Den un carta pa Nilo Swaen, Minister di Finanzas y Economia, fraccion di AVP ta pone gobernantenan responsabel pa e situacion di crisis den salubridad publico na Aruba. Den e carta e fraccion di AVP ta mustra cu na e momentonan aki tin un crisis den cuido medico caminda salud di nos ciudadanonan ta coriendo peliger. AZV ta comunicando na proveedornan di servicio cu nan tin un deficit grandi y como tal no por cumpli cu pago na nan. Esaki a conduci na accionan cu ta creando un situacion sumamente peligroso pa salud y bienestar general di pueblo.

	.
	Click e imagenan ariba pa un version mas grandi
	.

E fraccion di AVP ta referi na Landsverordening algemene ziektekosten (LvAZV) cu ta mustra claramente cu gobierno tin e promer responsabilidad na momento cu AZV tin un deficit. Den e carta Articulo 38r di LvAZV ta worde cita pa e minister: “Indien zich in een dienstjaar bij het Fonds een structureel tekort dreigt voor te doen, stelt het uitvoeringsorgaan de minister, belast met financiën, en de Raad daarvan onverwijld in kennis; artikel 38q, eerste lid, tweede volzin, is van toepassing, met dien verstande dat het verslag tevens voorstellen bevat tot beperking van dat tekort. De minister, belast met financiën, beslist binnen dertig dagen na ontvangst van een kennisgeving als bedoeld in het eerste lid, of de Landsbijdrage verhoogd wordt”.

A base di esaki fraccion di AVP ta mustra cu Minister di Finanzas dentro di un (1) luna mester a reacciona riba e situacion di deficit di AZV pa resolve e problema. Na november 2007 caba Minister a bisa di ta na haltura di e situacion di deficit na AZV. Fraccion di AVP ta mustra cu incumplimento cu e responsabilidad legal aki Minister y gobierno ta haci nan mes culpabel y responsabel pa e concecuencianan cu e situacion aki ta causa pa pacientnan na Aruba. Tambe e organo di AZV cu tin e responsabilidad di exigi cumplimento di gobierno ta core cu e risico di culpabilidad y responsabilidad pa tur locual sosode como concecuencia di no a enforsa su derechonan a base di e ley di AZV.

Fraccion di AVP ta exigi un accion inmediato di Minister di Finanzas y gobierno den cuadra di articulo 38r y 38s pa atende cu e deficit di AZV. “Nos ta pone esnan, cu derecho y responsabilidad pa actua segun e articulonan aki, responsabel pa e concecuencianan cu e negligencia pa haci tal causa” e carta ta bisa. Fraccion di AVP ta spera riba un respuesto y accion di Minister dentro 24 ora. E carta a worde firma pa parlamentarionan: mr. M.G. Eman; O.B. Sevinger; M.E. de Meza; drs.R.A. Lee; O.E. Oduber; mr.drs. A.L. Dowers; C.V. Haynes; A.F. Tromp.