Den e conferencia di prensa cu AVP a jama ayera atardi pa motibo di e deficit cu tin den AZV, drs. Andy Lee a trece tambe un otro topico hopi delicado padilanti. E topico aki ta asina delicado cu e lo por tin consecuencianan personal pa minsiter Marisol Lopez-Tromp.

E topico tin hasi cu e buraco cu e minister a “tapa” di presupuesto di "Dienst Openbare Werken". 2006. Segun Andy Lee, fraccion di AVP a puntra e Minister Marisol Lopez-Tromp na varios occasion y durante varios reunion di presupuesto (2007 y 2008) pa aclaracion di e manera cu e la regla e asunto di overschrijding di e presupuesto di e departamento importante aki di gobierno, esta D.O.W.. Pesey mes fraccion di AVP a disidi di trece dilanti un mocion durante reunion andando den Staten pa Parlamento distancia su mes publicamente for di henter e asunto aki. E motibo cu e fraccion a trece e mocion aki dilanti ta pa motibo cu no tin un claridad di con e proceduranan aki a bay. Tambe e fraccion ta kere cu e manera di traha aki ta bay encontra di e proposito di un parlamento, esta di controla gobierno.

E mocion ta bisa lo siguiente: “Ta disidi cu minister di enseñansa, asuntonan social y infrastructura no por a duna prueba contundente di a formalisa e “dekking” di e “overschrijding” di e ley di presupuesto 2006 di Dienst Openbare Werken conforme ley di comptabilidad di 1989 y cu Staten como organo legislativo cu ta controla maneho y ehecucion di maneho di gobierno no por para responsabel pa e proceduranan cu ta sigui pa regla e “dekking” di “overschrijding” den e ley di presupuesto 2006 di Dienst Openbare Werken y cu Staten, ta na momento cu minister di enseñansa, asuntonan social y infrastructura a duna cuenta explicitamente di e manera con a formalisa e “dekking” di “overschrijding” den e ley di presupuesto 2006 di D.O.W. ta distancia su mes publicamente di e manera cu e minister a formalisa e “dekking”.

ALGEMENE REKENKAMER

Segun e miembro di parlamento di e fraccion di mas grandi di oposicion, un carta di Algemene Rekenkamer tambe ta hala atencion ariba e asunto aki. Segun Andy Lee, e organo di conseho aki ta hopi cla y duro. Algemene Rekenkamer ta indica cu e forma con a regla e asunto aki no ta conforme ley y ta pone Minister Marisol Lopez-Tromp personalmente responsabel (conforme articulo 31 di e ley di contabilidad). Esaki ta mustra cu e problema aki ta hopi mas serio cu hopi ta kere.

STEMPEL PARLAMENT

Maske cu fraccion di AVP a pone un cantidad di pruebanan ariba mesa (e.o. carta di Algemene Rekenkamer), Parlamento di Aruba ta cay bek ariba e problema basico y cardinal: Stempel Parlament! Fraccion di MEP, maske cu tur e pruebanan aki ta pone nan cu lomba na muraya, no ta sostene e mocion y ta prefera pa tapa wowo pa e berdad y ignora conseho di entre otro Algemene Rekenkamer.