Nos pueblo, tur dia por lesa den corant y por wak na noticia, cuanto problema nos tin cu nos hubentud. Te cu e dia di awe, nos no por tende di nos minister di enseñansa y asuntonan social, un plan concreto di kiko lo bay haci pa cu e asuntonan aki. Ora cu mi a tende, cu tin un comicion trahando ariba e lei di “leerplicht” mi a bira contento. Pero lamentablemente ta otro di e shownan cu e minister aki ta conosi pe. E minister aki ta kere cu cada biaha, cu e mester bay staten pa trata presupuesto, ta un eleccion di reina e ta bay. E ta bay pa gana e premio di best show. Nos por corda con el a precenta su “Nacional Onderwijs Plan” “Eind Toets Primair Onderwijs”, bishita di inspeccion di hulanda na colegio Arubano, Centro ortopedagogico. Por cierto un pabien na e muchanan di E.P.I un bunita comedia. Pero lamentablemente despues di tur e cos nan aki, bo no ta tende ni mira nada mas. Tur cos ta keda na esey na un apertura, un show y of un rapport y nada mas no ta pasa.

LEERPLICHT

Esaki ta djis si minister no tabata sa, lei di enseñansa obligatorio tin como meta primordial pa brinda tur mucha e oportunidad di forma parti di nos enseñansa. Kiermen e parti mas esencial di e lei aki, ta cu gobierno mester garantisa educacion pa tur muchanan, ariba Aruba. Manera e difinicion di e palabra “leerplicht” ta bisa, ta obliga pa mucha di un edad determina sigui enseñansa. E lei aki no ta pa “drop outs” alcontrario e lei aki ta por sirbi pa baha absentismo den scolnan y garantisa participacion di tur mucha, no por exclui ningun mucha di e derecho sagrado di risibi educacion. Minister tin un idea, con halto absentismo ta na nos scolnan?. Minister tin un idea di cuanto mucha no ta participa den nos enseñansa, ora mi ta papia di no ta participa, mi no ta papia di 200 y pico “drop outs” cu e raport di minister ta papia di dje. Mi ta papia di esnan cu ta sinta na cas y no a ni jega scol mes aind. A.V.P ta un partido cu semper a traha pa enseñansa, semper A.V.P a boga pa lei di enseñansa obligatorio, es mas nos a laga e concepto di lei cla pa wordo presenta, acepta y wordo ehecuta. Pero manera semper enseñansa no tin preoridad pa M.E.P., consecuentemente e concepto di lei cu A.V.P a laga atras e keda den lachi, si e no a wordo benta afo caba. Minister ki dia e raport cu minister a laga traha tocante di “leerplicht” lei di enseñansa obligatorio lo bira publico of e lo keda scondi mescos cu e esun di N.O.P.

COLEGIO ARUBANO???

Raport di inspeccion di enseñansa di Hulanda, a wordo entrega y te awe nos no a tende nada. Kiko ta bay pasa cu Colegio Arubano?

Minister ta bay sigui prop mas trailer den cura di scol? Nos lo bay haña un di tres Colegio Arubano, Playa, Sanicolas y kisas Noord? Of nos ta bay warda, pa mas resultado desastroso y tira culpa ariba carnaval, muchanan cu no ta motiva, of maestronan cu lo no ta haciendo nan trabou debidamente?

Minister a jega tempo pa Aruba cuminsa haña claridad di kiko minister kier haci cu nos enseñansa. Nos no por sigui den e incertidumbre aki. Gran cantidad di mucha te keda sinta y of “druip”, tur aña raport ta wordo traha pero no ta mira cambio. Minister a bira tempo pa mara faha y cuminsa traha!

UN TUNEL SIN SALIDA

Nos falta mas o menos 4 luna y mei, pa jega na un otro fin di aña escolar. Mester bisa aseca, cu nada concreto no a tuma lugar pa cu enseñansa. Te cu dia di awe ningun hende, no sa kiko ta bay ta e rol di papiamento den nos enseñansa. Cantidad di experto ta entrega, raport na minister y nada no tin bin afo. N.O.P ja a expira su fecha ja a caduca. Enseñansa obligatorio “leerplicht” tambe lo core cu e mesun suerte?

Minister enseñansa no por warda mas mester di claridad tanto pa e pueblo, como pa esnan cu ta directamente envolvi den enseñansa. Mester di claridad pa por reina trankilidad.