Diasabra prome cu e di 54 Carnaval di Aruba, e asina jama “Green-Team” di AVP a subi caya. E meta tabata pa parti caha y saconan di sushi. E pensamento tras di esaki, e pensamento berde, ta pa un y tur cu ta celebra Carnaval 54 na banda, tin e facilidad pa tene hunto e sushi cu ta acumula durante un evento asina. Den e recorido aki por a mira un cantidad di sostenedornan di e partido, pero tambe lidernan di e partido, manera parlamentarionan Benny Sevinger y lider di partido, Mike Eman. Por a nota cu tabata tin un cantidad di sostenedornan hoben cu a tuma parti den e accion “Berde” aki.

E acohida den e multitud banda di e ruta carnavalesco tabata hopi positivo pa cu e iniciativa aki. Nos a sostene entrevista cu esnan drechando y preparando nan trailernan pa e diadomingo grandi di Carnaval y e reaccionan tabata hopi positivo. Entrenan tin un cu a bisa cu “e inicitiva aki ta algo cu ta mustra cu e hendenan di AVP ta constantemente pensando ariba con pa hasi Aruba mihor.” Un otro a splica cu “e grupo aki ta jenami di orguyo pa tene Aruba limpi”. E señora a bisa: “loke ta hacimi orgyoso di tur esaki, ta e muchanan jong cu ta sostene e iniciativa aki, e ta mustra cu e hubentud tin Aruba na pecho y nan ta move pe”.

E recorido door di e ruta di Carnaval a cuminsa pa mas o menos 8:30 for di pariba di edificio di D.O.W. cu un bus y un trailer jena cu caha. Claro, cu e musica pa trece ambiente no por a keda afor. E accion a finalisa un poco prome cu 12’or banda di Banco di Caribe na Vondellaan. E “Green-Team” e aña aki a parti mas o menos 800 caha, na casi tur skina den e ruta cu e lema “Carnaval 54 – Tene Aruba Limpi”.

Den un entrevista cu nos a sostene cu lider di e iniciativa grandi aki, Mike Eman, e la splica cu e ta masha orguyoso di esnan cu a companja e partido cu e iniciativa aki pa concientisacion di e situacion cu tin despues di Carnaval. Nos kier pa e ruta keda limpi despues di e parada. E iniciativa aki ta purba juda y trece un cambio na unda porta antes tabata keda mas sushi. Cu e iniciativa aki nos ta juda esnan cu ta wak carnaval cu un manera mas facil pa tene e sushi hunto. Consecuentemente, ora cu esnan concerni, pasa recohe e sushi, nan ta tumanan sin problema. Nos kier preveni cu sushi ta keda gespart ariba caminda of acera. Un Aruba limpi ta loke ta hasi nos tur ta mas contento y cu e gana pa enfrenta retonan manera conservacion di nos naturalesa. Y nos no tin di lubida cu un Aruba limpi ta bon pa salud di nos pueblo, y particularmente di nos jiunan. E “Green-team” ta contento con e accion aki a bay, especialmente ora mira despues di e parada con tur e cahanan tabata yen. E lider di partido despues a pasa e ruta y por a mira con tur e cahanan tabata yen y a wordo bon usa. E a haya hopi gradicimento y palbranan di pabien tambe pa e iniciativa dynamico aki. “Nos ta sigui asina cu inovacion di locual un partido politico por juda aden y inspira nos comunidad”. Especialmente contento Mike Eman ta cu e cantidad di hobenan cu a companja y juda nan den e esfuerso aki.