E conferencia di prensa di AVP inicialmente a wordo jama pa motibo di e problemanan den AZV. Mike Eman, despues di a toca e tema central di e conferencia di prensa a haya ta importante pa trata un tema cu tambe ta mustra un decadencia na Aruba. Minister Rudy Croes a cuminsa atrobe cu gritonan independista. Loke ta straña AVP ta e posicion of mihor dicho falta di posicion di e persona responsabel pa gobierno: Prome Minister, Nelson Orlando Oduber. Pa falta di postura, prome minister ta laga duda atras di e deseo of interes di Aruba pa cu Reino.

E posicion di Minister di Husticia, banda di tin responsabilidadnan di nivel estatal e tin tambe hopi importancia den e relacionan entre e diferente partnernan den Reino. Y ta trsito cu ta net e persona aki ta lubida cu e ta un minister y di un manera iresponsabel ta manda mensahe rond di mundo cu Aruba mester cana den direccion di independencia. E pregunta clave ta e ora: Ta den nomber di ken e persona aki ta papiando?

Cada biaha cu tin conflicto pa motibo di placa, integrantenan di MEP ta cuminsa papia di independencia, pero esun cu ta hasiendo di e idea independista algo di tur dia ta sr. Rudy Croes. E silencio di Prome Minsiter, cu no ta hala atencion di e minister independista aki, ta hasi e asunto mas serio, tanto entre e partnernan den Reino y internacionalmente. Di otro banda nunca e gobierno aki ta inverti den of mustra un interes pa un Reino cu realmente ta funcciona pa Aruba. Awor aki Aruba ta mustrando Hulanda y e demas partnernan den Reino cu Aruba ta den Reino pa plaka y pa nada mas.

E realidad ta cu Aruba y su ciudadanonan tin hopi beneficio pa ta den Reino. Entre e beneficionan ta entre otro seguridad legal, seguridad di defensa (militar), cooperacion ariba tereno internacional y garantianan di Reino Hulandes. Hopi importante tambe ta e acceso cu Aruba tin pa Unio Europeo. E ultimo aki ta di importancia grandi pa futuro stabilidad y seguridad di nos ciudadanonan.

Partido AVP ta haya hopi serio cu mientras un minister ta hasi gritonan independentista un banda esun responsabel pa e gobierno, no ta tuma un postura den e situacion aki. Gabinete Oduber ta laga demasiado duda den e relacionan den Reino, pero ta mustra si, cu pa placa, Aruba ta dispuesto te hasta pa bira independiente. Tanten cu Prome Minister di Aruba no tuma un postura pa cu e situacion aki, mester compronde cu Prome Minister tambe ta kere cu independencia ta e mihor direccion cu Aruba por tuma den un futuro cercano.