Cu mas entrada for di impuesto di BBO, cu mas comision y raport riba mesa, cu mas di dos aña den e funcion di minister di enseñansa, e expectativanan pa e presentacion di maneho pa mehora enseñansa di Aruba durante di e tratamento di presupuesto 2008 tabata grandi. Cu tristesa grandi sinembargo, nos a sigui e tratamento di presupuesto di enseñansa den parlamento! Cu solamente algun excepcion e nivel a laga masha hopi di desea. Papiamento riba e sorto di material cu a usa pa drecha dak di un scol simpelmente no ta tarea di parlamento y minister, mientras cu tanto asunto di maneho urgente cu no ta ni wordo menciona. E desapunto principal tabata e forma cu minister Marisol Lopez-Tromp a trata di defende su presupuesto: e minister no a presenta un maneho cu mester ta e base di e presupuesto; e no a splica kico, pakico ni con e ta bai atende problemanan serio cu tin den enseñansa. Djies bisa cu su “maneho” ta basa riba su filosofia “holistico” no ta acceptabel, hasta incomprendibel. Nos conclusion di tratamento di e presupuesto 2008 ta, cu no por spera un maneho di enseñansa di e minister aki cu lo trece e cambio fundamental y permanente den enseñansa, cu nos enseñansa y Aruba tin mester tanto awor aki! Asuntonan manera e idioma di instruccion den enseñansa basico, cambionan necesario den enseñansa basico p.e. introduccion di un curriculo comprehensivo, e formacion y profesionalisacion continuo di maestronan di scol den un forma structural, e mehoracion di resultadonan di nos studiantenan den enseñansa superior den exterior, evaluacion (visitatie/accredidatie) di UA y IPA, etc. etc.

COMPLEXIDAD TA REKERI CLARIDAD

Enseñansa ta un tereno compleho: tin mas cu 20 mil alumno ta atende e mas cu 70 scolnan na Aruba. Tin mas cu 1500 maestro di scol y otro profesional y personal administrativo ta traha den enseñansa, di cual mas cu 200 na Departamento di Enseñansa. E ta e presupuesto mas grandi di gobierno (Afl 370.8 mln / 33 % di suma total di presupuesto 2008) Banda di gobierno tin mas o menos 7 organisacion cu tambe tin un cierto grado di autoridad den maneho y tumamento di decision. E complexidad aki so caba ta rekeri un claridad riba e forma di atende asuntonan den enseñansa. Djies papia di transparencia y participacion no ta suficiente? basta. E ta exigi hopi mas! E echo cu enseñansa ta un tereno asina compleho, cu hopi factor, interes, hende, organisacion y placa envolvi, ta exigi un maneho cla, di corto y largo plaso, di fihamento di prioridad y alocamento di fondonan na un forma cu ta duna confiansa cu e resultadonan desea lo bin. Lamentabelmente nos no a wak nada di esaki den e presentacion di minister durante di tratamento di presupuesto. Sea minister tin asina poco respet pa parlamento cu ela limita su mes na contesta preguntanan den un forma cortico y pura, o sea e no ta haya parlamento e luga pa presenta su “maneho” manera ta e caso den un democrasia parlamentario. Den e ultimo caso aki nos por spera presentacion di e “maneho” cu nos no a tende den parlamento, den programanan orchestra na television caminda no por haci pregunta? Si esey ta e caso, minister por conta cu di e mes un forma aki e lo haya preguntanan pa contesta y forsa pa responsabilisa su “maneho”.

CON?

Un di e aspectonan mas importante di maneho ta e forma cu ta bai realisa e maneho: cua instrumentonan ta bai usa, con e proceso lo ta, cuanto tempo e ta bai dura, con ta financia e plannan, etc. Djies menciona metanan general of hasta vago, sin splica con ta bai yega na logra e metanan, ta e forma di politica non-profesional cu den enseñansa nos ta fada di dje. No por accepta mas cu un minister ta mustra riba un articulo den un corant Hulandes pa mustra cu ayanan tambe nan tin e problema cu nos tin. Y tampoco no ta acceptabel mas pa djies mustra cu na Corsow tin un preocupacion manera di Aruba, sin splica con aki na Aruba e minister responsabel pa enseñansa ta bai atende e problema! No ta acceptabel mas cu e minister di enseñansa ta menciona y referi na raportnan cu ela laga traha, sin splica con e ta bai usa e recomendacionnan y pakico. No por sconde mas tras di raportnan di expertonan riba enseñansa obligatorio of trahamento di scol, mientras cu tin indicacion cu mas mucha ta keda sin bai scol! No ta acceptabel mas pa presenta plan sin presupuesta e costonan. Nos a y ta spera mas! Loke nos ta spera den enseñansa ta claridad riba con ta hisa e calidad, con ta bai cumpli cu e speransa di majornan, alumnonan, maestronan y organisacionnan responsabel, cu e placa riba presupuesto y e sosten sincero di e minister lo tey pa e unico meta di mehora enseñansa pa tur alumno! Ta solamente cu un maneho realistico y sincero asina por cuminsa haya e sosten di tur envolvi pa trece e cambio necesario den enseñansa! Loke e minister a trece no ta tur cu tin. Mester por miho! Aruba merce miho!