Mi ta cita: “Mester caba cu inhusticia prome cu por reina harmonia den nos pais!” Esaki ta e cabes di un articulo skirbi na juni 2001, pa e tempo ey, parlamentario di pais Aruba, drs. Marisol Tromp, den cuadro di politica nobo. Ironia di bida ta mustra nos cu awe tin mas inhusticia cu nunca ariba e pida baranca aki. Talbes ta e malesa, di e lider di partido M.E.P a contagi’e, esta cu den campaña e ta bisa algo anto na momento di goberna e ta hasi otro? Of ta e malesa di Chonini “come y lubida” nos minister di enseñansa, infrastructura y asuntonan social tin? Mester haci un C.T scan pura cune pa nos por sa ta kico e tin. Sigientemente mi ta bay elabora algun di e puntonan cu e tempo ey parlamentario y awe minister a elabora aribanan.

Kibra cu stempel parlament...

Den e ultimo 7 añanan Aruba a conose e 11 parlamentarionan di mas bergonsoso di e 22 aña di su existencia como pais Aruba. Marionetanan cu no tin opinion propio, cu no por ni expresa nan mes drechi y tur loke nan ta haci ta grita “voor” ora cu nan lider bisanan. Parlamentarionan cu ta vota abase di fabor personal, cas na prijs di baca flaco, paga hypoteca etc… Ora cu nos a kere cu M.E.P, tabata tin hendenan drechi den parlamento, pa para banda di pueblo y controla gobierno, tabata net lo contrario, nan tabata fiel na nan amo Nel, manera un cacho ta fiel na su amo y manera hopi di nan mes a confirma, poniendo stickernan ariba nan auto cu e slogan FIEL.

Kibra cu nepotismo...

Mi kier sa si e minister aki sa kico e palabra aki kiermen of el a lubida kico ta e significacion di e palabra aki, paso na Aruba no tin un gobierno cu a practica nepotismo manera e gobierno di M.E.P. Nos por a lesa den diferente medionan di comunicacion tocante container di T-shirt, 1.000.000 di Namdar, a cambio di fabor. Ruman di lider di M.E.P ta haña miyones pa traha “deal” cu China y India, Nel Oduber tin ful su famia den gobierno, minister Lee su jiu ta haña un salario barbaro sin estudio, pueblo ta paga pa cas di sobrina di minister Lee na Jaburibari, sin lubida e salario barbaro cu e ta risibi . Rudy ta huur edificionan di famia pa un suma di 7.000.000 pa aña y asina nos por sigui menciona. Marisol ta e unico cu aparte di haci su ruman hefe di noticia di tele Aruba y manda tur raport, pa compaña di su casca traha a dunanan Aruba completo na oportunistanan. Tereno pa Friends and Family manera a ser publica den diferente matutino e tan popular Moris gate Moris, bodigard gate etc.. Pero pa e simpel trahado si no tin nada. Hypoteca di 1.000.000, brug di 600.000, etc. Nan ta mucho pa menciona. Ki berguensa, foei Marisol mi a spera mas di bo.

Pueblo no ta haña oido serca gobierno...

Esaki si ta grandi, definitivamente e minister aki a lubida por completo kico el a skirbi den e articulo di dia 19 di juni 2001. No tin suficiente palabra pa splica e falta di respet y oido di gobierno pa cu e pueblo aki. E gobierno aki no solamente no ta scucha e pueblo pero simplemene a bira asta sordo pa e grito y yantonan di e pueblo aki. Pa colmo mi no por corda cu mi a jega di wak minister Marisol bin tuma o alomenos acompaña su coleganan ora cu un of otro organisacion a bin entrega manifesto. Anto e ta papia di bira sordo, di falta di respet pa pueblo “kom nou” Marisol.

Campaña ta un gobernacion ta otro...

Después di a analisa e articulo cu awe minister, Marisol Tromp a scirbi dia 19 di juni 2001, den e prestigioso matutino Diario. Mi por conclui cu e politico aki, ta un politico di palabra nenchí sin contenido. Un politico cu ta laga inhusticia prevalese ariba e pida baranca aki. Talbes ta dor di wak e bagamunderianan aki, nos hobennan no kier bay scol mas? Nan ta mira cu famianan di ministernan, ta haña trabou serca di minister cu salario halto sin importa estudio, amigonan ta haña terenonan pa supuesto projecto, y despues esakinan ta wordo bende, pa prijsnan miyonario.

E gobierno aki a kibra tur regla di contabilidad...

Gobierno ta gasta placa di pueblo, sin entrega un presupuesto na tempo, na parlamento. Pa colmo e aña aki por fin un presupuesto, a wordo entrega na tempo, después di 7 aña di e gobernacion, awor ta resulta cu expertonan ta bisa, cu nan ta mira un buraco di 100 miyon den e presupuesto aki. Foei Marisol bo a faya barbaramente. E puntonan aki ta puntonan, cu abo a trece dilanti 7 aña pasa. Bisando cu gobierno anterior lo a faya aribanan. Marisol kiko bo gobierno a haci ariba e puntonan aki? Bay wak pa bo mes y lo bo ripara cu ta un desastre completo boso a haci. Bo no tin ningun autoridad, pa cuestiona ningun hende awe. Despues di tur loke bo a haci, foei Marisol foei, mi a spera mas di bo.