Cu caracter di urgencia, partido AVP a haya importante pa jama un conferencia di prensa ayera pa motibo di e ultimo desaroyonan den mundo di salud publico na Aruba. Pa partido AVP e tipo di negligencianan aki pa cu salud di nos pueblo.

Disidi y determina, lider di fraccion a bisa na nomber di henter fraccion di AVP den parlamento cu ta pone "Prome Minister, Nel Orlando Oduber responsabel pa tur consecuencia cu por tin pa via di e mal maneho di AZV". Sr. Eman a sigui mustra cu "aki no ta trata di un minister di Financiën, aki no ta trata di un minister di Salubridad Publico...aki ta trata di salud di un pais y un comunidad cu ta wordo hunga cu ne, pa hendenan cu no ta asumiendo nan responsabilidad manera debe ser".

Mike Eman a splica cu henter e asunto aki ta consecuencia di un maneho iresponsabel. Djies pa por mustra otronan cu gobierno di MEP lo por produci un "balanced Budget" of Presupesto Balansa, awe Aruba henter ta haya su mes den un problema grandi. AZV tin un deficit pa motibo cu Gobierno a scohe pa nos aloca placa pa AZV (y SERLIMAR tambe), siendo cu e placa ta presupuesta. "Y e falta du stimacion, e falta di responsabilidad di e gobernantenan aki, ta conduciendo na un situacion sumamente peligroso", segun lider di fraccion di AVP, Mike Eman.

"Cualke ciudadano, cu e ley aki (Lv. AZV art. 38r.) den man, tambe por bay actua contra di e gobernantenan aki, pasobra ta pa ley gobierno ta wordo poni responsabel pa locual ta trata deficitnan di AZV. Y gobierno no ta asumiendo su responsabilidad den esaki."

Finalisando e topico aki den e conferencia di prensa, Eman a reiteria cu fraccion di AVP ta pone "Prome Minister, Nelson Orlando Oduber, responsabel pa cualke cos cu por sosde un ciudadano cu pa falta di placa no por a atende na su dokter pa haya e cuido medico cu e tin derecho ariba dje, segun e ley di AZV."