e pregunta dikon un suma asina astronomico mester wordo paga na “deskundig advies”. Como respuesta minister a contesta cu esaki ta necesario debi na e reorganisacion y cu Belastindienst no tin suficiente expertonan y ta pesey mes mester buska e expertonan di afor. Pa parlamentario Tromp esaki no ta un argumento convincente debi manera cu ya e la accentua di ta sigur cu Belasingdienst tin e personalnan equivalente cu kisas cu un poko upgrading of Trainig on the job por realisa e trabaonan aki tambe. Consequentemente nunca lo e departamento lo hanje den un situacion cu mester sigui buska “expertonan di afor” ora cu esnan cu tey awor nan contract termina. Y hecho tambe ta cu locual ta wordo paga na e expertonan aki no ta comparabel locual cu ta paga na esan cu ta directamente den servicio di Gobierno. Y asina poko poko ta cuminsa na elimina e fenomeno di “deskundig advies” y ta hasi uso di propio juinan di tera pa cu functionnan den kader halto. Mas cu claro tin situacionnan cu ta keda necesario pa un que otro experticio, pero no di tal forma manera ta sosodiendo actualmente, na unda na pago na deskundig advies ta dobbel compara di esnan cu ta directamente den servicio di e Direccion di Impuesto, parlamentario Tromp ta termina.