Mientras mundo henter, ta haci tur loke cu tin na nan alcanse, pa honra derechonan di mucha, aki na Aruba nos ta wak con muchanan ta wordo lubida, nan no por haña enseñansa cu nan mester pa nan formacion. Mientras nos tur cu tin algo di haber cu enseñansa mester por sa, cu Aruba ta forma parti di e tratado tocante derechonan di mucho cu Reino a firma ya algun aña atras. Articulo 26 di e tratado aki ta bisa lo siguiente: “Tur hende tin derecho riba enseñansa. Enseñansa lo no costa nada, alomenos pa loke ta toca enseñansa preparatorio y basico. Enseñansa basico lo ta obligatorio.”. Pero awe muchanan ta bay scol sin come debi na e pobresa cu ta asotando nos pueblo; bida social ta hayando tur sorto di golpi y dia pa dia ta deteriorando. Den e tratado aki tin un otro articulo, esta articulo 25 cu ta bisa lo siguiente: “Tur hende tin derecho riba alimentacion, vivienda, paña y ayudo medico y social.”. Esun prome yama pa salbaguardia e derechonan aki, ta gobierno y pa ta mas specifico den e caso aki, nos minister di enseñansa y asuntonan social. Manera nos tur por wak y nos tur sa esaki bon bon cu e minister aki ta masha poco activo den e caso aki.

KI DIA AWOR

Awe ya ta 4 luna pasa, cu minister a instala un comicion, pa evalua introduccion di enseñansa obligatorio. Loke nos por a tende te awe di e trabounan di e comicion aki ta cosnan cu tur hende cu ta traha den enseñansa sa caba, esta cu nos mester di un miho infrastructura, nos mester di un miho cuido social pa cu nos muchanan, mester di mas maestro etc ... Kiko esaki lo kier men pa e ley di enseñansa obligatorio? No tin placa pa implemente? Of simplemente minister no ta interesa, pa pone placa disponible pa introcuccion di e ley aki?

Kisa minister ta prefera di sigui usa e fondonan cu e tin na su disposicion pa un otro show of proyectonan? Of kisas mas raport? Loke nos por conclui despues di a mira con e minister aki ta trata cu e carteranan cu e tin na su encargo y sigur esaki ta conta pa esun di enseñansa, ta cu masha poco resultado positivo ta visibel.

Por ta cu nos lo mester sigui warda, pa mas raport y mas show, prome cu e minister aki disidi pa intoduci e ley di enseñansa obligatorio. For di e modus operandi di e minister aki nos a conclui, cu no ta bay pa enseñansa sino pa e grandesa y fama personal di minister.

LEY DI ENSEÑANSA OBLIGATORIO

E meta principal di e ley di enseñansa obligatorio ta pa granatisa, cu ningun mucha lo perde dianan di scol, cai atrás cu nan desaroyo, consecuentemente keda sinta, frustra di e experiencia negativo di faya, consecuentemente desperdicia e oportunidad unico cu enseñansa ta duna, esta di mañan por disfruta di un mihor bida.

AWE FALTANDO APENAS UN PAR DI LUNA PA FIN DI AÑA ESCOLAR

Mi ta spera cu nos minister di enseñansa, y asuntonan social, corda riba e diferente articulonan cu tin den e decreto, cu ta bisa con un gobierno mester carga e responsabilidad pa cu su pueblo.

Manera articulo 29 ta bisa tur hende tin e deber di respeta e derechonan y libertadnan di otro hende y tene cuenta cu e leynan stipula. Esaki ta bisa nos, cu ta imposible cu awe aña 2008, tin muchanan na cas sin por bay scol, pa motibo di burocracia di un gobierno dictador, cu ta trapando ariba e derechonan di e pueblo.

Mi ta spera cu awe mas cu nunca, minister pone debido atencion na e problematica aki y bin cu e ley di enseñansa obligatorio, pa e muchanan cu awe ta na cas por bay scol pronto. Minister nos ta spera, cu bo persona no bay haci politica cu e ley aki y sigur no bay use como cabay di campaña, pa logra gana simpatia, nos muchanan y comunidad den su totalidad ta angela pa e ley aki.

Na parecer di plataforma di enseñansa di partido A.V.P e muchanan y comunidad den su totalidad tambe merece mihor.