Lesa carta pa Min. Swaen

Partido AVP, a jama ayera atardi un conferencia di prensa cu caracter di urgencia pa pone atencion ariba e problemanan di AZV cu ta montanto. E partido kier a trece padilanti nan disgusto y preocupacion pa e situacion financiero cu gobierno ta lagando e organo di seguro aden. Lider di fraccion, Mike Eman a hiba palabra y a splica cu nan a manda un carta pa presidente di parlamento pa e percura pa minister Nilo Swaen, encarga cu Finanza Publico y Economia, haya e carta aki mas liher cu ta posibel.

Segun Eman, nan ta hayando masha reaccion ariba e polemica entre dokternan y AZV for di tur angulo den comunidad. E situacion aki cu a conduci dokternan di cas na cobramento pa consulta, pasobra nan no ta hayando pago pa nan servicionan for di AZV. Di su parti AZV ta bisa di no ta hayando suficiente placa for di gobierno. E situacion aki algo hopi serio y delicado. Loke ta mas desastroso di e situacion aki ta cu e por tin consecuencianan serio pa salud y bida di hende. Tin hendenan cu e medida aki por obliga nan keda sin bay dokter cu e consecuencia cu nan lo por haya problema cu nan salud of te hasta perde nan bida. Y tur esaki pa negligencia di gobierno.

	.
	Click e imagen ariba pa un version mas grandi
	.

Segun parlamentario y lider di fraccion di AVP ta splica, cu den articulo 38r, di Landsverordening Ziektekostenverzekering, ora cu AZV tin un deficit, e mester notifica gobierno di e situacion y consecuentemente gobierno mester responde na AZV con e ta bay percura pa e deficit financiero aki wordo coregi. “Nos sa cu den November caba sr. Swaen a bisa cu e la wordo informa”, segun Eman. Pero tur esaki ta mas di 2 luna pasa caba y ta parce cu gobierno no tin pura pa soluciona e problema delicado y serio aki.

Den e carta fraccion di AVP ta duna Minister Swaen, 24 ora pa responde kiko e responsabilidad cu gobierno ta bay asumi ta den e caso aki. Tambe nan ta intresa den e informacion di for ki tempo minister Swaen a wordo poni na altura di e situacion aki. E preguntanan aki ta hopi importante pa bin claridad ariba nan, pasobra den e momentonan aki nos tin un situacion caminda bida di hende y salud di nos conciudadanonan ta wordo poni na peliger y gobierno ta negligente den henter e asunto aki.

RESPONSABELNAN

"Esnan cu tin un responsabilidad legal segun e articulo aki (Lv. AZV art. 38r), ta gobierno y esnan di AZV", segun Sr. Eman. E articulo di e “Landsverordening Algemene Ziektekostenverzekering”, ta splica tambe cu di parti di AZV tambe por exigi un respuesta y/of posicion for di gobierno. “Tur e hendenan aki ta responsabel”, segun Eman, “si mañan algo mester sosode cu cualkier ciudadano di Aruba cu no por a busca su salud, pa via di e situacion aki”.

For di parti di miembronan di prensa a bin e pregunta cu si sr. Eman ta mira un solucion, mirando cu gobierno no tin placa. Segun Eman e no ta accepta e excusa aki. E “Presupuesto Alternativa” cu AVP a entrega final di aña 2007, a mustra cla y raspa cu tur e problemanan cu nos tin aki ta cuestion di “na unda placa ta wordo aloca y pa kiko”. E gobierno aki a haya 130 miyon florin extra na B.B.O. “Sin B.B.O. mes nos por a carga AZV, debe y otro responsabilidadnan di gobierno. Awe cu B.B.O. gobierno nos no por carga A.Z.V.?”

Y tur esaki ta despues cu e gobierno aki a subi prima di AZV cu 2% y a subi premiegrens. Tur esakinan a trece miyos di florin extra den caha di gobierno. “Pa nos e ta inacceptabel!”, segun Sr. Eman.