Ta un hecho hopi tristo mes pa tuma nota con nos grandinan despues cu pa decadasnan a duna nan aporte na nos pais Aruba pa awe mira nan den un situacion cu nan no merece, parlamentario pa fraccion di AVP, Alexander Tromp ta enfatisa. Danki na nos grandinan Aruba ta unda e ta awe y nos por goza di e abundancia di nan labornan cu nan a eherce den nan tempo joven. Pero lamentabelmente un Gobierno sin sentimientonan pa cu nos grandinan y pueblo en general ta eherciendo un maneho irresponsabel durante e ultimo anjanan cu consequentia cu nos tur conoce: MEDIDA!!!

Parlamentario Tromp ta sigui splica cu esnan cu a wordo mas afecta cu e mal maneho di e Gobierno actual ta esnan mas vulnerabel den nos comunidad. Aki e parlamentario ta referi na esnan cu ta pensionadonan, esnan cu ta cobra un sueldo minimo, esnan cu ta cobra onderstand etc.. Mester menciona cu den e grupo aki esnan mas afecta ta e pensionadonan debi cu for di nan entrada anual, nan tin di paga e prima di AZV completo cu ta 9,5%. Es decir mientras cu tur otro cuidadano cu ta den e sector laboral ta paga 1,6% y su donjo di trabao ta paga e restante 7,9%, nos grandinan ta paga e prima completo, manera ya cu e la menciona.

Sin conta tur e otro medidanan cu Gobierno a bini ta ehecutando durante e ultimo anjanan y principalmente e introduccion di BBO, cu a afecta e poder di compra di nos cuidadanonan y principalmente nos pensionadonan drasticamente, parlamentario Tromp ta enfatisa. Den various ocashon e organisacion cu ta representa nos pensionadonan y nos grandinan a aserca Gobierno y Parlamento pa cu e preocupacion y e situacion cu nan miembronan ta bibando aden. Pero lamentabelmente no tin oido pa es grupo aki cu merece tur clase di comprension. Parlamentario Tromp ta sigui elabora cu hasta durante tratamiento di e presupuesto di e ministerio di Finansas pa cu anja 2007, su fraccion di AVP a hasi un peticion den forma di un mocion den parlamento pa urgi Gobierno introduci un aftrek riba e inkomstenbelasting di e pensionadonan di 8% di e entrada bruto annual. Esaki ta un peticion cu e organisacion OPPA a llega di hasi na Gobierno y ta pesey mes saliendo na defensa y comprondiendo e situacion cu nos pensionadonan ta aden, nos fraccion a tuma e iniciativa aki pa hasi entrega di e mocion cu dicho contenido. Pero manera semper e koor di 11 parlamentarionan cu ta sostone Gobierno a vota contra!!

Riba dje nos tur sa cu nos grandinan hopi bez ta frecuenta dokternan pa cu nan salud y riba dje mester paga for di nan propio saco cierto remedinan cu AZV a laga kita for di e lista di remedinan y asina por sigui duna mas ehempelnan. Ta pesey mes parlamentario Tromp ta compronde y ta solidario tambe cu e iniciativa di algun pensionadonan pa cu entrega di un peticion na Gobierno pa asina Gobierno atende nan riba nan dolor y situacion financiero cu no ta cos di gaba y ta spera cu Gobierno tin comprension tambe pa cu esaki, parlamentario Tromp ta termina.