Unda e caracter social di gobierno y gremionan na Aruba a keda, unda e balor y norma di e gobierno y gremionan na Aruba a keda pa percura y sigura cu tur hende y sigur tambe e ciudadanonan fisicamente y/of mentalmente limita tin e derecho y herment pa por desaroya y disfruta di un bida mas humanamente corecto y satisfecho cu ta posible. Ta kende a wordo perhudica ora e compania di gobierno d transporte, Arubus, a stop di duna servicio di transporte na SVGA: ta esnan cu menos por defende nan mes a wordo perhudica, nos hendicapnan! Na ningun momento un di e ministronan a sali na vanguardia di nos handicapnan, ni Minister di Asuntonan Social Marisol Lopez-Tromp y ni Prome Minister Nel Oduber. Alcontrario, cada un minister den Gabinete Oduber a sali bisa cu ta falta di SVGA y ta bon cu a stop e transporte! Parlamentario di fraccion di AVP, Mike de Meza ta expresa cu lamento den su stem y ta agrega “Que berguenza, un set di burdugo so por tuma un postura asina antisocial. Unda of con baho e respet, balor y norma di un gobierno of un ser humano por cai. Anto nos tur, cada un ciudadano, mester puntra su mes si embedrdad nos ta un pais desaroya. No mester tin pretencion of orguyo falso, nos mester ta honesto cu otro”.

E ta agrega cu ora cu docternan di cas a cuminsa cobra paciente Afl 10 pa consulta tur ministro y gremionan (comercial y sindical) a grita cu ta e homber y muher trahado atrobe ta wordo perhudica y cu e docternan por a bai corte prome. E pregunta mas cardinal ta: ta kende su falta? Ta kende ta e promer cu no a cumpli cu su debernan? E gobierno actual ta culpable, si gusta of laga. Cada ken por bai averigua den presupuesto con e gobierno actual ta keda aumenta su gastonan den un forma barbaro y sin disciplina y ta purba di balanza e presupuesto riba mas y mas medida. Atrobe pa aña 2008 gobierno a bolbe aumenta entre otro huurmento di edificio for di “friends and family” cu otro 5 miyon florin. Gobierno actual ya ta den gobernacion pa siete (7) aña y ya no por culpa ningun hende mas pa e desaster cu nan ta crea tur dia mas y mas.

Awor cu Arubus a corta e servicio na SVGA, nos hendenan hendicap a wordo perhudica. Arubus no a bai huez prome, pero a corta e servicio! Unda tur e balentenan y e gremionan a keda pa defende nos handicapnan, “spoorloos verdwenen”. Esaki ta un tristeza pero e realidad di un pais cu ta wordo considera di ta desaroya! Por bisa cu ta parse cu hasta esnan fisicamente y/of mentalmente no ta scapa for di e maneho cruel y sin pordon di e gobierno actual. Con por ta cu un fundacion cu ta traha y lucha pa personanan cu ta incapaz di percura pa nan mes, nan propio bienestar por haya un trato asina baho, Parlamentario di AVP ta puntra. Arubus ta un compania di gobierno cu grandemente ta wordo subsidia financieramente dor di gobierno y ta resorta bao Minister di Transporte Eddie Briezen. E fundacion aki den referencia cu ta un fundacion pa personanan cu deficiencia fisico y/of intelectual tambe ta wordo subsidia grandemente dor di gobierno caminda e maneho di e fundacion aki ta forma un parti integral di e maneho total di Minister di Asuntonan Social Marisol Lopez-Tromp. Awor, con por ta cu Arubus ta stop transportacion pa e fundacion aki? Con por ta cu Arubus, e fundacion y gobierno por a laga un situacion financiero asina basico bay for di man? Ta con leu un degeneracion di un pais por bai? Aki ta mas cu na su lugar pa haci un apelacion ATROBE na Prome Ministro Nel Oduber pa tuma e curashi, maske purba, haci como si fuera cu e tin balor humano pa drecha e asunto lamentabel aki.

“Ta solamenta esnan cu no tin berguenza mester sinti nan mes bergonza”, Mike de Meza a finaliza bisando.