A tuma varios resolucion incluyendo cu partido lo sostene accion di Pensionadonan Na Cas di Partido AVP, Playa, ayera a anochi, un cantidad grandi di hende a aglomera. E motibo pa esaki ta pasobra conseho di partido di e partido a jama un reunion extra-ordinario cu lo trata e ultimo desaroyonan den entre otro salubridad publico na Aruba. E ta un secreto publico na e momentonan aki cu gabineto Oduber ta pensando seriamentoe pa hisa prima di AZV y/of introduci un eigenbijdrage.

E problema di liquidez di gobierno no ta algo nobo. E ta resultado di un mal maneho di di recursonan publico y inversionan sin sentido di placa di pueblo. Despues cu a impone B.B.O (Belasting op Bedrijfsomzetten) na final di aña 2006. E consecuencia di e introduccion di B.B.O. tabata ta un inflacion (nunca bisto) di 10.2% na final di 2007. Contrario na nos bisiñanan den region Caribense y nos partner comercial di mas grandi y importante (Merca), nos inflacion ta for di tur proporcion. Compara cu esun di Merca, e inflacion na Aruba ta mas cu dobbel (pa mas informacion, click aki).

E efecto cu B.B.O. tabata y ainda tin y lo keda tin ariba nos pueblo ta hopi grandi y ta pesey mes e situacion no mag di bira pio. E reunion di partido AVP tabata specificamente pa discuti e hechonan aki y e posicion cu partido mester tuma. Aruba no por sostene mas medida. Y den un horizonte demasiado serca, Aruba confrontando un futuro cu mas medida. Na 2005 tabata tin un subida caba den e prima di AZV y tambe e premie-grens. Invoerrechtenan a wordo hisa y tambe a hisa prijs di un cantidad di servicio di gobierno, manera entre otro prijs di passpoort, Id, permiso di taxi y autobus y tambe rijbewijs (pa djies menciona algun).

E anochi aki a cuminsa cu un itroduccion di Otmar Oduber cu a splica con nos a jega na unda nos ta awor aki. E hecho ta keda cu placa a wordo mal gasta ariba cosnan cu no tin niun sentido pa bienestar di pueblo. E consecuencia ta cu pueblo mes no ta wak e beneficionan, pero esnan cu ta wordo beneficia ta “Family & Friends”. Arthur Dowers a hiba un discurso elocuente y a mustra ariba e hecho cu na Aruba hopi hende ta desea y kier cambio. E la argumenta cu te hasta hendenan di MEP ta aserca nan pa baha e gobierno aki, pero nan ainda tin miedo pa mustra nan disgusto abiertamente. Pero pa e resto di pueblo, y esaki ta e grupo mas grandi den nos comunidad, e no ta escohencia mas. E presion economico ta asina gandi cu e ta causando problemanan social entre otro. Parlamentarionan Andy Lee y Alex Tromp tambe a hasi discursonan, sigui pa Candidata ariba lista di AVP, Clarisca Velasquez, cu a caba su discurso cu e frase, “ami no kier papia mas, nan mester baha!” Cu un aplauso grandi e la caba su discuso pa Baba Herde introduci lider di e partido Mike Eman.

Sr. Eman a splica cu nan a wordo aserca pa algun pensionado pa asina duna nan sosten pa un accion pa manifesta nan malcontento. E la splica cu e grupo aki tin hopi di perde si bin cu mas medida. Y si e medida aki ta trata di AZV, nan posicion economico lo bira desastroso. Nan tin hopi di perde si por ehempel gobierno introduci un “eigenbijdrage”. Pensionadonan, pa motibo di nan edad ta bay dokter hopi mas cu un persona di menos edad. Tin pensionadonan cu pa motibo di nan salud tin cu bishita dokter varios biaha pa aña y un eigenbijdrage lo pone un presion economico ariba nan. Entrada di un pensionado ta hopi abou, specialemente si mira con B.B.O. a causa prijsnan subi drasticamente e ultimo aña aki.

Na final di e anochi aki, a aproba 3 resulocion: